Namangan muhandislik-iqtisodiyot institutini namangan muhandislik-texnologiya institutiga aylantirish toʻgʻrisida (212-son)

25.07.2011

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oliy taʼlim muassasalarining moddiy-texnika bazasini mustahkamlash va yuqori malakali mutaxassislar tayyorlash sifatini tubdan yaxshilash chora-tadbirlari toʻgʻrisida” 2011-yil 20-maydagi PQ-1533-son qarorini bajarish yuzasidan, bozor iqtisodiyotining zamonaviy talablariga javob beradigan yuqori malakali mutaxassislar tayyorlashni yanada takomillashtirish, shuningdek respublika, shu jumladan toʻqimachilik va yengil sanoat ishlab chiqarish tarmoqlarining kadrlar resurs bazasini mustahkamlash maqsadida Vazirlar Mahkamasi qaror qiladi:

1. Namangan muhandislik-iqtisodiyot instituti Namangan muhandislik-texnologiya institutiga aylantirilsin.

2. Quyidagilar Namangan muhandislik-texnologiya institutining asosiy vazifalari etib belgilansin:

toʻqimachilik, yengil sanoat va matbaa sanoati tarmoqlari uchun texnologik mashina va asbob-uskunalar, kimyo texnologiyalari, texnologik jarayonlarni avtomatlashtirish gulchilik yoʻnalishlari boʻyicha yuqori malakali mutaxassislar tayyorlash;

institut faoliyatining asosiy yoʻnalishlari boʻyicha amaliy ilmiy-tadqiqot ishlarini roʻyobga chiqarish uchun zamonaviy ilmiy-laboratoriya bazasini shakllantirish;

umumtexnika va texnika taʼlim yoʻnalishlari boʻyicha yuqori malakali ilmiy-pedagog kadrlar tayyorlash, oʻquv jarayonini ilmiy-tadqiqot va ishlab chiqarish faoliyati bilan chuqur integratsiyalash;

yoshlarni milliy, vatanparvarlik va fidoiylik gʻoyalariga sadoqat ruhida tarbiyalash, maʼnaviy boy, har tomonlama kamol topgan, mustaqil dunyoqarashga va mustaqil fikrlashga ega boʻlgan shaxsni tarbiyalash.

3. Namangan muhandislik-texnologiya institutining oʻquv jarayonini tashkil etishni takomillashtirish, professor-oʻqituvchilar tarkibini toʻldirish va zarur moddiy-texnika bazasini yaratish chora-tadbirlari dasturi ilovaga muvofiq tasdiqlansin.

4. Oʻzbekiston Respublikasi Oliy va oʻrta maxsus taʼlim vazirligi:

Oʻzbekiston Respublikasi Iqtisodiyot vazirligi, Davlat test markazi, Mehnat va aholini ijtimoiy muhofaza qilish vazirligi bilan birgalikda har yili Namangan muhandislik-texnologiya institutiga oʻqishga qabul qilish kvotalarini shakllantirishda tarmoqlarning mutaxassislarga boʻlgan ehtiyojini hisobga olgan holda oliy taʼlim muassasasining tegishli sohalariga muvofiq mutaxassislar tayyorlash yoʻnalishlarini nazarda tutsin;

bir oy muddatda Namangan muhandislik-texnologiya institutining ustavini va tuzilmasini belgilangan tartibda tasdiqlasin;

2011/2012 oʻquv yili boshlangungacha Namangan muhandislik-texnologiya institutining taʼlim yoʻnalishlari va ixtisosliklari boʻyicha oʻquv rejalari hamda dasturlarini davlat taʼlim standartlariga muvofiq tasdiqlasin;

2012/2013 oʻquv yilidan boshlab muhandislik texnologiyalari sohasida tasdiqlangan asosiy taʼlim yoʻnalishlari boʻyicha magistrlar tayyorlashni tashkil etish uchun tegishli oʻquv-laboratoriya bazasini va ilmiy-pedagog xodimlarni tayyorlash chora-tadbirlarini koʻrsin;

Namangan muhandislik-texnologiya institutining sohasi oʻzgarganligini hisobga olgan holda uning muhandis-pedagog kadrlari malakasini oshirish va qayta tayyorlash istiqbol rejasini tasdiqlasin.

5. Oziq-ovqat sanoati korxonalari uyushmasiga kadrlarning boshqa asosiy buyurtmachilari bilan birgalikda institutning oʻquv-ishlab chiqarish va laboratoriya bazasini tashkil qilish va mustahkamlashda koʻmaklashish tavsiya etilsin.

6. Oʻzbekiston Respublikasi Oliy va oʻrta maxsus taʼlim vazirligi idoraviy normativ-huquqiy hujjatlarni ushbu qarorga muvofiqlashtirsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Bosh vazirining oʻrinbosari A.N.Aripov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2011-yil 25-iyul,

212-son

Vazirlar Mahkamasining 2011-yil 25-iyuldagi 212-son qaroriga ILOVA

Namangan muhandislik-texnologiya institutining oʻquv jarayonini takomillashtirish, professor-oʻqituvchilar tarkibini toʻldirish va zarur moddiy-texnika bazasini yaratish chora-tadbirlari

dasturi

(ilova Oʻzbekiston Respublikasi Vazirlar Mahkamasining 2016-yil 5-apreldagi 103-sonli qarori tahririda — OʻR QHT, 2016-y., 14-son, 132-modda)