Tovarlar importini bojxona-tarif jihatdan boshqarishni takomillashtirishga oid qoʻshimcha chora-tadbirlar toʻgʻrisida (PQ-1560-son)
28.06.2011
Oʻzbekiston Respublikasi Prezidentining
Qarori
Oʻzbekiston Respublikasi hududiga isteʼmol tovarlarining ayrim turlarini olib kirishni yanada optimallashtirish va xalqaro amaliyotda umumeʼtirof etilgan bojxona bojlarini hisoblash usullarini joriy qilish maqsadida:
1. 2011-yilning 1-avgustidan boshlab tovarlarning ayrim turlariga import boji stavkalari ilovaga* muvofiq oʻrnatilsin.
*Ilova rus tilidagi matnda berilgan.
2. Belgilansinki, 2011-yilning 1-iyuliga qadar “vaqtinchalik saqlash” bojxona rejimida joylashtirilgan tovarlarni 2011-yilning 1-oktabrigacha erkin muomalaga chiqarishda Oʻzbekiston Respublikasi Prezidentining “Tashqi iqtisodiy faoliyatni tartibga solish borasidagi qoʻshimcha chora-tadbirlar toʻgʻrisida” 2009-yil 5-avgustdagi PQ-1169-sonli qarori bilan tasdiqlangan stavkalar qoʻllanadi.
2011-yilning 1-oktabridan boshlab “vaqtinchalik saqlash” rejimidan erkin muomalaga chiqariladigan mazkur tovarlarga ushbu qaror bilan tasdiqlangan import bojxona bojlari qoʻllaniladi.
3. Oʻzbekiston Respublikasi Davlat bojxona qoʻmitasi olib kirilayotgan tovarlarning bojxona rasmiylashtiruvi boʻyicha oʻrnatilgan tartibga qatʼiy rioya etilishini taʼminlasin, ularning qonunga xilof ravishda olib kirilishiga yoʻl qoʻyilmasligi va bojxona toʻlovlari toʻgʻri hisoblanishi ustidan taʼsirchan nazorat oʻrnatsin.
4. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Oʻzbekiston Respublikasining manfaatdor vazirliklari va idoralari bilan birgalikda bir oy muddatda qonun hujjatlariga mazkur qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.
5. Ushbu qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.
Oʻzbekiston Respublikasi Prezidenti I. KARIMOV
Toshkent sh.,
2011-yil 28-iyun,
PQ-1560-son