146-modda. Sudning oʻz yuritishiga qabul qilib olgan ishni boshqa sudga oʻtkazishi
Oʻzbekiston Respublikasining Fuqarolik protsessual kodeksi · Sana: 30.08.1997 · Amalda
Sud sudlovga taalluqlilik qoidalariga rioya qilgan holda oʻzining yuritishiga qabul qilib olgan ishni, garchi keyinchalik bu ish boshqa sudning sudloviga taalluqli boʻlib qolsa ham, mazmunan hal qilishi lozim.
Sud quyidagi hollarda ishni koʻrish uchun boshqa sudga oʻtkazadi:
1) muayyan ish boshqa sudda, xususan dalillarning koʻpchilik qismi joylashgan yerdagi sudda oʻz vaqtida va har tomonlama koʻrib chiqiladi deb hisoblasa;
2) ilgari turar joyi nomaʼlum boʻlgan javobgar ishni oʻzi yashab turgan joydagi sudga oʻtkazishni iltimos qilsa;
3) bir yoki bir necha sudya rad qilingach, bu sudda ularni almashtirish mumkin boʻlmay qolsa;
4) ish muayyan sudda koʻrilayotganida bu ish sudlovga taalluqlilik qoidalari buzilgan holda yuritishga qabul qilinganligi maʼlum boʻlib qolsa.