Xorijiy valyutada soliq boʻlmagan davlat toʻlovlarini olish va taqsimlash tartibi toʻgʻrisida (PF-635-son)

31.07.1993

Oʻzbekiston Respublikasi Prezidentining

Farmoni

Xorijiy valyutada davlat bojlari, yigʻimlari va soliq boʻlmagan boshqa toʻlovlar olishni tartibga solish va valyuta tushumlaridan samarali foydalanish maqsadida:

1. Belgilab qoʻyilsinki:

qonun hujjatlarida belgilangan hollarda, xorijiy valyutada olinadigan davlat boji, yigʻimlar va soliq boʻlmagan boshqa toʻlovlarning bir qismi vazirliklar, davlat qoʻmitalari, idoralar va xoʻjalik boshqaruvi organlari maxsus jamgʻarmalarining valyuta hisobvaraqlariga oʻtkaziladi.

vazirliklar, davlat qoʻmitalari, idoralar va xoʻjalik boshqaruvi organlari maxsus valyuta jamgʻarmalarining mablagʻlari ularning xohishiga koʻra moddiy-texnika bazasini mustahkamlash, kadrlar tayyorlash va xizmat safari xarajatlari uchun foydalaniladi.

2. “Oʻzbekiston Respublikasi Davlat Bojxona qoʻmitasi tashkil etish toʻgʻrisida” Oʻzbekiston Respublikasi Prezidentining 1992-yil 10-avgustdagi farmonining valyuta tushumlarini taqsimlashga taalluqli 10-bandi oʻz kuchini yoʻqotgan deb hisoblansin.

3. Vazirlar Mahkamasi bir hafta muddat ichida vazirliklar, davlat qoʻmitalari, idoralar va xoʻjalik boshqaruvi organlari xorijiy valyutada oladigan davlat bojlari, yigʻimlari va soliq boʻlmagan boshqa toʻlovlarni hamda ularning miqdorlari (stavkalari)ni belgilab beruvchi qaror qabul qilsin.

Oʻzbekiston Respublikasining Prezidenti I. KARIMOV

Toshkent sh.,

1993-yil 31-iyul,

PF-635-son