Standartlashtirish sohasida oʻzaro hamkorlik toʻgʻrisida

17.05.2010

Oʻzbekiston standartlashtirish, metrologiya va sertifikatlashtirish agentligi (“Oʻzstandart” agentligi) bilan Nemis standartlashtirish instituti (DIN) oʻrtasida

BITIM

Oʻzbekiston standartlashtirish, metrologiya va sertifikatlashtirish agentligi va Nemis standartlashtirish instituti, bundan keyin “Tomonlar” deb ataluvchilar,

1996-yil 21-iyunda Oʻzbekiston Respublikasi, bir tomondan, va Yevropa Hamjamiyatlari hamda ularga Aʼzo-davlatlar, ikkinchi tomondan, oʻrtasida sherikchilik taʼsis etuvchi Sherikchilik va Hamkorlik toʻgʻrisida Bitim qoidalariga asoslanib;

Oʻzbekiston Respublikasi Butun jahon savdo tashkilotiga qoʻshilishga tayyorgarlik koʻrayotganligini eʼtiborga olib;

Tomonlar davlatlarining amaldagi qonunchiligi doirasida hamkorlikdan kelib chiquvchi oʻzaro manfaatdorlikni rivojlantirish istagida;

hamkorlikdan kelib chiqadigan oʻzaro manfaatni anglab, umumiy vazifalar va imkoniyatlar doirasida

quyidagilar haqida kelishdilar:

1- modda

Mazkur Bitimni amalga oshirish davomida Tomonlar mos ravishda Oʻzbekiston Respublikasi va Germaniya Federativ Respublikasi qonunlariga amal qiladilar.

2-modda

Tomonlar, savdodagi mavjud toʻsiqlarni bartaraf etish, Oʻzbekiston Respublikasi va Germaniya Federativ Respublikasi oʻrtasidagi iqtisodiy hamda savdo munosabatlarni rivojlantirilishini yaxshilash maqsadida Yevropa va xalqaro standartlar asosida milliy standartlarni uygʻunlashtirish sohasida hamkorlik qiladilar.

3-modda

Tomonlar, standartlashtirish boʻyicha xalqaro tashkilotlar doirasida, amaldagi xalqaro va yevropa standartlarini hisobga olgan holda Tomonlar davlatlaridagi milliy qonunchilikka asosan standartlashtirish sohasida oʻzaro manfaatdor hamkorlikni rivojlantiradilar.

Hamkorlik quyidagi asosiy yoʻnalishlarda olib boriladi:

— standartlashtirish sohasida qabul qilingan meʼyoriy-huquqiy hujjatlar bilan oʻzaro almashish;

— standartlarni ishlab chiqishning istiqbolli dasturlari va rejalari toʻgʻrisida axborot bilan almashish;

— standartlashtirish sohasida maslahatlar, axborot va tajriba bilan almashish;

— zarur hollarda, Tomonlarning milliy standartlari, milliy standartlar kataloglari va davriy nashrlari bilan almashish;

— ikkala davlatdagi standartlar ishlab chiquvchi tashkilotlar oʻrtasida munosabatlarni yoʻlga qoʻyish;

— standartlashtirish sohasida mutaxassislarni tayyorlash boʻyicha hamkorlik qilish;

— delegatsiyalar, rahbarlar va mutaxassislarning xizmat safarlari bilan almashishni tashkil etish.

4-modda

Mazkur Bitim doirasida, har qaysi Tomon, mahsulotlarni tayyorlash va xizmatlar koʻrsatishda boshqa Tomonning standartlarini hamda standartlashtirish va sertifikatlashtirish boʻyicha boshqa meʼyoriy hujjatlarini qoʻllashi mumkin, agar amaldagi davlat qonunlariga muvofiq standartlashtirish boʻyicha milliy idora tomonidan kiritilgan tartibga zid boʻlmasa.

5-modda

Mazkur Bitim asosida qabul qilingan hujjatlar yoki maʼlumotlarning maxfiyligi uchun mazkur hujjatni va maʼlumotni qabul qilgan Tomon masʼuldir.

Hujjat yoki maʼlumotni, uchinchi tarafga, faqat uni taqdim etgan Tomonning roziligi asosida berish mumkin.

6-modda

Mazkur Bitim talablarini bajarishning moliyaviy shartlari, Tomonlarning oʻzaro kelishuvlariga koʻra amalga oshiriladi.

7-modda

Tomonlarning oʻzaro kelishuvlariga asosan, mazkur Bitimga uning ajralmas qismi hisoblanadigan, alohida Bayonnomalar bilan rasmiylashtiriladigan qoʻshimcha va oʻzgartishlar kiritilishi mumkin.

8-modda

Mazkur Bitim Tomonlar qatnashadigan boshqa xalqaro Bitimlar va Shartnomalar asosida vujudga keladigan Tomonlarning huquq va majburiyatlariga taʼsir qilmaydi.

9-modda

Mazkur Bitim qoidalarini qoʻllash va talqin qilishda yuzaga kelgan har qanday kelishmovchiliklar oʻzaro maslahatlashuv va muzokaralar orqali hal qilinadi.

10-modda

Mazkur Bitim Tomonlar imzolagan kundan boshlab besh yil muddatga tuziladi va Tomonlardan biri Bitimning amal qilishini toʻxtatish toʻgʻrisida boshqa Tomonga yozma ravishda 6 oy oldin xabar bermaguniga qadar, oʻz-oʻzidan keyingi besh yillik muddatga uzayaveradi.

Har bir Tomon boshqa Tomonni yozma ravishda xabardor qilgan holda Bitimning amal qilishini toʻxtatishi mumkin. Ushbu holda Bitim ikkinchi tomondan shunday yozma xabar olgan oydan boshlab (6) olti oydan keyin oʻz kuchini yoʻqotadi.

Bitimning amal qilishini toʻxtatilishi, mazkur Bitim doirasida amalga oshirilayotgan tadbirlarning amal qilish muddatiga va joriy etish vaqtiga ushbu tadbirlar tugallanmaguncha taʼsir etmaydi.

Germaniyaning Berlin shahrida 2010-yilning 17-may kunida, ikki asl nusxada, har biri oʻzbek va ingliz tillarida tuzildi. Mazkur Bitimni talqin qilishda kelishmovchiliklar paydo boʻlganda ingliz tilidagi matndan foydalaniladi.

(imzolar)