Oʻzbekiston Respublikasining soliq va bojxona toʻgʻrisidagi qonunlariga rioya etilishi ustidan nazoratni kuchaytirish borasidagi chora-tadbirlar haqida (PF-795-son)

18.03.1994

Oʻzbekiston Respublikasi Prezidentining

Farmoni

Respublikaning iqtisodiy manfaatlari va mulkiy huquqlarini himoya qilishga, tadbirkorlikni rivojlantirishga, davlatning yagona soliq va bojxona siyosatini amalga oshirishga qaratilgan chora-tadbirlarni roʻyobga chiqarish maqsadida:

1. Oʻzbekiston Respublikasining Davlat soliq qoʻmitasi hamda Davlat bojxona qoʻmitasi soliq va bojxona toʻgʻrisidagi qonunlarga rioya etilishi ustidan nazoratni kuchaytirish borasida qoʻshimcha choralar koʻrsin.

Shu maqsadda katta va juda katta miqdorlardagi soliqlarni, bojlar hamda boshqa majburiy toʻlovlarni toʻlashdan boʻyin tovlash, tovar-moddiy boyliklarni respublikadan tashqariga gʻayriqonuniy ravishda olib chiqib ketish va davlatning iqtisodiy manfaatlariga ziyon yetkazadigan boshqacha tarzdagi qonunbuzarlik faktlari boʻyicha har tomonlama tekshiruv oʻtkazilib, qonunlarga muvofiq jinoiy ishlar qoʻzgʻatilsin, tergovga kadar tekshiruv va surishtiruv oʻtkazilsin hamda tergovga tegishli materiallar huquqni muhofaza qiluvchi organlarga topshirilsin.

2. Oʻzbekiston Respublikasining Prokuraturasi, Davlat xavfsizlik xizmati, Ichki ishlar vazirligi soliq va bojxona toʻgʻrisida qonunlarga qanday rioya etilayotgani borasidagi jinoyatlar hech kechiktirilmay va tezkorlik bilan tergov qilinishini tashkil etib, qilmish uchun jazoning muqarrarligini taʼminlasinlar.

3. Respublikaning sud organlariga mazkur toifadagi jinoiy ishlar sudlarda eng muhim ish sifatida tezkorlik bilan koʻrib chiqilishini taʼminlash, chiqarilayotgan hukmlar va qarorlarni ommaviy axborot vositalari orqali keng oshkor qilish tavsiya etilsin.

4. Oʻzbekiston Respublikasining Prokuraturasiga soliq va bojxona organlaridan huquqni muhofaza qilish organlariga topshiriladigan materiallarni koʻrib chiqish ustidan taʼsirchan nazoratni taʼminlash, ushbu materiallar boʻyicha qoʻzgʻatiladigan jinoiy ishlar tergovining borishi, toʻliqligi, sifati va muddatlari ustidan qattiq nazoratni joriy etish taklif qilinsin, sudlar tomonidan shunday ishlar koʻrib chiqilishi chogʻida prokurorlarning albatta qatnashishlari taʼminlansin.

5. Oʻzbekiston Respublikasining Bosh prokurori, Oliy sudi raisi, Adliya vaziri, Davlat soliq qoʻmitasining raisi hamda Davlat bojxona qoʻmitasining raisi sansalorlik, murosasozlik va prinsipsizlik qilganliklari, shuningdek ishlarni koʻrib chiqishda belgilangan muddatlarni buzganliklari uchun soliq va bojxona organlarining rahbarlarini, shuningdek shahar, tuman prokurorlari va sudyalarini qonunlarga muvofiq qatʼiy javobgarlikka tortsinlar.

Yuqorida koʻrsatilgan organlarning rahbarlari mazkur Farmon bajarilishining ahvolini har kvartalda umumlashtirib, Hukumatga zarur axborotni berib borsinlar.

Oʻzbekiston Respublikasining Prezidenti I. KARIMOV

Toshkent sh.,

1994-yil 18-mart,

PF-795-son