1993-yilning 1-iyunidan mehnat haqi, pensiyalar, stipendiyalarning, bolali oilalar ijtimoiy nafaqalarining miqdorlarini oshirish hamda respublikaning isteʼmol bozorini himoya qilish choralari toʻgʻrisida (PF-607-son)

28.05.1993

Oʻzbekiston Respublikasi Prezidentining

Farmoni

Mehnat haqini oshirish, ichki isteʼmol bozorini himoya qilish, boshqa mintaqalarga nisbatan arzonroq narxdagi mollar va buyumlar ancha miqdorda olib chiqib ketilishining oldini olish maqsadida:

1. 1993-yilning 1-iyunidan boshlab Oʻzbekiston Respublikasining hududida:

ish haqining eng oz miqdori oyiga 7500 soʻm;

fuqarolarning soliq olinmaydigan daromadlarining eng past darajasi oyiga 7500 soʻm miqdorida;

mehnat pensiyasining eng oz miqdori oyiga 8125 soʻm qilib belgilansin, hozirgi vaqtda amalda boʻlgan barcha turlardagi pensiyalarning miqdorlari 2,5 baravar oshirilsin.

2. Oliy oʻquv yurtlari talabalarining, texnikumlar va hunar-texnika bilim yurtlari oʻquvchilarining stipendiyalari 2,5 baravar koʻpaytirilsin. Talabalarning oshxonalari va bufetlarida tushlik ovqatlarning qiymatidan 50 foizli chegirmalar saqlab qolinsin.

3. Bolali oilalarning ijtimoiy nafaqalari 2 baravar oshirilsin.

4. Oʻzbekiston Respublikasining Moliya vazirligi ish haqini, pensiyalar, stipendiyalar va ijtimoiy nafaqalarni oshirishga mazkur farmonda koʻzda tutilgan sarf-xarajatlarni pul bilan taʼminlash manbalarini aniqlasin.

5. Budjetdan pul bilan taʼminlanadigan vazirliklar va idoralar, Qoraqalpogʻiston Respublikasining Vazirlar Kengashi, viloyatlar hamda Toshkent shahar hokimlari, tashkilotlar va muassasalar ushbu Farmonda belgilangan eng oz ish haqi miqdoriga asoslanib, mehnatga haq toʻlash boʻyicha yagona tarif setkasi razryadlariga muvofiq xodimlarning mansab okladlari oʻz vaqtida qaytadan hisoblab chiqilishini taʼminlasinlar.

6. Qoʻshimcha qiymatga belgilangan soliqning 6 foizi korxonalar va tashkilotlar ixtiyorida qoldirilib, ular mehnatga haq toʻlashni koʻpaytirishga sarflansin.

7. Mulkchilik shakllaridan qatʼi nazar, xoʻjalik hisobidagi korxonalarga, tashkilotlarga, muassasalarga oʻzlarining daromad manbalari hisobidan ish haqining yangi eng oz miqdorlarini joriy etish va mehnatga haq toʻlashni oshirish, daromad manbalari cheklangan taqdirda esa bank muassasalari aniq maqsadni koʻzlab beradigan imtiyozli kreditlar hisobidan oshirish tavsiya qilinsin.

Oʻzbekiston Respublikasining Markaziy banki, tijorat banklari korxonalarni, tashkilotlar va muassasalarni yillik 3 foizdan oshmaydigan toʻlov sharti bilan 45 kun muddat ichida zarur kredit mablagʻlar bilan taʼminlasinlar.

8. Oʻzbekiston Respublikasining Markaziy banki respublika korxonalariga, tashkilotlari va muassasalariga ish haqi oʻz vaqtida toʻlanishini taʼminlovchi choralar koʻrsin.

9. 1993-yilning hosilidan boshlab paxta — 4,3 baravar, chorva va sutning, shuningdek davlat buyurtmasi hisobiga sotiladigan meva-sabzavot mahsulotlari ayrim turlarining amaldagi xarid narxlari oʻrta hisobda 2 baravar oshirilsin.

1993-yil hosilidan boshlab sholi, pomidor, karam, sabzi va olmaga erkin (shartnomaviy) narxlar belgilansin.

10. 1993-yilning 1-iyunidan boshlab qatʼiy yoki tartibga solib turiladigan narxlar va tariflar boʻyicha aholiga sotiladigan oziq-ovqat hamda nooziq-ovqat mollari va xizmatlarning chegaralangan chakana narxlari oʻrta hisobda 2 baravar oshirilsin.

11. Oʻzbekiston Respublikasining Vazirlar Mahkamasi bir hafta muddat ichida mazkur Farmonning belgilangan muddatlarda roʻyobga chiqarilishini taʼminlovchi tegishli qarorlar qabul qilsin.

Oʻzbekiston Respublikasining Prezidenti I. KARIMOV

Toshkent sh.,

1993-yil 28-may,

PF-607-son