Oʻzbekiston Respublikasida biometrik pasport tizimi doirasida idoralararo oʻzaro hamkorlik toʻgʻrisida (63-son)
06.03.2012
Oʻzbekiston Respublikasi Vazirlar Mahkamasining
qarori
[Koʻchirma]
Oʻzbekiston Respublikasi Prezidentining “Oʻzbekiston Respublikasida pasport tizimini yanada takomillashtirish chora-tadbirlari toʻgʻrisida” 2009-yil 23-iyundagi PF-4117-son Farmonini, shuningdek Oʻzbekiston Respublikasi Vazirlar Mahkamasining “Oʻzbekiston Respublikasida biometrik pasport tizimini joriy etish loyihasini amalga oshirish boʻyicha 2011-yilga moʻljallangan chora-tadbirlar dasturini tasdiqlash toʻgʻrisida” 2011-yil 6-martdagi 66-son qarorini bajarish yuzasidan Vazirlar Mahkamasi qaror qiladi:
1. Oʻzbekiston Respublikasida biometrik pasport tizimi doirasida yigʻish punktlari (ichki ishlar organlarining migratsiya va fuqarolikni rasmiylashtirish boʻlinmalari, Oʻzbekiston Respublikasi Tashqi ishlar vazirligining Konsullik-huquqiy departamenti, Oʻzbekiston Respublikasining xorijdagi konsullik muassasalari) tomonidan amalga oshiriladigan tartib-taomillar (harakatlar) roʻyxati 1-ilovaga muvofiq tasdiqlansin.
3. Belgilansinki, Oʻzbekiston Respublikasida biometrik pasport tizimi doirasida vazirlik va idoralar biometrik pasport tizimi bilan oʻzaro hamkorlik qiluvchi ichki idoraviy apparat-dasturiy komplekslarning uzluksiz ishlashini taʼminlashi, shuningdek, ularni rivojlantirish va takomillashtirish boʻyicha oʻz vaqtida chora-tadbirlar koʻrishi shart.
4. Belgilansinki, mazkur qarorni amalga oshirish bilan bogʻliq xarajatlar 2012-yilda biometrik pasport tizimi qatnashchilariga — vazirliklar va idoralarga ajratilgan budjet mablagʻlari doirasida amalga oshiriladi.
5. Oʻzbekiston Respublikasi Moliya vazirligi 2013-yildan boshlab har yili Oʻzbekiston Respublikasi Davlat budjeti parametrlarini shakllantirishda biometrik pasport tizimi ishtirokchilari boʻlgan vazirliklar va idoralarning asoslangan hisob-kitoblari boʻyicha ushbu qarorni amalga oshirish bilan bogʻliq xarajatlarni qoplash uchun zarur mablagʻlar ajratilishini nazarda tutsin.
6. Vazirliklar va idoralar ikki oy muddatda idoraviy normativ-huquqiy hujjatlarni ushbu qarorga muvofiqlashtirsinlar.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2012-yil 6-mart,
63-son
Vazirlar Mahkamasining 2012-yil 6-martdagi 63-son qaroriga 1-ILOVA
Oʻzbekiston Respublikasida biometrik pasport tizimi doirasida yigʻish punktlari (ichki ishlar organlarining migratsiya va fuqarolikni rasmiylashtirish boʻlinmalari, Oʻzbekiston Respublikasi Tashqi ishlar vazirligining Konsullik-huquqiy departamenti, Oʻzbekiston Respublikasining xorijdagi konsullik muassasalari) tomonidan amalga oshiriladigan tartib-taomillar (harakatlar)
ROʻYXATI
1. Ichki ishlar organlarining migratsiya va fuqarolikni rasmiylashtirish boʻlinmalari tomonidan amalga oshiriladigan tartib-taomillar (harakatlar):
biometrik pasport tizimi (keyingi oʻrinlarda BPT deb ataladi) foydalanuvchilarini roʻyxatdan oʻtkazish uchun Davlat personallashtirish markaziga (DPM) buyurtmanomani rasmiylashtirish;
biometrik hujjatlarni rasmiylashtirish uchun fuqarolarni statsionar va mobil maʼlumotlarni yigʻish stansiyalari orqali qabul qilish ishlarini tashkil etish;
DPMning markazlashtirilgan maʼlumot tizimiga ilgari kiritilgan maʼlumotlarni oʻz vaqtida yangilash;
haqiqiy va haqiqiy boʻlmagan (bekor qilingan) hujjatlarning hisobini yuritish uchun biometrik hujjatni bekor qilish toʻgʻrisidagi maʼlumotlarni DPMga kiritish;
biometrik hujjatlarni va jismoniy shaxsning shaxsiy identifikatsiya raqamini olish uchun ariza beruvchi tomonidan taqdim etiladigan hujjatlarning haqiqiyligini tekshirish (bundan buyon matnda — JSHSHIR);
ariza beruvchilardan biografik va biometrik maʼlumotlarni yigʻish;
biometrik hujjatlarni va JSHSHIR ni olish uchun elektron buyurtmanomalarni shakllantirish;
biometrik hujjatlarni va JSHSHIR ni olish uchun shakllantirilgan elektron buyurtmanomalarni elektron-raqamli imzo bilan tasdiqlash;
biometrik hujjatlarni va JSHSHIR ni olish uchun DPMga belgilangan shaklda elektron talabnomalarni yuborish;
BPTga kiritilgan elektron talabnomalarning holatini kuzatib borish;
tegishli axborotni BPTga kiritish orqali shaxsiylashtirilgan biometrik hujjatlarni qabul qilish;
biometrik hujjatlarni tekshirish va ularning egalariga berish;
ariza beruvchiga JSHSHIR toʻgʻrisidagi maʼlumotlarni berish;
muddati oʻtkazib yuborilgan va belgilangan tartibda haqiqiy emas deb topilgan biometrik hujjatlarni yoʻq qilish;
Oʻzbekiston Respublikasi fuqarolari va fuqaroligi boʻlmagan shaxslarga chet elga chiqish uchun ruxsat yozuvini rasmiylashtirish toʻgʻrisida BPTga axborot taqdim etish;
elektron axborot tashuvchisi (chip) mavjud boʻlmagan pasportlar boʻyicha DPMdan maʼlumotlarni olish;
BPTga murojaat qilish orqali qidiruv tadbirlari;
server, kompyuter va kommunikatsiya uskunalarining reglament-profilaktika tadbirlari.
2. Oʻzbekiston Respublikasi Tashqi ishlar vazirligining Konsullik-huquqiy departamenti va Oʻzbekiston Respublikasining xorijdagi konsullik muassasalari tomonidan amalga oshiriladigan tartib-taomillar (harakatlar):
biometrik hujjatlarni rasmiylashtirish uchun fuqarolarni statsionar va mobil maʼlumotlarni yigʻish stansiyalari orqali qabul qilish ishlarini tashkil etish;
Oʻzbekiston Respublikasi Tashqi ishlar vazirligi Konsullik-huquqiy departamentining Maʼlumotlarni qayta ishlash markazi (keyingi oʻrinlarda MKIM deb ataladi) bilan biometrik yoʻl hujjatlari, xorijga chiqish uchun ruxsat yozuvi va JSHSHIR olish uchun buyurtmanomalarni rasmiylashtirish masalalari boʻyicha hamkorlik qilish;
biometrik hujjatlar va JSHSHIR ni olish uchun ariza beruvchi tomonidan taqdim etiladigan hujjatlarning haqiqiyligini tekshirish;
ariza beruvchilardan biografik va biometrik maʼlumotlarni yigʻish;
biometrik hujjatlarni va JSHSHIR ni olish uchun elektron buyurtmanomalarni shakllantirish;
biometrik hujjatlarni va JSHSHIR ni olish uchun shakllantirilgan elektron buyurtmanomalarni elektron-raqamli imzo bilan tasdiqlash;
biometrik hujjatlarni tekshirish* va egalariga berish;
ariza beruvchiga DPMda hosil qilingan JSHSHIR toʻgʻrisidagi maʼlumotlarni berish;
muddati oʻtkazib yuborilgan va belgilangan tartibda haqiqiy emas deb topilgan biometrik hujjatlarni yoʻq qilish;
server, kompyuter va kommunikatsiya uskunalarining reglament-profilaktika tadbirlari.
Oʻzbekiston Respublikasining biometrik diplomatik pasportini rasmiylashtirish, berish va almashtirish ishlarini tashkil etish.
* Agar Oʻzbekiston Respublikasining diplomatik vakolatxonasi yoki konsullik muassasasi qabul qiluvchi davlatda mavjud boʻlmasa yoki qabul qiluvchi davlatning hududiy xususiyatlari tufayli arizachining biometrik hujjatni shaxsan olish uchun kelishi qiyin boʻlsa (misol uchun, viza olish yoki moliyaviy holatlar sababli), biometrik hujjat pochta orqali egasiga berishga ruxsat etilgan, va bu holda verifikatsiya jarayoni oʻtkazilmasdan hujjat berish mumkin.