Kredit byurolari va kredit byurolariga kredit axborotini taqdim etuvchi organlar va tashkilotlar oʻrtasida kredit axboroti almashinuvi tartibi toʻgʻrisida nizomni tasdiqlash haqida (2330-son)

02.03.2012

OʻZBEKISTON RESPUBLIKASI MARKAZIY BANKI BOSHQARUVINING

Qarori

[Oʻzbekiston Respublikasi Adliya vazirligi tomonidan 2012-yil 2-martda roʻyxatdan oʻtkazildi, roʻyxat raqami 2330]

Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi (Oʻzbekiston Respublikasi Oliy Majlisining Axborotnomasi, 1995-y., 12-son, 247-modda), “Kredit axboroti almashinuvi toʻgʻrisida”gi (Oʻzbekiston Respublikasi qonun hujjatlari toʻplami, 2011-y., 40-son, 412-modda) qonunlariga asosan Oʻzbekiston Respublikasi Markaziy banki Boshqaruvi qaror qiladi:

1. Kredit byurolari va kredit byurolariga kredit axborotini taqdim etuvchi organlar va tashkilotlar oʻrtasida kredit axboroti almashinuvi tartibi toʻgʻrisida nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Markaziy bank raisi F. MULLAJONOV

Toshkent sh.,

2012-yil 14-yanvar,

1/1-son

Oʻzbekiston Respublikasi Markaziy banki Boshqaruvining 2012-yil 14-yanvardagi 1/1-son qaroriga ILOVA

Kredit byurolari va kredit byurolariga kredit axborotini taqdim etuvchi organlar va tashkilotlar oʻrtasida kredit axboroti almashinuvi tartibi toʻgʻrisida

NIZOM

Mazkur Nizom Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi (Oʻzbekiston Respublikasi Oliy Majlisining Axborotnomasi, 1995-y., 12-son, 247-modda) va “Kredit axboroti almashinuvi toʻgʻrisida”gi (Oʻzbekiston Respublikasi qonun hujjatlari toʻplami, 2011-y., 40-son, 412-modda) qonunlariga muvofiq kredit byurolari va kredit byurolariga kredit axborotini taqdim etuvchi organlar va tashkilotlar oʻrtasida kredit axboroti almashinuvi tartibini belgilaydi.

I. Kredit byurosining kredit axborotini taqdim etuvchi organlar va tashkilotlarga murojaat qilishi

1. Oʻzbekiston Respublikasining “Kredit axboroti almashinuvi toʻgʻrisida”gi Qonunining 17-moddasiga muvofiq kredit byurolariga quyidagi organlar va tashkilotlar (bundan buyon matnda tegishli organlar va tashkilotlar deb yuritiladi) tomonidan kredit axboroti taqdim etiladi:

yuridik shaxslarni, yakka tartibdagi tadbirkorlarni davlat roʻyxatidan oʻtkazuvchi organlar tomonidan — Yuridik shaxslarning davlat reyestriga va Yakka tartibdagi tadbirkorlarning davlat reyestriga kiritilgan maʼlumotlar hajmida;

koʻchmas mulk obyektiga boʻlgan huquqlarni va unga doir bitimlarni davlat roʻyxatidan oʻtkazuvchi organlar tomonidan — Koʻchmas mulkka boʻlgan huquqlarning davlat reyestriga va koʻchmas mulk haqidagi boshqa ochiq foydalaniladigan maʼlumotlar bazalariga kiritilgan maʼlumotlar hajmida;

davlat soliq xizmati organlari tomonidan — soliq toʻlovchilarni hisobga olish maʼlumotlari, shuningdek ularning moliyaviy hisoboti toʻgʻrisida;

ichki ishlar organlari tomonidan — berilgan pasportlar yoki identifikatsiyalovchi ID-kartalar toʻgʻrisida, shu jumladan yoʻqolgan yoki amal qilish muddati tugagani oʻrniga berilgan pasportlar yoki identifikatsiyalovchi ID-kartalar haqida, shuningdek avtomototransport vositalarining roʻyxatdan oʻtkazilganligi haqida hamda ularning mulkdorlari (egalari) toʻgʻrisida;

notarial idoralar tomonidan — bitim predmeti boʻlgan obyektni boshqa shaxsga oʻtkazishni taqiqlash yoki xatlov mavjud emasligi toʻgʻrisida;

litsenziya va (yoki) boshqa ruxsat etuvchi hujjatlarni beruvchi organlar tomonidan — ushbu hujjatlar berilganligi faktlari toʻgʻrisida, litsenziyaning va (yoki) boshqa ruxsat etuvchi hujjatlarning amal qilishi toʻxtatib turilganligi yoki tugatilganligi haqida, shuningdek ularning bekor qilinganligi va qayta rasmiylashtirilganligi toʻgʻrisida.

2. Kredit byurolari kredit axboroti subyektlarining kredit tarixini shakllantirish uchun tegishli organlar va tashkilotlardan oʻzaro tuzilgan kredit axboroti almashinuvi toʻgʻrisidagi shartnoma (bundan buyon matnda shartnoma deb yuritiladi) asosida kredit axborotini olishga haqli.

3. Tegishli organlar va tashkilotlar kredit byurolari bilan qonunchilik hujjatlari talablariga mos boʻlgan shartnomani tuzishni asossiz ravishda rad etishga haqli emas.

4. Kredit byurolari tegishli organlar va tashkilotlarga kredit axborotini olish uchun yozma yoki elektron shaklda soʻrov yuboradi. Soʻrovda olinadigan kredit axborotining tarkibi koʻrsatilishi lozim.

II. Kredit axborotini taqdim etish

5. Kredit axboroti almashinuvida kredit axborotining butligini, ishonchliligini, maxfiyligini taʼminlash uchun Kredit byurolarini roʻyxatga olish va ularning faoliyatini litsenziyalash tartibi toʻgʻrisidagi nizomga (roʻyxat raqami 3042, 2018-yil 25-iyul) muvofiq xavfsizlik choralari koʻrilishi lozim.

6. Tegishli organlar va tashkilotlar kredit byurolariga qoida tariqasida kredit axborotini elektron shaklda taqdim etadi. Kredit axborotining qogʻozda taqdim etilishi shartnomada belgilanadi.

7. Kredit byurolarida mavjud boʻlgan kredit axborotiga zarar yetganda yoki ular yoʻqolganda kredit byurolari tegishli organlar va tashkilotlardan zarar yetgan yoki yoʻqolgan kredit axboroti hajmida qoʻshimcha soʻrov asosida kredit axborotini olishi lozim.

8. Kredit byurolari tegishli organlar va tashkilotlardan olinayotgan kredit axborotining maxfiyligini taʼminlash uchun undan foydalanish huquqiga ega boʻlgan xodimlari doirasini belgilaydi.

III. Kredit axborotlarini qayta ishlash

9. Kredit byurolari tegishli organlar va tashkilotlardan olingan kredit axborotini yigʻadi, tahlil qiladi va undan kredit axboroti subyektining kredit tarixini shakllantiradi.

10. Tegishli organlar va tashkilotlar tomonidan kredit byurolariga taqdim etilgan kredit axborotining toʻgʻri ekanligiga kredit byurolarida shubha tugʻilsa, ular tegishli organlar va tashkilotlarga bu haqida soʻrov yuborishlari lozim. Kredit axborotining toʻgʻriligi yuzasidan tugʻilgan shubha oʻz tasdigʻini topgan taqdirda tegishli organlar va tashkilotlar kredit axborotini uch ish kuni muddatida tuzatib, bu haqda kredit byurolarini xabardor qilishlari lozim.

11. Tegishli organlar va tashkilotlardan olingan kredit axborotiga kredit byurolari tomonidan oʻzgartirish kiritish taqiqlanadi, mazkur Nizomning 10-bandi bundan mustasno.

IV. Yakuniy qoidalar

12. Mazkur Nizom talablarini buzishda aybdor boʻlgan shaxslar qonunchilik hujjatlariga muvofiq javobgar boʻladilar.

13. Mazkur Nizom Oʻzbekiston Respublikasi Davlat soliq qoʻmitasi, Ichki ishlar vazirligi va Yer resurslari, geodeziya, kartografiya va davlat kadastri davlat qoʻmitasi bilan kelishilgan.

Davlat soliq qoʻmitasi raisi B. PARPIYEV

2011-yil 30-dekabr

Ichki ishlar vaziri B. MATLYUBOV

2011-yil 30-dekabr

Yer resurslari, geodeziya, kartografiya va davlat kadastri davlat qoʻmitasi raisi S. ARABOV

2011-yil 30-dekabr