Choʻchqalar dizenteriyasi va parrandalarning bakterial kasalliklarini davolash va oldini olishda tilovet 25 % (kukun) preparatini qoʻllash boʻyicha qoʻllanmani tasdiqlash toʻgʻrisida (60-son)
19.03.2008
Oʻzbekiston Respublikasi Qishloq va suv xoʻjaligi vazirligi huzuridagi davlat veterinariya bosh boshqarmasi boshligʻining
buyrugʻi
[Oʻzbekiston Respublikasi Adliya vazirligi bilan kelishilgan holda texnik hujjat deb topilgan, 2008-yil 2-aprel 20-15-89/11-son]
Oʻzbekiston Respublikasining “Veterinariya toʻgʻrisida”gi Qonuni talablarini bajarish maqsadida Oʻzbekiston Respublikasi Vazirlar Mahkamasining 2007-yil 21-dekabrdagi 03-38-144-sonli bayoniga muvofiq buyuraman:
1. “Choʻchqalar dizenteriyasi va parrandalarning bakterial kasalliklarini davolash va oldini olishda tilovet 25 % (kukun) preparatini qoʻllash boʻyicha Qoʻllanma” ilovaga muvofiq tasdiqlansin.
2. Mazkur hujjat Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.
3. Mazkur Qoʻllanma tasdiqlanishi munosabati bilan Oʻzbekiston Respublikasi Davlat veterinariya bosh boshqarmasi tomonidan 2007-yil 14-sentabrda tasdiqlangan “Choʻchqalar dizenteriyasi va parrandalarning bakterial kasalliklarini davolash va oldini olishda tilovet 25 % (kukun) preparatini qoʻllash boʻyicha Qoʻllanma” oʻz kuchini yoʻqotgan deb hisoblansin.
4. Mazkur buyruqning ijrosini nazorat qilishni oʻz zimmamda qoldiraman.
Boshliq v.v.b. M. YUSUPOV
Toshkent sh.,
2008-yil 19-mart,
60-son
Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining 2008-yil 19-martdagi 60-sonli buyrugʻi bilan “TASDIQLANGAN”
Choʻchqalar dizenteriyasi va parrandalarning bakterial kasalliklarini davolash va oldini olishda tilovet 25 % (kukun) preparatini qoʻllash boʻyicha
Qoʻllanma
I. Umumiy maʼlumotlar
1. Tilovet 25 % (Tylovetum 25 %) — 1 g tarkibiga 250 mg tilozin fosfat antibiotiki va yordamchi komponentlar kiruvchi preparat.
2. Tashqi koʻrinishiga koʻra oʻziga xos hidli, och jigarrangli oʻrtacha yirik amorf kukun.
3. Preparat qoplarga 20 kg dan qadoqlanadi.
4. Tilovet 25 % B roʻyxati boʻyicha quruq, yorugʻlik tushmaydigan joyda +15 dan + 25°S gacha haroratda saqlanadi.
Preparatning yaroqlilik muddati saqlash shartlariga rioya qilinganda tayyorlangan kunidan boshlab 2 yil.
II. Farmakologik xususiyatlari
5. Tilozin makrolidli antibiotik boʻlib, grammusbat va baʼzi grammanfiy mikroorganizmlarga (kokklar, klostridiyalar, erizipelotrikslar, pasterellalar, kampilobakteriyalar, spiroxetalar, leptospiralar, brutsellalar, neyseriyalar, rikketsiyalar, gemofilyuslar, xlamidiyalar, hamda mikoplazmalarga) nisbatan faol taʼsir koʻrsatadi.
6. Preparat ribosomalar bosqichida oqsil sintezlariga toʻsqinlik qilish orqali (50S-ribosoma subirliklarini uzluksiz bogʻlash yoʻli bilan) bakteriostatik taʼsir koʻrsatadi.
7. Preparat peroral ravishda qoʻllanganda oshqozon-ichak traktidan yaxshi soʻriladi, hayvonlarning deyarli barcha organ va toʻqimalariga tarqaladi. Organizmdan asosan safro va siydik orqali, sogʻin sigirlarda — sut bilan ajralib chiqadi.
8. Preparat tetratsiklinlar, sulfanilamidlar, nitrofuranli va nitroimidazolli birikmalar, spektinomitsin bilan birgalikda qoʻllanilishi mumkin.
III. Qoʻllash tartibi
9. Tilovet 25 % choʻchqalar dizenteriyasi, parrandalarning tilozinga taʼsirchan mikoplazmalar va spiroxetlar qoʻzgʻatgan kasalliklarini davolash va oldini olish uchun qoʻllaniladi.
10. Preparat ichga, ozuqaga aralashtirilgan holda, quyidagi dozalarda qoʻllaniladi:
choʻchqalar dizenteriyasini oldini olish uchun, 25 kg gacha vazndagi choʻchqalarga — 1 tonna ozuqaga 400 g, 25 dan 45 kg gacha vazndagi choʻchqalarga — 1 tonna ozuqaga 160 g, 45 kg dan ortiq vaznlilarga — 1 tonna ozuqaga 80 g dan 10 kun davomida qoʻllaniladi;
choʻchqa bolalarining dizenteriyasini davolash uchun — dastlab 4—8 litr ichimlik suviga 1,0 g tilozin tartrat (900000—940000 ME) 3—5 kun mobaynida, soʻngra 1 tonna ozuqaga 400 g tilovet 25 %, 10 kun davomida qoʻllaniladi;
broyler-joʻjalari va kurka bolalarining surunkali respirator kasalliklari va infeksion sinovitining oldini olishda — 1 tonna ozuqaga 3,2 — 4 kg miqdorida hayotining 3—5 kunlarida va toʻrtinchi haftasida 2 kun davomida qoʻllaniladi;
parrandalarning borreliozini davolash va oldini olishda — 1 tonna ozuqaga 2 kg miqdorida 5—7 kun davomida beriladi.
11. Qoʻshimcha asoratlar. Kamdan-kam holatlarda preparat allergik taʼsirlar qoʻzgʻatishi mumkin.
12. Qarshi koʻrsatmalar. Tuxumlarini isteʼmol qilinuvchi kurk tovuqlarga qoʻllanilmaydi. Preparatni bentonit bilan birgalikda qoʻllash tavsiya etilmaydi.
13. Parrandalarni va choʻchqalarni soʻyishga preparat qoʻllanilgandan keyin kamida 5 kun oʻtgach ruxsat etiladi. Belgilangan muddatdan avval soʻyilgan parranda va hayvonlarning goʻshtidan goʻshtxoʻr hayvonlarga yemish sifatida yoki goʻsht suyak uni ishlab chiqarishda foydalaniladi.
IV. Shaxsiy profilaktika choralari
14. Preparat bilan ishlaganda shaxsiy gigiyena va texnika xavfsizligining umumiy qoidalariga rioya etish kerak.
15. Preparat bilan barcha ishlar maxsus kiyim va individual himoya vositalaridan foydalangan holda amalga oshiriladi (rezina qoʻlqoplar, himoya koʻzoynaklari, respirator).
16. Preparat bilan ishlash vaqtida chekish, ichish va ovqatlanish man etiladi.
V. Noroziliklarni bayon etish tartibi
17. Preparat ushbu Qoʻllanma talablariga muvofiq kelmagan taqdirda, uning qoʻllanilishi toʻxtatilib, bu haqida Oʻzbekiston veterinariya preparatlari davlat ilmiy nazorat laboratoriyasiga quyidagi manzil boʻyicha murojaat qilinadi: 100178, Toshkent sh., A.Yunusov koʻchasi, 1a uy. Tel./faks: 228-76-14, 229-30-47. E-mail: [email protected]. Bir vaqtning oʻzida laboratoriyaga preparatning laboratoriya bilan kelishilgan miqdordagi ochilmagan oʻramlari va preparatning qoʻllanmaga muvofiq kelmasligining toʻliq tavsifi joʻnatiladi.