Taʼlim-tarbiya va kadrlar tayyorlash tizimini tubdan isloh qilish, barkamol avlodni voyaga yetkazish toʻgʻrisida (PF-1869-son)

06.10.1997

Oʻzbekiston Respublikasi Prezidentining

Farmoni

Mavjud taʼlim-tarbiya tizimini tubdan isloh qilish, uni zamon talablari darajasiga koʻtarish, milliy kadrlar tayyorlashning yangi tizimini barpo etish, kelajak uchun barkamol, salohiyatli avlodni tarbiyalash maqsadida:

1. “Taʼlim toʻgʻrisida”gi Qonun va Kadrlar tayyorlash boʻyicha milliy dasturni hayotga tatbiq etish ishlari davlat siyosatining ustuvor yoʻnalishi deb hisoblansin.

Respublikada taʼlim-tarbiya tizimini tubdan oʻzgartirish yoʻlida olib borilayotgan islohotlarni amalga oshirish va bu borada qabul qilingan hujjatlar mohiyatini keng jamoatchilik tomonidan chuqur anglab olinishiga har tomonlama sharoit yaratish — davlat boshqaruvi, huquqni muhofaza qilish idoralari, taʼlim-tarbiya muassasalari xodimlarining eng dolzarb vazifalari etib belgilansin.

2. Kadrlar tayyorlash boʻyicha milliy dasturni amalga oshirish Respublika komissiyasi ilovaga* muvofiq tuzilsin.

* Ilova berilmaydi.

Quyidagilar Komissiyaning asosiy vazifalari etib belgilansin:

“Taʼlim toʻgʻrisida”gi Qonunni amalga oshirish ishlarini muvofiqlashtirish, taʼlim-tarbiya va kadrlar tayyorlash sohasida davlat siyosati tamoyillarini hayotga tatbiq etish;

respublika vazirliklari, idoralari va muassasalari hamda mulkchilik shaklidan qatʼi nazar, barcha tashkilotlarning taʼlim-tarbiya va kadrlar tayyorlash tizimini isloh etish bilan bogʻliq faoliyatini muvofiqlashtirish;

kadrlar tayyorlash tizimi huquqiy-meʼyoriy asosini Milliy dastur talablariga mos ravishda qayta koʻrib chiqishni tashkil qilish;

uzluksiz taʼlimning barcha bosqichlari uchun davlat taʼlim standartlarini ishlab chiqish, tasdiqlash va amaliyotga tatbiq etishni taʼminlash;

uzluksiz taʼlim tizimining Milliy modelini amalga oshirishni taʼminlash;

kadrlarga boʻlgan talab va taklifni oʻrganish asosida taʼlim tizimining istiqbolli yoʻnalishlarini belgilash;

uch yillik akademik litseylar va kasb-hunar kollejlari, oliy taʼlim muassasalari tizimini Milliy dastur talablari asosida tashkil etish va takomillashtirish boʻyicha takliflar kiritish;

xalqaro donorlar, xorijiy investorlar, jamgʻarma va jamoat tashkilotlarining mablagʻlarini jalb etish va ulardan unumli foydalanishga sharoit yaratish;

Kadrlar tayyorlash milliy dasturining monitoringini olib borish;

Milliy dasturning bajarilishi haqida ommaviy axborot vositalari orqali muntazam maʼlumot berib borishni tashkil etish.

3. Oʻzbekiston Respublikasi Kadrlar tayyorlash milliy dasturining ustuvor vazifalari boʻyicha Vazirlar Mahkamasining qarorlari loyihalari va ular uchun masʼul ishchi guruhlari tarkibi 2-ilovaga* muvofiq tasdiqlansin.

* 2-ilova berilmaydi.

Ishchi guruhlar faoliyatiga yuqori malakali mutaxassislar va olimlar hamda xorijiy ekspertlarni keng jalb etish nazarda tutilsin.

5. Oʻzbekiston Respublikasi Vazirlar Mahkamasi mazkur Farmonda belgilangan vazifalar yuzasidan tegishli qarorlar qabul qilsin.

Oʻzbekiston Respublikasining Prezidenti I. KARIMOV

Toshkent sh.,

1997-yil 6-oktabr,

PF-1869-son