Byurokratik toʻsiqlarni bartaraf etish va ruxsat berish tartibotlarini amalga oshirishda davlat boshqaruv funksiyalarini qisqartirishga doir qoʻshimcha chora-tadbirlar toʻgʻrisida (283-son)
17.10.2011
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Byurokratik toʻsiqlarni bartaraf etish va tadbirkorlik faoliyati erkinligini yanada oshirish chora-tadbirlari toʻgʻrisida” 2011-yil 25-avgustdagi PQ-1604-son qarorini bajarish yuzasidan hamda tadbirkorlik faoliyati erkinligini cheklovchi byurokratik toʻsiqlarni bartaraf etishni davom ettirish maqsadida Vazirlar Mahkamasi qaror qiladi:
1. Oʻzbekiston Respublikasi Adliya vazirligi, Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi hamda manfaatdor vazirliklar va idoralarning tadbirkorlik faoliyati sohasidagi idoraviy normativ-huquqiy hujjatlar bilan belgilangan 1-ilovaga muvofiq ruxsat berish tartibotlarining amal qilishini 2011-yil 1-noyabrdan boshlab bekor qilish toʻgʻrisidagi taklifiga rozilik berilsin.
2. Oʻzbekiston Respublikasi Adliya vazirligi:
davlat boshqaruvi organlarining Oʻzbekiston Respublikasi Adliya vazirligida roʻyxatdan oʻtkazilmagan 2-ilovaga muvofiq roʻyxatga asosan umummajburiy tusdagi hujjatlari, ulardagi ruxsat berish tartibotlarini bekor qilgan holda, bekor qilinishini taʼminlasin;
davlat boshqaruvi organlari va mahalliy davlat hokimiyati organlari tomonidan qonun hujjatlarida nazarda tutilmagan ruxsatnomalar va ruxsat berish tartibotlari belgilanganligi aniqlanganda koʻrsatib oʻtilgan ruxsatnomalar va ruxsat berish tartibotlarini belgilangan tartibda bekor qilish choralarini koʻrsin.
3. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda qonun hujjatlariga ushbu qarordan kelib chiquvchi oʻzgartirishlar va qoʻshimchalar toʻgʻrisida bir oy muddatda Vazirlar Mahkamasiga takliflar kiritsin.
Davlat boshqaruvi organlari Oʻzbekiston Respublikasi Adliya vazirligi bilan birgalikda bir oy muddatda oʻz normativ-huquqiy hujjatlarini ushbu qarorga muvofiqlashtirsinlar.
4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2011-yil 17-oktabr,
283-son
Vazirlar Mahkamasining 2011-yil 17-oktabrdagi 283-son qaroriga 1-ILOVA
Idoraviy normativ-huquqiy hujjatlar bilan belgilangan 2011-yil 1-noyabrdan boshlab bekor qilinayotgan tadbirkorlik faoliyati sohasidagi ruxsat berish tartibotlari
ROʻYXATI
Vazirlar Mahkamasining 2011-yil 17-oktabrdagi 283-son qaroriga 2-ILOVA
Davlat boshqaruvi organlarining Oʻzbekiston Respublikasi Adliya vazirligida davlat roʻyxatidan oʻtkazilmagan umummajburiy tusdagi hujjatlari
ROʻYXATI
(Oʻzbekiston Respublikasi qonun hujjatlari toʻplami, 2011-y., 42-son, 454-modda)