Granulin ® malhami (maz) preparatini veterinariyada qoʻllash boʻyicha qoʻllanmani tasdiqlash toʻgʻrisida (49-son)

19.03.2008

Oʻzbekiston Respublikasi Qishloq va suv xoʻjaligi vazirligi huzuridagi davlat veterinariya bosh boshqarmasi boshligʻining

buyrugʻi

[Oʻzbekiston Respublikasi Adliya vazirligi bilan kelishilgan holda texnik hujjat deb topilgan. 2008-yil 2-aprel 20-15-89/11-son]

Oʻzbekiston Respublikasining “Veterinariya toʻgʻrisida”gi Qonuni talablarini bajarish maqsadida Oʻzbekiston Respublikasi Vazirlar Mahkamasining 2007-yil 21-dekabrdagi 03-38-144-sonli bayoniga muvofiq buyuraman:

1. “Granulin® malhami (maz) preparatini veterinariyada qoʻllash boʻyicha Qoʻllanma” ilovaga muvofiq tasdiqlansin.

2. Mazkur hujjat Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.

3. Mazkur Qoʻllanma tasdiqlanishi munosabati bilan Oʻzbekiston Respublikasi Davlat veterinariya bosh boshqarmasi tomonidan 2007-yil 14-sentabrda tasdiqlangan “Granulin® malhami (maz) preparatini veterinariyada qoʻllash boʻyicha Qoʻllanma” oʻz kuchini yoʻqotgan deb hisoblansin.

4. Mazkur buyruqning ijrosini nazorat qilishni oʻz zimmamda qoldiraman.

Boshliq v.v.b. M. YUSUPOV

Toshkent sh.,

2008-yil 19-mart,

49-son

Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining 2008-yil 19-martdagi 49-sonli buyrugʻi bilan “TASDIQLANGAN”

Granulin ® malhami (maz) preparatini veterinariyada koʻllash boʻyicha

Qoʻllanma

I. Umumiy maʼlumotlar

1. Granulin® malhami — 100 g tarkibida faol taʼsir etuvchi moddalari sifatida — 1,0 g etakridin laktat, 1,0 g akriflavin xlorid, 1,0 g metiltionin xlorid, 1,0 g salitsil kislotasi va yordamchi komponentlari sifatida yung yogʻi, yumshoq parafin, tozalangan suvi boʻlgan preparat.

2. Preparat tashqi koʻrinishiga koʻra alyuminiy tubalarga 50 g dan qadoqlangan, toʻq yashil rangli, gomogen malhamli massa.

3. Granulin® malhami xona haroratida (15—25°S), yorugʻlik tushmaydigan, bolalar qoʻli yetmaydigan joyda saqlanadi.

Preparatning yaroqlilik muddati saqlash shartlariga rioya qilinganda tayyorlangan kunidan boshlab 5 yil.

II. Farmakologik xususiyatlari

4. Granulin® malhami antiseptik taʼsir koʻrsatadi. Zararlangan toʻqimalarning granulatsiyasi va epitelizatsiyasini tezlashtiradi hamda keratoplastik taʼsir koʻrsatadi, yalligʻlanish va ogʻriq taʼsirlarini kamaytiradi.

III. Qoʻllash tartibi

5. Granulin® malhami yangi infeksiyalangan jarohatlar va lat yeyishlarda, yara va fistulalarda, hoʻl ekzemalarda qoʻllaniladi.

6. Preparat jarohat yuzasiga yoki teri yuzasiga surtiladi. Malham avval xirurgik ishlov berilgan, jarohatlangan joylarga har kuni yoki kunora surtiladi. Hoʻllanib turuvchi yara va ekzemalarda terining jarohatlangan qismi dastlab yuviladi va quritiladi.

7. Qarshi koʻrsatmalar. Preparat tarkibiga kiruvchi komponentlarga oʻta taʼsirchanlik. Qoʻzgʻatuvchi taʼsiri tufayli koʻz konyuktivasiga qoʻllash tavsiya etilmaydi.

8. Qoʻshimcha asoratlar. Malham surtilgan joyda giperemiya va terining yashilsimon boʻlib qolish hollari kuzatiladi. Fotosensibilizatsiyani chaqirishi mumkin.

9. Hayvonlarni soʻyish va chorvachilik mahsulotlaridan foydalanishga cheklovlarsiz yoʻl qoʻyiladi.

IV. Maxsus ehtiyotkorlik choralari

10. Preparat, uning qoldiqlari va oʻrami atrof muhitga zarar yetkazmaydi.

V. Noroziliklarni bayon etish tartibi

11. Preparat ushbu Qoʻllanma talablariga muvofiq kelmagan taqdirda, uning qoʻllanilishi toʻxtatilib, bu haqida Oʻzbekiston veterinariya preparatlari davlat ilmiy nazorat laboratoriyasiga quyidagi manzil boʻyicha murojaat qilinadi: 100178, Toshkent sh., A.Yunusov koʻchasi, 1a uy. Tel./faks: 228-76-14, 229-30-47. E-mail: [email protected]. Bir vaqtning oʻzida laboratoriyaga preparatning laboratoriya bilan kelishilgan miqdordagi ochilmagan oʻramlari va preparatning qoʻllanmaga muvofiq kelmasligining toʻliq tavsifi joʻnatiladi.