Sogʻin sigirlar, qoʻy va echkilarning mastitlarini davolashda neotil (intramammar shpritslar) preparatini qoʻllash boʻyicha qoʻllanmani tasdiqlash toʻgʻrisida (58-son)
19.03.2008
Oʻzbekiston Respublikasi Qishloq va suv xoʻjaligi vazirligi huzuridagi davlat veterinariya bosh boshqarmasi boshligʻining
buyrugʻi
[Oʻzbekiston Respublikasi Adliya vazirligi bilan kelishilgan holda texnik hujjat deb topilgan, 2008-yil 2-aprel 20-15-89/11-son]
Oʻzbekiston Respublikasining “Veterinariya toʻgʻrisida”gi Qonuni talablarini bajarish maqsadida Oʻzbekiston Respublikasi Vazirlar Mahkamasining 2007-yil 21-dekabrdagi 03-38-144-sonli bayoniga muvofiq buyuraman:
1. “Sogʻin sigirlar, qoʻy va echkilarning mastitlarini davolashda neotil (intramammar shpritslar) preparatini qoʻllash boʻyicha Qoʻllanma” ilovaga muvofiq tasdiqlansin.
2. Mazkur hujjat Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.
3. Mazkur Qoʻllanma tasdiqlanishi munosabati bilan Oʻzbekiston Respublikasi Davlat veterinariya bosh boshqarmasi tomonidan 2007-yil 14-sentabrda tasdiqlangan “Sogʻin sigirlar, qoʻy va echkilarning mastitlarini davolashda neotil (intramammar shpritslar) preparatini qoʻllash boʻyicha Qoʻllanma” oʻz kuchini yoʻqotgan deb hisoblansin.
4. Mazkur buyruqning ijrosini nazorat qilishni oʻz zimmamda qoldiraman.
Boshliq v.v.b. M. YUSUPOV
Toshkent sh.,
2008-yil 19-mart,
58-son
Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining 2008-yil 19-martdagi 58-sonli buyrugʻi bilan “TASDIQLANGAN”
Sogʻin sigirlar, qoʻy va echkilarning mastitlarini davolashda neotil (intramammar shpritslar) preparatini qoʻllash boʻyicha
Qoʻllanma
I. Umumiy maʼlumotlar
1. Neotil (Neotyl) — tarkibiga faol taʼsir etuvchi moddalari sifatida — tilozin bazasi va neomitsin sulfat, hamda yordamchi komponentlar (dimetilsulfoksid, suvsiz lanolin, vazelin va suyuq parafin) kiruvchi kompleks preparat.
2. Tashqi koʻrinishiga koʻra oʻziga xos hidli, och-sariq rangga ega boʻlgan gomogen malhamsimon massa.
3. Neotil tarkibida 0,25 g (250000 IYE) tilozin baza va 0,1 g (100000 IYE) neomitsin sulfat boʻlgan 10 grammli plastmassa intramammar shpritslarga qadoqlanib, 12 donadan klishelangan karton qutilarga joylanadi.
4. Preparat yopiq, quyosh nurlaridan himoyalangan, bolalar qoʻli yetmaydigan joyda, 15 — 30oS haroratda saqlanadi.
Preparatning yaroqlilik muddati saqlash shartlariga rioya qilinganda tayyorlangan kunidan boshlab 2 yil.
II. Farmakologik xususiyatlari
5. Tilozin grammusbat va grammanfiy mikroorganizmlarga (strepto, stafilo-va mikrokokklar, korinebakteriyalar, mikoplazmalar, spiroxetlar va boshq.); neomitsin — grammanfiy mikroorganizmlarga (kolibakteriyalar, proteus psevdomonas) nisbatan faol.
Har ikkala antibiotik oʻzlarining bakteriyalarga qarshi taʼsir koʻlamini oʻzaro toʻldirib turadi.
III. Qoʻllash tartibi
6. Neotil sigir, qoʻy va echkilarning sut berish davridagi klinik va subklinik mastitlarini davolash maqsadida qoʻllaniladi.
7. Klinik mastitlarda preparat sut bezlaridagi avval suti butunlay sogʻib olingan va antiseptik ishlov berilgan elinning zararlangan qismiga quyidagi dozalarda yuboriladi: sigirlarga — bitta shprits tarkibi, qoʻy va echkilarga — bitta shpritsning yarmi yuboriladi. Zararlanish darajasiga qarab 4 — 10 — 12 soatdan soʻng, elinning kasallangan qismidagi sut sogʻib tashlanadi va preparat qayta yuboriladi.
Preparatni qoʻllash hayvon batamom sogʻayguncha davom ettiriladi (odatda 3 — 5 kun davomida).
8. Sut berish davridagi subklinik mastitlarda preparat yuqorida koʻrsatilgan dozalarda sigir, qoʻy va echkilar elinining zararlangan choragiga, kechqurun sutni sogʻib olingandan keyin qoʻllaniladi. Ertasiga ertalabki sogʻishdan keyin preparat yana yuboriladi va ushbu muolaja kun davomida har 3-4 soatda takrorlanadi. Bir sutkadan soʻng kechqurun preparatni yana qaytadan qoʻllaniladi.
9. Davolash davrida va preparat soʻnggi marta qoʻllanilgandan keyin 72 soat davomida sutni (elinning sogʻlom qismlaridan sogʻilgan) isteʼmol qilishga yoʻl qoʻyilmaydi. Elinning kasallangan qismidagi sutni alohida idishga sogʻib olinadi va yaroqsizlantiriladi, sogʻlom qismidan sogʻilgan sutni qaynatib, soʻngra hayvonlarga beriladi.
Hayvonlarni soʻyishga preparat qoʻllanilgandan 2 kun oʻtgach ruxsat etiladi. Belgilangan muddatdan avval soʻyilgan goʻshtdan goʻshtxoʻr hayvonlarga yemish sifatida yoki goʻsht suyak uni ishlab chiqarishda foydalaniladi.
IV. Noroziliklarni bayon etish tartibi
10. Preparat ushbu Qoʻllanma talablariga muvofiq kelmagan taqdirda, uning qoʻllanilishi toʻxtatilib, bu haqida Oʻzbekiston veterinariya preparatlari davlat ilmiy nazorat laboratoriyasiga quyidagi manzil boʻyicha murojaat qilinadi: 100178, Toshkent sh., A.Yunusov koʻchasi, 1a uy. Tel./faks: 228-76-14, 229-30-47. E-mail: [email protected]. Bir vaqtning oʻzida laboratoriyaga preparatning laboratoriya bilan kelishilgan miqdordagi ochilmagan oʻramlari va preparatning qoʻllanmaga muvofiq kelmasligining toʻliq tavsifi joʻnatiladi.