Mikrokredit tashkilotlari tomonidan Oʻzbekiston Respublikasi Markaziy bankiga moliyaviy hisobotlarni va elektron maʼlumotlarni taqdim etish tartibi toʻgʻrisidagi nizomni tasdiqlash haqida (2322-son)
03.02.2012
OʻZBEKISTON RESPUBLIKASI MARKAZIY BANKI BOShQARUVINING
Qarori
[Oʻzbekiston Respublikasi Adliya vazirligi tomonidan 2012-yil 3-fevralda roʻyxatdan oʻtkazildi, roʻyxat raqami 2322]
Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Mikrokredit tashkilotlari toʻgʻrisida”gi, “Buxgalteriya hisobi toʻgʻrisida”gi qonunlari va Oʻzbekiston Respublikasi Prezidentining 2010-yil 26-noyabrdagi PQ-1438-son “2011 — 2015-yillarda respublika moliya-bank tizimini yanada isloh qilish va barqarorligini oshirish hamda yuqori xalqaro reyting koʻrsatkichlariga erishishning ustuvor yoʻnalishlari toʻgʻrisida”gi qaroriga muvofiq Oʻzbekiston Respublikasi Markaziy banki Boshqaruvi qaror qiladi:
1. Mikrokredit tashkilotlari tomonidan Oʻzbekiston Respublikasi Markaziy bankiga moliyaviy hisobotlarni va elektron maʼlumotlarni taqdim etish tartibi toʻgʻrisidagi nizom ilovaga muvofiq tasdiqlansin.
2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.
Markaziy bank raisi F. MULLAJONOV
Toshkent sh.,
2011-yil 20-dekabr,
38/2-son
Oʻzbekiston Respublikasi Markaziy banki Boshqaruvining 2011-yil 20-dekabrdagi 38/2-son qaroriga ILOVA
Mikrokredit tashkilotlari tomonidan Oʻzbekiston Respublikasi Markaziy bankiga moliyaviy hisobotlarni va elektron maʼlumotlarni taqdim etish tartibi toʻgʻrisidagi
NIZOM
Mazkur Nizom Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Mikrokredit tashkilotlari toʻgʻrisida”gi, “Buxgalteriya hisobi toʻgʻrisida”gi qonunlari, Oʻzbekiston Respublikasi Prezidentining 2010-yil 26-noyabrdagi PQ-1438-son “2011 — 2015-yillarda respublika moliya-bank tizimini yanada isloh qilish va barqarorligini oshirish hamda yuqori xalqaro reyting koʻrsatkichlariga erishishning ustuvor yoʻnalishlari toʻgʻrisida”gi qaroriga muvofiq mikrokredit tashkilotlari tomonidan Oʻzbekiston Respublikasi Markaziy bankiga (keyingi oʻrinlarda Markaziy bank deb yuritiladi) moliyaviy hisobotlarni hamda ularning elektron maʼlumotlarini taqdim etish tartibini belgilaydi.
I. Umumiy qoidalar
1. Mikrokredit tashkilotlari buxgalteriya hisobini Oʻzbekiston Respublikasining “Buxgalteriya hisobi toʻgʻrisida”gi Qonuni, Moliyaviy hisobotlarning xalqaro standartlari va boshqa normativ-huquqiy hujjatlarga muvofiq yuritadi.
2. Mikrokredit tashkilotlari Markaziy bankka quyidagi moliyaviy hisobotlarni va ularning elektron maʼlumotlarini taqdim etadi:
balans hisoboti (mazkur Nizomga 1-ilova);
moliyaviy natijalar toʻgʻrisidagi hisobot (mazkur Nizomga 2-ilova);
kapitaldagi oʻzgarishlar (mazkur Nizomga 3-ilova).
II. Mikrokredit tashkilotlari tomonidan Markaziy bankka moliyaviy hisobotlarni taqdim etish
3. Taqdim etilgan moliyaviy hisobotlardagi maʼlumotlar hisobot oyining oxirgi kunida amalga oshirilgan amaliyotlarni hisobga olgan holda mazkur hisobot oyining oxirgi sanasiga koʻrsatilishi kerak.
4. Moliyaviy hisobotlar mikrokredit tashkilotlari tomonidan hisobot oyidan keyingi oyning 5-sanasigacha mikrokredit tashkiloti joylashgan hududdagi Markaziy bankning hududiy Bosh boshqarmasiga taqdim etiladi. Agar oyning 5-sanasi dam olish yoki bayram kuniga toʻgʻri kelsa, bunda hisobotlar dam olish yoki bayram kunidan avvalgi ish kunida taqdim etilishi lozim.
5. Moliyaviy hisobotlar uch nusxada tayyorlanadi. Bunda hisobotlarning ikki nusxasi mikrokredit tashkiloti joylashgan hududdagi Markaziy bankning hududiy Bosh boshqarmasiga taqdim etiladi, uchinchi nusxasi esa mikrokredit tashkilotining oʻzida saqlanadi.
6. Moliyaviy hisobotlar mikrokredit tashkilotining rahbari hamda buxgalteriya hisobi va moliyaviy boshqarish vazifalarini amalga oshiruvchi shaxs tomonidan imzolanadi, mikrokredit tashkilotining muhri bilan tasdiqlanadi.
7. Markaziy bankning hududiy Bosh boshqarmasi taqdim etilgan moliyaviy hisobotlarning toʻgʻri rasmiylashtirilganligini va toʻliqliligini tekshiradi. Taqdim etilgan moliyaviy hisobotlarda xato va kamchiliklar aniqlanganda, ularni tuzatib qayta taqdim etish sharti bilan mikrokredit tashkilotiga qaytaradi.
8. Markaziy bankning hududiy Bosh boshqarmasi mikrokredit tashkiloti tomonidan taqdim etilgan moliyaviy hisobotlarning bir nusxasini har oyning 7-sanasidan kechiktirmay Markaziy bankka taqdim etib boradi.
III. Mikrokredit tashkilotlari tomonidan moliyaviy hisobotlarning elektron maʼlumotlarini taqdim etish
9. Mikrokredit tashkilotlari avtomatlashtirilgan tizim orqali moliyaviy hisobotlarning elektron maʼlumotlarini shakllantirib, Bank tizimi maʼlumotlar omboriga (keyingi oʻrinlarda BTMO deb yuritiladi) hisobot oyidan keyingi oyning 5-sanasigacha aloqa kanallari orqali yuborishi shart.
10. Quyidagi hollarda mikrokredit tashkilotlari BTMO ga moliyaviy hisobotlarning elektron maʼlumotlarini yubormasligi mumkin:
mikrokredit tashkilotining BTMO bilan kommunikatsiya aloqasi uzilganda;
mikrokredit tashkilotining texnik vositasi va dasturiy taʼminoti nosoz holatda boʻlganda;
fors-major holatlarida.
11. Mikrokredit tashkiloti mazkur Nizomning 10-bandida koʻrsatilgan holatlar haqida Markaziy bankni darhol xabardor etishi hamda ikkinchi va uchinchi xatboshilarda nazarda tutilgan holatlarni ular yuzaga kelgan kundan boshlab 5 kunlik muddat ichida bartaraf etishi kerak.
IV. Yakuniy qoidalar
12. Moliyaviy hisobotlar va ularning elektron maʼlumotlari mikrokredit tashkilotining butun faoliyati davomida yuborilib turiladi.
13. Taqdim etiladigan moliyaviy hisobotlar va ularning BTMO ga yuboriladigan elektron maʼlumotlari oʻzaro mos kelishi kerak.
14. Mikrokredit tashkilotlarining ayrim moliyaviy operatsiyalarni oʻtkazishi maʼlum muddatga toʻxtatilganidan qatʼi nazar, ular tomonidan moliyaviy hisobotlar va ular boʻyicha elektron maʼlumotlar belgilangan muddatlarda taqdim etilishi lozim.
15. Mazkur Nizomning buzilishida aybdor boʻlgan shaxslar qonun hujjatlarida belgilangan tartibda javobgarlikka tortiladi.
Mikrokredit tashkilotlari tomonidan Oʻzbekiston Respublikasi Markaziy bankiga moliyaviy hisobotlarni va elektron maʼlumotlarni taqdim etish tartibi toʻgʻrisidagi nizomga 1-ILOVA
Izoh:
* mikrokredit va mikroqarz boʻyicha.
** mikrolizing boʻyicha.
Mikrokredit tashkilotlari tomonidan Oʻzbekiston Respublikasi Markaziy bankiga moliyaviy hisobotlarni va elektron maʼlumotlarni taqdim etish tartibi toʻgʻrisidagi nizomga 2-ILOVA
Izoh:
* yagona soliq toʻlovini toʻlaydigan mikrokredit tashkilotlari boʻyicha bu satrda yagona soliq toʻlovi summasi koʻrsatiladi.
*** hisobot yili davomida
Mikrokredit tashkilotlari tomonidan Oʻzbekiston Respublikasi Markaziy bankiga moliyaviy hisobotlarni va elektron maʼlumotlarni taqdim etish tartibi toʻgʻrisidagi nizomga 3-ILOVA
Izoh:
* boshlangʻich qiymatga nisbatan baholash qiymatining oshgan summasini taqsimlanmagan foydaga oʻtkazilishi va boshqalar.