Sugʻurtalovchilarning sugʻurta zaxiralari toʻgʻrisidagi nizomga oʻzgartirishlar kiritish haqida (1882-2-son)

14.12.2011

Oʻzbekiston Respublikasi Moliya vazirining

buyrugʻi

[Oʻzbekiston Respublikasi Adliya vazirligi tomonidan 2011-yil 14-dekabrda roʻyxatdan oʻtkazildi, roʻyxat raqami 1882-2]

Oʻzbekiston Respublikasining “Sugʻurta faoliyati toʻgʻrisida”gi Qonuni (Oʻzbekiston Respublikasi Oliy Majlisining Axborotnomasi, 2002-y., 4-5-son, 68-modda) va Oʻzbekiston Respublikasi Vazirlar Mahkamasining 2011-yil 17-oktabrdagi 283-son “Byurokratik toʻsiqlarni bartaraf etish va ruxsat berish tartibotlarini amalga oshirishda davlat boshqaruv funksiyalarini qisqartirishga doir qoʻshimcha chora-tadbirlar toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2011-y., 42-son, 454-modda) muvofiq buyuraman:

1. Oʻzbekiston Respublikasi moliya vazirining 2008-yil 20-noyabrdagi 107-son buyrugʻi bilan tasdiqlangan Sugʻurtalovchilarning sugʻurta zaxiralari toʻgʻrisidagi nizomga (roʻyxat raqami 1882, 2008-yil 15-dekabr) (Oʻzbekiston Respublikasi qonun hujjatlari toʻplami, 2008-y., 52-son, 529-modda) ilovaga muvofiq oʻzgartirishlar kiritilsin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Vazir R. AZIMOV

Toshkent sh.,

2011-yil 14-noyabr,

69-son

Oʻzbekiston Respublikasi moliya vazirining 2011-yil 14-noyabrdagi 69-son buyrugʻiga ILOVA

Sugʻurtalovchilarning sugʻurta zaxiralari toʻgʻrisidagi nizomga kiritilayotgan oʻzgartirishlar

1. 6-bandning birinchi xatboshidan “Davsugʻurtanazorat bilan kelishilgan holda” degan soʻzlar chiqarib tashlansin.

2. 26-bandning ikkinchi va uchinchi xatboshilari quyidagi tahrirda bayon etilsin:

“OChZni shakllantirish va undan foydalanish tartibi sugʻurtalovchi tomonidan tasdiqlanadigan ogohlantirish chora-tadbirlari zaxirasi toʻgʻrisidagi nizomda belgilanadi.

Bunda sugʻurtalovchi OChZdan moliyalashtiriladigan ogohlantirish chora-tadbirlarining aniq roʻyxatini belgilashi va uni Davsugʻurtanazoratga kelishish uchun taqdim etishi lozim”.

3. 28-bandning ikkinchi xatboshidagi “sugʻurtalovchi tomonidan belgilanadi va Davsugʻurtanazorat bilan kelishiladi” degan soʻzlar “sugʻurtalovchi tomonidan tasdiqlanadigan falokatlar zaxirasi toʻgʻrisidagi nizomda belgilanadi” degan soʻzlar bilan almashtirilsin.

4. 29-bandning uchinchi xatboshidagi “sugʻurtalovchi tomonidan belgilanadi va Davsugʻurtanazorat bilan kelishiladi” degan soʻzlar “sugʻurtalovchi tomonidan tasdiqlanadigan zararlilikning tebranishi zaxirasi toʻgʻrisidagi nizomda belgilanadi” degan soʻzlar bilan almashtirilsin.

5. 30-bandning ikkinchi xatboshisi quyidagi tahrirda bayon etilsin:

“ANZni shakllantirish va undan foydalanish tartibi, shartlari sugʻurtalovchi tomonidan tasdiqlanadigan aktivlarning nomuvofiqligi zaxirasi toʻgʻrisidagi nizomda belgilanadi”.

6. 31-banddagi “bunday zaxiralarni shakllantirish va ulardan foydalanish tartibi, shartlarini Davsugʻurtanazorat bilan kelishilgandan” degan soʻzlar “bunday zaxirani shakllantirish va undan foydalanish tartibi, shartlarini nazarda tutuvchi tegishli zaxira toʻgʻrisidagi nizom sugʻurtalovchi tomonidan tasdiqlanganidan” degan soʻzlar bilan almashtirilsin.