I.M. Gubkin nomidagi Rossiya davlat neft va gaz universiteti Toshkent shahridagi filiali qoshida ixtisoslashtirilgan akademik litsey faoliyatini tashkil etish chora-tadbirlari toʻgʻrisida (282-son)

14.10.2011

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “I.M. Gubkin nomidagi Rossiya davlat neft va gaz universitetining Toshkent shahridagi filiali faoliyatini yanada takomillashtirish chora-tadbirlari toʻgʻrisida” 2011-yil 6-iyuldagi PQ-1569-son qarori ijrosini taʼminlash maqsadida Vazirlar Mahkamasi qaror qiladi:

1. Toshkent shahar hokimligi tomonidan Toshkent shahridagi I.M. Gubkin nomidagi Rossiya davlat neft va gaz universiteti filiali qoshidagi ixtisoslashtirilgan akademik litseyning yangi binosi va talabalarning yashashi uchun joylar qurish uchun belgilangan tartibda quyidagi manzilda umumiy maydoni 2,3 gektar yer uchastkasi ajratilganligi maʼlumot uchun qabul qilinsin: Toshkent shahri, Bektemir tumani, Ohangaron shossesi va loyihalashtirilayotgan G-60 m.

2. “Oʻzbekneftgaz” MXK 2012-yil 1-avgustga qadar quyidagi ishlarni amalga oshirsin:

Toshkent shahridagi I.M. Gubkin nomidagi Rossiya davlat neft va gaz universiteti filiali qoshidagi 360 oʻquvchi oʻrinli va 200 oʻrinli oʻquvchilar turar joyi uchun moʻljallangan ixtisoslashtirilgan akademik litseyning (keyingi oʻrinlarda — 1-obyekt) yangi binosini qurish va foydalanishga topshirish;

Toshkent shahri, Olimlar koʻchasi, 64 a-uydagi binoni (keyingi oʻrinlarda — 2-obyekt deb ataladi) rekonstruksiya qilish, binoda oʻquv binolarini kengaytirish va I.M. Gubkin nomidagi Rossiya davlat neft va gaz universitetining Toshkent shahridagi filiali talabalari uchun qoʻshimcha turar joylari yaratish;

1 va 2-son obyektlarini zarur mebel, inventar, zamonaviy oʻquv va laboratoriya asbob-uskunalari, tashkiliy texnika bilan jihozlash.

3. Belgilansinki:

a) 1-son obyektini qurish, 2-son obyektini loyihalash va rekonstruksiya qilish ishlarining buyurtmachisi etib — “Oʻztransgaz” AKning “Transgazinjiniring” UKsi;

b) 1 va 2-obyektlar boʻyicha bosh loyiha tashkiloti etib — “Oʻzogʻirsanoatloyiha” OAJ ;

v) bosh pudrat tashkiloti tomonidan:

1-obyektni qurish — “Oʻzneftgazqurilishinvest” AKning “Qashqadaryoneftgazsanoatqurilish” OAJ;

2-obyektni rekonstruksiya qilish — “Oʻzneftgazqurilishinvest” AKning “Toshneftgazqurilish” OAJ;

g) 1-obyektni qurish, 2-obyektni loyihalash va rekonstruksiya qilish hamda ularni zarur mebel, inventar, zamonaviy oʻquv va laboratoriya asbob-uskunalari, tashkiliy texnika bilan jihozlash boʻyicha moliyalashtirish manbalari — “Oʻztransgaz” AKning oʻz mablagʻlari.

4. Oʻzbekiston Respublikasi Davlat arxitektura va qurilish qoʻmitasi 1 va 2-son obyektlarning loyiha-smeta hujjatlari belgilangan tartibda ekspertizadan oʻtkazishini taʼminlasin hamda qurilish-montaj ishlari sifati ustidan arxitektura-qurilish nazoratini oʻrnatsin.

5. Belgilansinki:

Toshkent shahridagi I.M. Gubkin nomidagi Rossiya davlat neft va gaz universiteti filiali qoshidagi ixtisoslashtirilgan akademik litseyi (keyingi oʻrinlarda akademik litsey deb ataladi) faoliyatiga tashkiliy va oʻquv-metodik rahbarlik qilish Oʻrta maxsus, kasb-hunar taʼlimi markazi hamda Toshkent shahridagi I.M. Gubkin nomidagi Rossiya davlat neft va gaz universiteti filiali tomonidan amalga oshirilsin;

akademik litseyda oʻqitish Oʻzbekiston Respublikasining davlat taʼlim standartlari, oʻquv rejalari va oʻrta maxsus, kasb-hunar taʼlimi dasturlariga muvofiq oʻtkaziladi;

akademik litseyga oʻquvchilarni qabul qilish amaldagi qonun hujjatlarida belgilangan tartibda tashkil etiladi;

akademik litseyning pedagog va maʼmuriy-xoʻjalik xodimlari mehnatiga haq toʻlash, uning inshootlari kompleksini saqlash xarajatlari taʼlim sohasiga ajratiladigan budjet mablagʻlari doirasida Oʻzbekiston Respublikasi Davlat budjeti mablagʻlari hisobidan amalga oshiriladi;

I.M. Gubkin nomidagi Rossiya davlat neft va gaz universitetining Toshkent shahridagi filiali akademik litseyda oʻqitishga yuqori malakali, tajribali oʻqituvchilarni jalb etishga koʻmaklashadi.

6. Oʻzbekiston Respublikasi Vazirlar Mahkamasi huzuridagi Davlat test markazi Oʻzbekiston Respublikasi Oliy va oʻrta maxsus taʼlim vazirligi bilan birgalikda akademik litseyda oʻquv jarayonini tashkil etish sifatini nazorat qilish, shuningdek, uning oʻqituvchilar tarkibini belgilangan tartibda attestatsiyadan oʻtkazish vazifalari yuklatilsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari G.I. Ibragimov va A.N. Aripov zimmasiga yuklatilsin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2011-yil 14-oktabr,

282-son