Hamkorlik va munosabatlar asoslari toʻgʻrisida

05.10.2009

Oʻzbekiston Respublikasi bilan Oʻmon Sultonligi oʻrtasida

Bitim

Oʻzbekiston Respublikasi va Oʻmon Sultonligi, bundan keyin “Tomonlar” deb ataluvchilar,

oʻzaro hurmat prinsiplariga asoslangan holda hamkorlik va doʻstlik aloqalarini rivojlantirish va kuchaytirish istagida,

BMT Nizomining maqsad va qoidalariga sodiqligini taʼkidlagan holda,

Ikki mamlakat xalqlarining tarixi, madaniyati va anʼanalarining yaqinligi, ular oʻrtasidagi aloqalarning mustahkamlanishiga asos boʻlishiga ishonib,

quyidagilar toʻgʻrisida kelishib oldilar:

1-modda

Tomonlar siyosiy, iqtisodiy, savdo va madaniy sohalarda aloqalarni ikki mamlakat oʻrtasidagi oʻzaro ishonch va hamkorlik asosida rivojlantirishga intiladilar.

2-modda

Tomonlar munosabatlarni yanada rivojlantirish maqsadida, oʻzaro manfaatlarni ifodalovchi mintaqaviy va xalqaro masalalar boʻyicha maslahatlashuvlar oʻtkazadilar va fikr almashadilar.

3-modda

Tomonlar ikki tomonlama aloqalarda savdo va iqtisodiy hamkorlikning ahamiyatini inobatga olgan holda, savdo va iqtisodiyot sohalaridagi hamkorlikning turli shakllarini rivojlantirishga intiladilar.

4-modda

Tomonlar Oʻzbekiston va Oʻmon xalqlari oʻrtasida doʻstlikni mustahkamlashga, madaniyat, axborot, ilm-fan va texnika sohalaridagi aloqalarni, sport va turizmni rivojlantirishda imkoniyatlarni kengaytirishga va mustahkamlashga koʻmaklashadilar.

Har bir Tomon oʻz davlatlarining milliy qonunchiligiga amal qilgan holda, boshqa Tomon fuqarolarini asarlar toʻplamlari, kolleksiyalar, madaniy meroslar, arxivlar, kutubxonalar, ilmiy-texnikaviy manbalardan oʻzlarining fuqarolariga nisbatan tatbiq etilgan shartlar asosida foydalanishini taʼminlaydilar.

5-modda

Tomonlar iqtisodiy, ilmiy va texnikaviy sohalarda tajriba almashadilar.

6-modda

Tomonlar mushtarak dasturlar doirasida iqtisodiyot, menejment, diplomatiya sohalarida kadrlar tayyorlash va ularning malakasini oshirishda tajriba almashish, shuningdek professor-oʻqituvchilar, talabalar va ilmiy guruhlar almashinuvini ragʻbatlantirishga kelishdilar.

7-modda

Tomonlar fuqarolik jamiyati tashkilotlari, ishbilarmonlar doiralari, ilmiy va madaniy jamiyatlar oʻrtasida hamkorlikni ragʻbatlantirishga va ikki mamlakat shaharlari oʻrtasida qoʻshma loyihalarni rivojlantirishga qaratilgan chora-tadbirlar koʻradilar.

8-modda

Tomonlar tarixiy va madaniy merosni muhofaza qilish ishida hamkorlik qiladilar hamda xalqaro tashkilotlar doirasida madaniyat, tarixiy yodgorliklarni himoya qilish va sanʼat sohalarida hamkorlikni rivojlantiradilar.

9-modda

Tomonlar aloqa va axborot sohalarida oʻzaro hamkorlikni kengaytirishga kelishdilar.

10-modda

Ushbu Bitim qoidalari boshqa davlat manfaatlariga, ikki mamlakatning boshqa davlatlar bilan imzolagan ikki va koʻp tomonlama bitimlaridan kelib chiqadigan majburiyatlariga daxl etmaydi.

Ushbu Bitim Tomonlardan birining boshqa Tomonni ushbu Bitimning kuchga kirishi uchun zarur boʻlgan davlat ichki protseduralarini bajarganligi toʻgʻrisida diplomatik kanallar orqali soʻnggi yozma xabarnomani olgan kundan boshlab kuchga kiradi.

Bitim Tomonlardan biri uning amal qilishini toʻxtatish niyati toʻgʻrisida diplomatik kanallar orqali yozma ravishda xabardor qilmaguncha amal qiladi.

Mazkur Bitimning amal qilishi boshqa Tomon tegishli nota olganidan olti oy oʻtgandan keyin tugatiladi.

Masqat shahrida 2009-yil 5-oktabrda oʻzbek, arab va ingliz tillarida ikki asl nusxada imzolandi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelgan hollarda ingliz tilidagi matn ustuvor hisoblanadi.

(imzolar)