“Soliq maslahatchisi malaka sertifikatini olish uchun malaka imtihonlarini tashkil etish va oʻtkazish tartibi toʻgʻrisida”gi nizomga oʻzgartirishlar va qoʻshimcha kiritish haqida (1749-2-son)

06.03.2012

OʻZBEKISTON RESPUBLIKASI MOLIYA VAZIRLIGI OʻZBEKISTON RESPUBLIKASI DAVLAT SOLIQ QOʻMITASINING

Qarori

[Oʻzbekiston Respublikasi Adliya vazirligi tomonidan 2012-yil 6-martda roʻyxatdan oʻtkazildi, roʻyxat raqami 1749-2]

Oʻzbekiston Respublikasining “Soliq maslahati toʻgʻrisida”gi Qonuni (Oʻzbekiston Respublikasi Oliy Majlisi palatalarining Axborotnomasi, 2006-y., № 9, 497-modda), Oʻzbekiston Respublikasi Vazirlar Mahkamasining 2007-yil 20-martdagi 55-son “Soliq maslahati sohasini rivojlantirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2007-yil, 12-son, 111-modda) muvofiq, Oʻzbekiston Respublikasi Moliya vazirligi va Davlat soliq qoʻmitasi qaror qiladilar:

1. Oʻzbekiston Respublikasi Moliya vazirligi va Davlat soliq qoʻmitasining 2007-yil 17-dekabrdagi 108, 2007-63-sonli qarori (roʻyxat raqami 1749, 2007-yil 17-dekabr) (Oʻzbekiston Respublikasi qonun hujjatlari toʻplami, 2007-y., 50-51-son, 530-modda) bilan tasdiqlangan “Soliq maslahatchisi malaka sertifikatini olish uchun malaka imtihonlarini tashkil etish va oʻtkazish tartibi toʻgʻrisida”gi nizomga ilovaga muvofiq oʻzgartirishlar va qoʻshimcha kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Moliya vaziri R. AZIMOV

Toshkent sh.,

2012-yil 8-fevral,

18-son

Davlat soliq qoʻmitasi raisi B. PARPIYEV

Toshkent sh.,

2012-yil 8-fevral,

2012-10-son

Oʻzbekiston Respublikasi Moliya vazirligi va Davlat soliq qoʻmitasining 2012-yil 8-fevraldagi 18, 2012-10-sonli qaroriga ILOVA

Soliq maslahatchisi malaka sertifikatini olish uchun malaka imtihonlarini tashkil etish va oʻtkazish tartibi toʻgʻrisidagi nizomga kiritilayotgan oʻzgartirishlar va qoʻshimcha

1. 3-bandning “v” kichik bandi quyidagi tahrirda bayon etilsin:

“v) oliy taʼlim muassasasini tamomlaganidan keyin kamida besh yil ish stajiga, shu jumladan, kamida ikki yil iqtisodiy yoki yuridik mutaxassislik boʻyicha ish stajiga ega boʻlishi”.

2. 5-bandda:

“v” kichik bandi quyidagi tahrirda bayon etilsin:

“v) mehnat daftarchasining notarial yoki ish joyida tasdiqlangan kseronusxasi”;

“d” kichik bandda “bir yildan” degan soʻzlar “uch yildan” degan soʻzlar bilan almashtirilsin;

quyidagi mazmundagi “j” kichik bandi bilan toʻldirilsin:

“j) pasport yoki uni oʻrnini bosuvchi hujjat nusxasi”.

3. 21-band quyidagi tahrirda bayon etilsin:

“21. Imtihon modullarida test savollari koʻrsatiladi. Imtihon modullari 60 ta test savollaridan iborat boʻladi, jumladan:

yuridik va jismoniy shaxslarni soliqqa tortish — 25;

buxgalteriya hisobi va hisoboti — 15;

soliq huquqi, iqtisodiy munosabatlarni huquqiy tartibga solish va soliq maslahati berishning huquqiy asoslari — 20”.

4. Oʻzbek tilidagi matnning 26-bandidan “imtihon komissiyasiga” degan soʻzlar chiqarib tashlansin.

5. 39-band quyidagi tahrirda bayon etilsin:

“39. Soliq maslahatchisi sertifikatini olish uchun daʼvogar boʻlimlar boʻyicha kamida quyidagi miqdordagi savollarga toʻgʻri javob berishi lozim:

yuridik va jismoniy shaxslarni soliqqa tortish — 15;

buxgalteriya hisobi va hisoboti — 9;

soliq huquqi, iqtisodiy munosabatlarni huquqiy tartibga solish va soliq maslahati berishning huquqiy asoslari — 12.

Bunda test natijalarini ijobiy deb eʼtirof etish uchun asos boʻlib hisoblanadigan toʻgʻri javoblar miqdori imtihon testlaridagi mavjud savollar umumiy miqdorining kamida 75 foizini tashkil etishi kerak”.