Aholini zilzilalar oqibatida yuzaga kelgan favqulodda vaziyatlarda (tabiiy va texnogen tusdagi) harakat qilishga tayyorlash kompleks dasturini tasdiqlash toʻgʻrisida (208-son)

19.07.2011

Oʻzbekiston Respublikasi Vazirlar Mahkamasining

qarori

Tabiiy va texnogen tusdagi favqulodda vaziyatlarda aholining tezkorlik bilan harakat qilishi, bunday vaziyatlardan aholini ogohlantirish va unga tayyorlash tizimining holatini yanada takomillashtirish maqsadida Vazirlar Mahkamasi qaror qiladi:

1. Aholini zilzilalar oqibatida yuzaga kelgan favqulodda vaziyatlarda (tabiiy va texnogen tusdagi) harakat qilishga tayyorlash kompleks dasturi (keyingi oʻrinlarda Dastur deb ataladi) ilovaga muvofiq tasdiqlansin.

2. Quyidagi ustuvor tadbirlarni amalga oshirish Dasturning asosiy vazifalari etib belgilansin:

aholining barcha qatlamlarini zilzilalar oqibatida yuzaga kelgan favqulodda vaziyatlarda (tabiiy va texnogen tusdagi) harakat qilishga tayyorlash tizimi samaradorligini oshirish;

aholini oʻqitish bilan qamrab olishni kengaytirish;

koʻngilli qutqaruv drujinalari tuzish va ular faoliyatini tashkil etish;

zilzila oqibatlarining seysmik xavfi darajasini kamaytirish;

aholiga yuzaga kelayotgan seysmik vaziyatni baholash koʻnikmalarini singdirish va zilzila paytida mutanosib tarzda harakat qilish uchun shart-sharoitlarni taʼminlash;

taʼlim muassasalarining oʻquvchilari va talabalarini favqulodda vaziyatlarda harakat qilishga tayyorlashning kompleks tizimini ishlab chiqish.

3. Davlat boshqaruvi organlari rahbarlari, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari, shuningdek boshqa jalb etilgan tashkilotlarning rahbarlari tasdiqlangan Dasturda nazarda tutilgan tadbirlarni oʻz vaqtida va toʻliq amalga oshirish mexanizmlari ishlab chiqilishini, tadbirlar bajarilishi monitoringi olib borilishi va nazorat qilinishini taʼminlasinlar.

4. Belgilansinki, Dastur tadbirlarini amalga oshirish uchun sarf-xarajatlar har yili tashkilotlarga ajratiladigan budjet mablagʻlari doirasida, shuningdek moliyalashtirishning qonun hujjatlarida taqiqlanmagan boshqa manbalari hisobiga amalga oshiriladi.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.A. Xoʻjayev zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2011-yil 19-iyul,

208-son

Vazirlar Mahkamasining 2011-yil 19-iyuldagi 208-son qaroriga ILOVA

Aholini zilzilalar oqibatida yuzaga kelgan favqulodda vaziyatlarda (tabiiy va texnogen tusdagi) harakat qilishga tayyorlash

kompleks dasturi

(ilova Oʻzbekiston Respublikasi Vazirlar Mahkamasining 2017-yil 12-sentabrdagi 712-sonli qarori tahririda — OʻR QHT, 2017-y., 37-son, 996-modda)