Umumtaʼlim maktablari oʻqituvchilarining mehnatini ragʻbatlantirishga oid tadbirlar toʻgʻrisida (PF-968-son)

28.09.1994

Oʻzbekiston Respublikasi Prezidentining

Farmoni

Jamiyat turmushida va yosh avlodni tarbiyalashda umumtaʼlim maktablari oʻqituvchilarining tutgan oʻrniga alohida ahamiyat berib, shuningdek pedagog xodimlarning muqim oʻrnashib qolishlari uchun zarur sharoitlarni yaratish maqsadida:

1. 1994-yilning 1-oktabridan umumtaʼlim maktablari oʻqituvchilari va rahbarlarining ish haqi Mehnatga haq toʻlashning yagona tarif setkasi boʻyicha malaka darajasini oshirish hamda qoʻshimcha haq va ustamalar tizimini tartibga solish hisobidan oʻrtacha 20 foiz oshirilsin.

2. Ish haqini oshirish bilan bogʻliq xarajatlar respublika budjeti mablagʻlari hisobidan amalga oshirilsin.

3. Vazirlar Mahkamasi bir hafta muddat ichida ushbu Farmonni roʻyobga chiqarishga, shuningdek oliy va oʻrta maxsus taʼlim xodimlarining ish haqiga qoʻshimcha va ustamalarni tartibga solish masalalariga oid qaror qabul qilsin.

4. Mazkur Farmon ijrosini nazorat qilish Oʻzbekiston Respublikasi Vazirlar Mahkamasiga yuklatilsin.

Oʻzbekiston Respublikasining Prezidenti I. KARIMOV

Toshkent sh.,

1994-yil 28-sentabr,

PF-968-son