Har yili yongʻin xavfsizligi oyligini oʻtkazish toʻgʻrisida (309-son)

18.11.2011

Oʻzbekiston Respublikasi Vazirlar Mahkamasining

qarori

Oʻzbekiston Respublikasi hududida kuz-qish isitish mavsumi oldidan yongʻinlarning oldini olish hamda yongʻin xavfsizligini taʼminlash chora-tadbirlarini kuchaytirish maqsadida Vazirlar Mahkamasi qaror qiladi:

1. Oʻzbekiston Respublikasi Ichki ishlar vazirligining har yili noyabr oyining uchinchi oʻn kunligidan boshlab yongʻin xavfsizligi oyligini oʻtkazish toʻgʻrisidagi taklifi qabul qilinsin.

Quyidagilar yongʻin xavfsizligi oyligining asosiy vazifalari etib belgilansin:

iqtisodiyot tarmoqlari va ijtimoiy soha obyektlarini, shuningdek uy-joy fondini yongʻin xavfsizligi talablariga muvofiq holga keltirish;

oʻta muhim davlat ahamiyatiga molik yoki yongʻin va portlash xavfi yuqori boʻlgan obyektlarda yongʻin xavfsizligini mustahkamlash boʻyicha kompleks chora-tadbirlarni amalga oshirish.

2. Yongʻin xavfsizligi oyligini oʻtkazish davrida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

yongʻin xavfsizligi oyligini tashkil etish va oʻtkazish komissiyalarining tuzilishini;

yongʻin xavfsizligi oyligini samarali oʻtkazish tadbirlari ishlab chiqilishini, ularda yongʻin xavfsizligini taʼminlashga daxldor boʻlgan barcha tegishli idoralarning vazifalari taqsimlanishini;

jamoat transportida va aholi koʻp toʻplanadigan joylarda yongʻin xavfsizligi oyligi oʻtkazilayotgani haqida reklama yozuvlarni, plakatlar joylashtirilishini;

har oʻn kunda yongʻin xavfsizligi oyligi oʻtkazilishi muhokama qilinishini va unda tegishli rahbarlarning hisobotlari eshitilishini hamda yongʻin xavfsizligini taʼminlashga jamoatchilikning keng jalb etilishini taʼminlasinlar.

3. Yongʻin xavfsizligi oyligini oʻtkazish davrida davlat va xoʻjalik boshqaruvi organlari, boshqa tashkilotlar rahbarlari:

hayʼatlar, boshqaruvlar, kengashlar majlislarida idoraviy mansub obyektlar va uy-joy fondining texnik holati, yongʻin xavfsizligi masalalarini koʻrib chiqsinlar;

gaz, energetika, suv xoʻjaligi va isitish moslamalarining holati va sozligiga alohida eʼtibor qaratsinlar;

tashkilotlarning obyektlari va uy-joy fondini yongʻinga xavfsiz holatga keltirish uchun ajratilgan mablagʻlardan qatʼiy ravishda maqsadli foydalanilishi ustidan nazorat oʻrnatilishini taʼminlasinlar;

yongʻin xavfsizligi meʼyorlari buzilishining har bir holati boʻyicha puxta tekshiruvlar oʻtkazsinlar, yongʻin roʻy berishiga yoʻl qoʻygan rahbarlarga nisbatan qonun hujjatlariga muvofiq taʼsir choralarini koʻrsinlar;

obyektlardagi yongʻin xavfsizligi boʻlinmalarini yongʻin oʻchirish texnikasi, asbob-uskunalar va anjomlar bilan taʼminlash chora-tadbirlarini koʻrsinlar;

ishchilar, xizmatchilar, taʼlim muassasalari oʻquvchilari va aholi oʻrtasida yongʻinga qarshi targʻibot oʻtkazish va yongʻin xavfsizligi chora-tadbirlarini qoʻllashni oʻrgatish ishlarini kuchaytirsinlar, jamoatchilikni yongʻinlarning oldini olish tadbirlariga keng jalb etsinlar;

oʻziga qarashli yongʻinga qarshi himoya tizimi va vositalarini, yongʻinga qarshi suv taʼminoti manbalarini (gidrantlar, rezervuarlar, suv havzalari, ichki yongʻin oʻchirish joʻmraklarini) soz holatga keltirish chora-tadbirlarini koʻrsinlar.

4. Oʻzbekiston Respublikasi Ichki ishlar vazirligi, Oʻzbekiston matbuot va axborot agentligi, Oʻzbekiston Milliy axborot agentligi, Oʻzbekiston milliy teleradiokompaniyasi, ommaviy axborot vositalari:

yongʻin xavfsizligi oyligining oʻtkazilishini ommaviy axborot vositalarida keng yoritib borsinlar, yongʻin xavfsizligi boʻyicha maxsus mavzuli videoroliklar tayyorlasinlar, ularning tadbir davomida muntazam ravishda namoyish etib borilishini taʼminlasinlar;

fuqarolarning oʻzini oʻzi boshqarish va yongʻin nazorati organlari bilan birgalikda yongʻin xavfsizligini taʼminlash masalalari uzoq vaqtdan buyon hal etilmay kelinayotgan obyektlar va aholi punktlari boʻyicha reydlar uyushtirsinlar;

homiylarning mablagʻlarini jalb etgan holda yongʻin xavfsizligi oyligining maqsadlari, vazifalari va oʻtkazilishini targʻib qiluvchi plakatlar, bukletlar va koʻrgazmali targʻibotning boshqa turlari chop etilishini tashkil qilsinlar.

5. Davlat va xoʻjalik boshqaruvi organlari rahbarlari, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari zimmasiga yongʻin xavfsizligi oyligi oʻtkazilishi uchun shaxsiy javobgarlik yuklansin.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, davlat va xoʻjalik boshqaruvi organlari hamda boshqa tashkilotlar har yili oylik tugagandan soʻng qilingan ishlar toʻgʻrisida 10 kun muddatda Oʻzbekiston Respublikasi Vazirlar Mahkamasiga axborot bersinlar.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Kommunal soha, transport, kapital qurilish va qurilish industriyasi masalalari kompleksi rahbari zimmasiga yuklatilsin.

Oʻzbekiston Respublikasining Bosh vaziri Sh. MIRZIYOYEV

Toshkent sh.

2011-yil 18-noyabr,

309-son