Bolalarni tarbiyalashni takomillashtirishga, sogʻlom va barkamol avlodni shakllantirishga doir qoʻshimcha chora-tadbirlar toʻgʻrisida (280-son)

14.10.2011

Oʻzbekiston Respublikasi Vazirlar Mahkamasining

qarori

Bolalarni tarbiyalashni takomillashtirish, sogʻlom va barkamol avlodni shakllantirish boʻyicha aniq maqsadga yoʻnaltirilgan qoʻshimcha chora-tadbirlar kompleksini amalga oshirishni davom ettirish, ushbu yoʻnalishda davlat, nodavlat notijorat tashkilotlar va mahalliy hokimiyat organlarining saʼy-harakatlarini muvofiqlashtirish maqsadida Vazirlar Mahkamasi qaror qiladi:

1. Bolalarni tarbiyalashni takomillashtirishga, sogʻlom va barkamol avlodni shakllantirishga doir qoʻshimcha chora-tadbirlar rejasi (keyingi oʻrinlarda Qoʻshimcha chora-tadbirlar rejasi deb ataladi) 1-ilovaga muvofiq tasdiqlansin, rejada quyidagilar nazarda tutiladi:

bolalar farovonligini taʼminlash boʻyicha normativ-huquqiy bazani takomillashtirish, kamol topayotgan yosh avlodning manfaatlarini himoya qilish boʻyicha amalga oshirilayotgan chora-tadbirlarni keng yoritish;

onalar va bolalar salomatligini muhofaza qilishni kuchaytirish, sogʻlom turmush tarzini shakllantirish;

bolalarga taʼlim berish, ularni tarbiyalash va voyaga yetkazish sifatini oshirish;

oilada sogʻlom maʼnaviy-axloqiy muhitni shakllantirish, bolalarni tarbiyalash uchun munosib shart-sharoitlar yaratish;

ijtimoiy nochor bolalarning huquq va manfaatlarini taʼminlash;

bolalar oʻrtasida qonun buzilishlarining oldini olish va odil sudlov sohasida bola manfaatlarini taʼminlash.

2. Qoʻshimcha chora-tadbirlar rejasining bajarilishini tashkil etish 2-ilovaga* muvofiq Idoralararo komissiyaga yuklansin.

* 2-ilova berilmaydi.

3. Qoʻshimcha chora-tadbirlar rejasini amalga oshirish boʻyicha Idoralararo komissiya (A.N. Aripov):

respublika organlari, mahalliy davlat hokimiyati organlari va boshqa tashkilotlar darajasida mazkur Qoʻshimcha chora-tadbirlar rejasi boʻlimlari va bandlarining toʻliq va oʻz vaqtida bajarilishiga doir ishlarning muvofiqlashtirilishini tashkil etsin, Qoʻshimcha chora-tadbirlar rejasiga kiritilgan tadbirlarning amalga oshirilishi yuzasidan qatʼiy nazorat oʻrnatsin;

ikki hafta muddatda manfaatdor vazirliklar, idoralar, nodavlat notijorat tashkilotlar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan hududiy va tarmoq ishlar rejalari ishlab chiqilishi va qabul qilinishini taʼminlasin;

har chorak yakuni boʻyicha Qoʻshimcha chora-tadbirlar rejasi tadbirlarining bajarilishi toʻgʻrisida tizimli tahlilni amalga oshirsin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, tegishli vazirliklar va idoralar Qoraqalpogʻiston Respublikasi Vazirlar Kengashi Raisining, hokimlarning yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosarlari boshchilik qiladigan Qoʻshimcha chora-tadbirlar rejasini amalga oshirish boʻyicha hududiy guruhlar hamda vazirliklar va idoralar rahbarlari oʻrinbosarlari boshchilik qiladigan tarmoq guruhlarini tashkil etsinlar, ularga Qoʻshimcha chora-tadbirlar rejasida nazarda tutilgan tadbirlarning soʻzsiz amalga oshirilishini yuklasinlar.

5. Oʻzbekiston matbuot va axborot agentligi, Milliy axborot agentligi, Oʻzbekiston milliy teleradiokompaniyasi, ommaviy axborot vositalariga Qoʻshimcha chora-tadbirlar rejasi tadbirlarining amalga oshirilishini muntazam ravishda yoritib borishni tashkil qilish, mahalliy davlat hokimiyati organlari, nodavlat notijorat tashkilotlarning Qoʻshimcha chora-tadbirlar rejasida nazarda tutilgan tadbirlarni amalga oshirishdagi muayyan hissasi va ishtiroki toʻgʻrisida aholini xabardor qilish tavsiya etilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2011-yil 14-oktabr,

280-son

Vazirlar Mahkamasining 2011-yil 14-oktabrdagi 280-son qaroriga 1-ILOVA

Bolalarni tarbiyalashni takomillashtirishga, sogʻlom va barkamol avlodni shakllantirishga doir qoʻshimcha chora-tadbirlar

REJASI

(Oʻzbekiston Respublikasi qonun hujjatlari toʻplami, 2011-y., 42-son, 452-modda; 2017-y., 9-son, 132-modda)