Germaniya xalqaro hamkorlik jamiyatining texnikaviy koʻmaklashish mablagʻlaridan samarali foydalanish chora-tadbirlari toʻgʻrisida (4-son)

10.01.2012

Oʻzbekiston Respublikasi Vazirlar Mahkamasining

qarori

Germaniya xalqaro hamkorlik jamiyati (GITS) bilan hamkorlikda texnikaviy koʻmaklashish mablagʻlarini jalb etish va ulardan foydalanish samaradorligini oshirish maqsadida Vazirlar Mahkamasi qaror qiladi:

1. Germaniya xalqaro hamkorlik jamiyati bilan hamkorlik qilish masalalari boʻyicha Muvofiqlashtiruvchi guruh (keyingi oʻrinlarda Muvofiqlashtiruvchi guruh deb ataladi) ilovaga* muvofiq tarkibda tashkil etilsin.

*Ilova berilmaydi.

2. Quyidagilar Muvofiqlashtiruvchi guruhning asosiy vazifalari etib belgilansin:

texnikaviy koʻmaklashishning birgalikdagi loyihalari doirasida GITS bilan hamkorlikni muvofiqlashtirish;

GITSning texnikaviy koʻmaklashish mablagʻlarini jalb etgan holda amalga oshirish uchun loyihalarni tanlab olish va ularni Oʻzbekiston Respublikasi Vazirlar Mahkamasi bilan belgilangan tartibda kelishish;

GITSning texnikaviy koʻmaklashish mablagʻlarini jalb etish bilan bogʻliq tartibot masalalari yuzasidan muntazam muloqot olib borish, axborotlar almashish va ushbu masalalarni tezkorlik bilan hal etish;

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi hamda Moliya vazirligi tomonidan tayyorlangan loyihalarning bajaruvchilarini va texnikaviy koʻmak oluvchilarni taklif etgan holda, GITS ishtirokida loyihalarning ishlab chiqilishi va amalga oshirilishi toʻgʻrisidagi hisobotlarni eshitish.

3. Oʻzbekiston Respublikasi Tashqi iqtisodiy aloqalar, investitsiyalar va savdo vazirligiga quyidagilar yuklansin:

Muvofiqlashtiruvchi guruhning ishchi organi funksiyalarini bajarish hamda GITS ishtirokida davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar tomonidan loyihalarning ishlab chiqilishi va amalga oshirilishi monitoringini yuritish;

hamkorlik masalalari boʻyicha GITS bilan muzokaralar oʻtkazish;

Oʻzbekiston Respublikasi Hukumati bilan Germaniya Federativ Respublikasi Hukumati oʻrtasida 1993-yil 28-aprelda tuzilgan Ilmiy tadqiqotlar va mutaxassislar jamgʻarmasini tashkil etish toʻgʻrisidagi Bitimning 7-moddasiga muvofiq, Oʻzbekiston Respublikasi vakolatli organining Ilmiy tadqiqotlar va texnikaviy hamkorlik mutaxassislari jamgʻarmasini boshqarish bilan bogʻliq funksiyalarini bajarish.

4. Oʻzbekiston Respublikasi Tashqi ishlar vazirligi diplomatik kanallar orqali Germaniya Federativ Respublikasining Oʻzbekiston Respublikasidagi Elchixonasini Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Ilmiy tadqiqotlar va mutaxassislar jamgʻarmasini boshqarish yuzasidan javob beruvchi masʼul muassasa etib belgilanganligi toʻgʻrisida xabardor qilsin.

5. Belgilab qoʻyilsinki, Germaniya xalqaro hamkorlik jamiyati ishtirokida davlat va xoʻjalik boshqaruvi organlari, mahalliy davlat hokimiyati organlari hamda boshqa tashkilotlar tomonidan loyihalar Germaniya xalqaro hamkorlik jamiyati bilan hamkorlik qilish masalalari boʻyicha Muvofiqlashtiruvchi guruh bilan kelishgan holda amalga oshiriladi.

Davlat va xoʻjalik boshqaruvi organlari, mahalliy davlat hokimiyati organlari hamda boshqa tashkilotlarning rahbarlari GITS ishtirokida amalga oshiriladigan loyihalar va boshqa tadbirlarni ishlab chiqish Muvofiqlashtiruvchi guruh bilan kelishilishi yuzasidan ularning shaxsan javobgar ekanligi toʻgʻrisida qatʼiy ogohlantirilsin.

6. Muvofiqlashtiruvchi guruh (Toʻlaganov):

loyihalar boʻyicha ijrochi agentliklar bilan birgalikda 2011-2012-yillarda va keyingi yillarda Germaniya Federativ Respublika Hukumati bilan texnikaviy hamkorlik dasturlari doirasida loyihalarning oʻz vaqtida tayyorlanishi va amalga oshirilishini taʼminlasin;

Germaniya xalqaro hamkorlik jamiyati bilan texnikaviy koʻmaklashish mablagʻlarini jalb etgan holda amalga oshirish uchun loyihalarni tanlab olish tartibini ikki hafta muddatda ishlab chiqsin va tasdiqlasin.

7. Davlat va xoʻjalik boshqaruvi organlari, mahalliy davlat hokimiyati organlari hamda loyihalarning boshqa ijrochi tashkilotlari va GITSning texnikaviy koʻmagini oluvchilar har chorakda Oʻzbekiston Respublikasi Moliya vazirligiga hamda Tashqi iqtisodiy aloqalar, investitsiyalar va savdo vazirligiga loyihalarning amalga oshirilishi va texnikaviy koʻmaklashish mablagʻlarining ishlatilishi toʻgʻrisida axborot taqdim etsinlar.

8. Oʻzbekiston Respublikasi Moliya vazirligi davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar (ijrochi agentliklar) tomonidan olinadigan GITSning texnikaviy koʻmaklashish moliya mablagʻlaridan belgilangan maqsadda va samarali foydalanilishi yuzasidan qatʼiy nazoratni taʼminlasin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Bosh vazirining oʻrinbosari E.M.Gʻaniyev zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2012-yil 10-yanvar,

4-son