Oʻzbekiston Respublikasi Prezidenti huzuridagi amaldagi qonun hujjatlari monitoringi instituti faoliyatini yanada takomillashtirish chora-tadbirlari toʻgʻrisida (PF-4305-son)

04.05.2011

Oʻzbekiston Respublikasi Prezidentining

Farmoni

Oʻzbekiston Respublikasi Prezidenti huzuridagi Amaldagi qonun hujjatlari monitoringi institutining qonun loyihalarini ekspertiza qilish, qonun ijodkorligi faoliyatini, davlat hokimiyati va boshqaruvi tizimini takomillashtirishga qaratilgan takliflarni ishlab chiqish boʻyicha axborot-tahliliy, tashkiliy faoliyati samaradorligini oshirish, shuningdek Oʻzbekiston Respublikasi Prezidentining 2010-yil 12-noyabrda Oʻzbekiston Respublikasi Oliy Majlisi Qonunchilik palatasi va Senatining qoʻshma majlisidagi maʼruzasida bayon etilgan Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasining qoidalarini izchillik bilan tatbiq etish maqsadida:

1. Belgilansinki, Oʻzbekiston Respublikasi Prezidentining 2005-yil 2-apreldagi “Oʻzbekiston Respublikasi Prezidenti huzuridagi Amaldagi qonun hujjatlari monitoringi institutini tashkil qilish toʻgʻrisida”gi PF-3590-sonli Farmonida belgilangan vazifalar bilan bir qatorda, quyidagilar Oʻzbekiston Respublikasi Prezidenti huzuridagi Amaldagi qonun hujjatlari monitoringi instituti (keyingi oʻrinlarda — Institut) faoliyatining asosiy yoʻnalishlari hisoblanadi:

davlat va jamiyat qurilishi sohasidagi demokratik islohotlar jarayonini, hokimiyatlar boʻlinishi konstitutsiyaviy prinsipining hayotga izchil tatbiq etilishini tizimli tahlil qilish, ijro etuvchi, qonun chiqaruvchi va sud hokimiyati tarmoqlarining mustaqilligi va erkinligini kuchaytirish, ularning kelishilgan holda faoliyat yuritishi hamda hamkorligini, ular oʻrtasida muvozanatni taʼminlash, davlat hokimiyati va boshqaruvi tizimida oʻzaro tiyib turish va manfaatlar muvozanatining samarali tizimini shakllantirish boʻyicha takliflar ishlab chiqish;

hokimiyatning ijro etuvchi tarmogʻini isloh qilish va demokratlashtirish masalalarini kompleks oʻrganish, ayrim hokimiyat vakolatlari va funksiyalarini markaziy davlat hokimiyati organlaridan, hukumatdan boshlab mahalliy davlat hokimiyati organlariga, fuqarolarning oʻzini oʻzi boshqarish organlariga bosqichma-bosqich oʻtkazish boʻyicha takliflar ishlab chiqish;

Oʻzbekiston Respublikasi Oliy Majlisining palatalari, siyosiy partiyalarning parlamentdagi fraksiyalari, joylardagi deputatlik guruhlarining qonun ijodkorligi, nazorat-tahlil faoliyati samaradorligini oshirish masalalarini chuqur oʻrganish; siyosiy partiyalarning davlat hokimiyati va boshqaruvi organlarini shakllantirishdagi, ijro etuvchi hokimiyat organlari tomonidan qonun hujjatlarining ijro etilishi ustidan samarali parlament, deputatlik nazoratini amalga oshirishdagi rolini kuchaytirish boʻyicha takliflar ishlab chiqish;

jamiyatda demokratiya va adolatni taʼminlashning eng muhim omili sifatida sud hokimiyati mustaqilligi va erkinligini mustahkamlash jarayonlarini kompleks tahlil qilish, sudni inson va fuqaroning huquq va erkinliklarini muhofaza va himoya etishga xizmat qiladigan davlatning tom maʼnodagi mustaqil institutiga aylantirish boʻyicha takliflar ishlab chiqish;

hokimiyatlar boʻlinishi prinsipini hayotga tatbiq etish, ularning samarali tarzda kelishilgan holda faoliyat yuritishi hamda hamkorligini taʼminlash boʻyicha rivojlangan demokratik mamlakatlar tajribasini tizimli oʻrganish, ushbu tajribadan globallashuv sharoitida jahonda roʻy berayotgan demokratik jarayonlarni chuqurlashtirishning zamonaviy tendensiyalarini hisobga olgan holda davlat qurilishi tizimida foydalanish boʻyicha takliflar ishlab chiqish.

2. Belgilab qoʻyilsinki, Institut oʻz oldiga qoʻyilgan vazifalarni bajarish maqsadida:

qonun ijodkorligi jarayonining barcha bosqichlarida qonun loyihalarini ekspertizadan oʻtkazadi hamda qonun loyihalari boʻyicha baholar va xulosalarni tayyorlaydi; amaldagi qonun hujjatlari ijrosi monitoringini amalga oshiradi, uning natijalari boʻyicha axborot-tahliliy materiallar va baholar tayyorlaydi;

markazda va joylarda hokimiyatning vakillik, ijro etuvchi va sud tarmoqlari organlarining faoliyati monitoringini amalga oshirishda, ularning faoliyat yuritish samaradorligini oshirish va ular oʻrtasida taʼsirchan hamkorlikni taʼminlash boʻyicha takliflar ishlab chiqishda ishtirok etadi;

qonun hujjatlarining aholi va ijrochilarga yetkazilishi amaliyotini oʻrganishni, shuningdek ijro etuvchi hokimiyat organlarining norma ijodkorligi faoliyati, ular tomonidan qabul qilinayotgan hujjatlarning Oʻzbekiston Respublikasi Konstitutsiyasiga, qonun hujjatlariga muvofiqligi monitoringini tashkillashtiradi;

ijro etuvchi hokimiyat organlari tomonidan qonun hujjatlari ijro etilishi ustidan parlament, deputatlik nazoratini amalga oshirish boʻyicha faoliyatning tizimli monitoringini, uning samaradorligini oshirish yuzasidan takliflar ishlab chiqishni taʼminlaydi;

mamlakatda haqiqiy koʻppartiyaviylik tizimining rivojlanish jarayonlari, Oʻzbekiston Respublikasi Oliy Majlisi Qonunchilik palatasidagi siyosiy partiyalarning fraksiyalari, deputatlik guruhlari faoliyati monitoringini amalga oshiradi, mamlakat parlamentida fraksiyalararo raqobatni professional va predmetli asosda rivojlantirish boʻyicha takliflar ishlab chiqadi;

zamonaviy axborot-kommunikatsiya texnologiyalaridan foydalangan holda amaldagi qonun hujjatlari, huquqni qoʻllash amaliyoti, davlat va jamiyat qurilishidagi qonun ijodkorligi faoliyati sohasida xorijiy mamlakatlar tajribasi haqidagi maʼlumotlarning axborot bankini shakllantiradi;

davlat hokimiyati va boshqaruvi tizimini demokratlashtirishga, sotsial-iqtisodiy, ijtimoiy-siyosiy islohotlarning va mamlakatda fuqarolik jamiyatini shakllantirishning huquqiy bazasini takomillashtirishga oid dolzarb muammolarni oʻrganish boʻyicha ilmiy-tadqiqot, axborot-tahliliy ishlarning maqsadli kompleks dasturlarini muvofiqlashtirish, tayyorlash hamda amalga oshirishni taʼminlaydi; ilmiy tadqiqot natijalaridan davlat va jamiyat qurilishi amaliyotida, qonun ijodkorligi faoliyatida foydalanishni tashkillashtiradi.

3. Belgilansinki, Institut zimmasiga yuklatilgan vazifalar, funksiyalar va vakolatlar, birinchi navbatda, qonun hujjatlari hamda ularga tenglashtirilgan hujjatlar loyihalarini monitoring va tizimli tahlil qilish jarayoni, shuningdek qabul qilingan qonun hujjatlari va huquqiy normalarning bajarilishi ustidan doimiy nazorat qilish orqali amalga oshiriladi.

4. Institut Ustavi, yangi tuzilmasi va shtatlar jadvali 1, 2 va 2a-ilovalarga muvofiq tasdiqlansin.

5. Institut Oʻzbekiston Respublikasi Davlat statistika qoʻmitasi, moliya, tashqi iqtisodiy aloqalar, investitsiyalar va savdo, mehnat va aholini ijtimoiy muhofaza qilish, ichki ishlar vazirliklari, Davlat soliq qoʻmitasi, Davlat bojxona qoʻmitasi, Davlat mulkini boshqarish davlat qoʻmitasi, Bosh prokuraturasi, Oliy sudi va Oliy xoʻjalik sudi, boshqa vazirlik va idoralarining statistika axboroti yuborilishi shart boʻlgan reyestrga kiritilsin.

6. Oʻzbekiston Respublikasi Prezidentining 2005-yil 2-apreldagi “Oʻzbekiston Respublikasi Prezidenti huzuridagi Amaldagi qonun hujjatlari monitoringi institutini tashkil qilish toʻgʻrisida”gi PF-3590-sonli Farmoniga 3-ilovaga muvofiq oʻzgartishlar kiritilsin.

7. Ushbu Farmonning ijrosini nazorat qilish Oʻzbekiston Respublikasi Prezidentining Davlat maslahatchisi M. Rahmonqulov zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2011-yil 4-may,

PF-4305-son

Oʻzbekiston Respublikasi Prezidentining 2011-yil 4-maydagi PF-4305-son Farmoniga 1-ILOVA

Oʻzbekiston Respublikasi Prezidenti huzuridagi Amaldagi qonun hujjatlari monitoringi institutining

USTAVI

I. Umumiy qoidalar

1. Oʻzbekiston Respublikasi Prezidenti huzuridagi Amaldagi qonun hujjatlari monitoringi instituti (keyingi oʻrinlarda — Institut) ilmiy-tadqiqot ekspertlik muassasasi hisoblanadi.

Institut oʻz faoliyatini qonun hujjatlariga va ushbu Ustavga muvofiq amalga oshiradi.

2. Institut oʻz mol-mulkiga ega boʻlgan yuridik shaxs hisoblanadi, mustaqil balansga, Oʻzbekiston Respublikasining banklarida milliy va xorijiy valyutalardagi hisob raqamlariga, Oʻzbekiston Respublikasi Davlat gerbi tasviri tushirilgan muhrga ega boʻladi.

Institut oʻz nomidan shartnomalar tuzishi, mulkiy va shaxsiy nomulkiy huquqlarga ega boʻlishi, majburiyatlar bajarishi, sudda daʼvogar va javobgar boʻlishi mumkin.

Institut oʻz majburiyatlari yuzasidan oʻz mol-mulki bilan javobgar boʻladi.

3. Institutning davlat tilidagi toʻliq rasmiy nomi — Oʻzbekiston Respublikasi Prezidenti huzuridagi Amaldagi qonun hujjatlari monitoringi instituti.

II. Institutning asosiy vazifalari, faoliyat yoʻnalishlari va funksiyalari

4. Institutning asosiy vazifalari va faoliyat yoʻnalishlari quyidagilardan iborat:

qonun loyihalarini har tomonlama huquqiy ekspertizadan oʻtkazish, qonun hujjatlari loyihalari boʻyicha ularni koʻrib chiqish va qabul qilishning barcha bosqichlarida chuqur asoslantirilgan ekspertlik baholari va xulosalarini tayyorlash;

mamlakatni isloh etish va modernizatsiya qilishning huquqiy bazasi takomillashtirilishini tizimli tahlil qilish, Oʻzbekiston Respublikasi Konstitutsiyaviy sudi bilan mustahkam hamkorlikda qonun hujjatlari loyihalarini koʻrib chiqish hamda ularning oʻtishi yuzasidan qonun hujjatlarida belgilangan tartib va taomillarga rioya etish boʻyicha takliflar tayyorlash;

qonunlarda, boshqa normativ-huquqiy hujjatlarda Oʻzbekiston Respublikasi Konstitutsiyasining norma va qoidalari toʻliq roʻyobga chiqarilishi hamda ularning qoʻllanilishi, shuningdek qabul qilinayotgan qonun hujjatlarida huquqiy normalarning oʻzaro bogʻlanishi, kompleksliligi va uygʻunligi monitoringini oʻtkazish;

Oʻzbekiston Respublikasi qonun hujjatlarining xalqaro normalar va standartlarga muvofiqligini oʻrganish; qonunlar loyihalarida umum eʼtirof etilgan xalqaro huquq, inson huquqlari va erkinliklari prinsiplari hamda normalari ustuvorligiga rioya etilishini tahlil qilish;

xorijiy parlamentlar, shunga oʻxshash qonun hujjatlari monitoringi institutlarining ish tajribasini oʻrganish hamda qonun ijodkorligi faoliyatida undan foydalanish boʻyicha tavsiyalar berish;

davlat va jamiyat qurilishi sohasidagi demokratik islohotlar jarayonini, hokimiyatlar boʻlinishi konstitutsiyaviy prinsipining hayotga izchil tatbiq etilishini tizimli tahlil qilish, ijro etuvchi, qonun chiqaruvchi va sud hokimiyati tarmoqlarining mustaqilligi va erkinligini kuchaytirish, ularning kelishilgan holda faoliyat yuritishi hamda hamkorligini, ular oʻrtasida muvozanatni taʼminlash, davlat hokimiyati va boshqaruvi tizimida oʻzaro tiyib turish va manfaatlar muvozanatining samarali tizimini shakllantirish boʻyicha takliflar ishlab chiqish;

hokimiyatning ijro etuvchi tarmogʻini isloh qilish va demokratlashtirish masalalarini kompleks oʻrganish, ayrim hokimiyat vakolatlari va funksiyalarini markaziy davlat hokimiyati organlaridan, hukumatdan boshlab mahalliy davlat hokimiyati organlariga, fuqarolarning oʻzini oʻzi boshqarish organlariga bosqichma-bosqich oʻtkazish boʻyicha takliflar ishlab chiqish;

Oʻzbekiston Respublikasi Oliy Majlisining palatalari, siyosiy partiyalarning parlamentdagi fraksiyalari, joylardagi deputatlik guruhlarining qonun ijodkorligi, nazorat-tahlil faoliyati samaradorligini oshirish masalalarini chuqur oʻrganish; siyosiy partiyalarning davlat hokimiyati va boshqaruvi organlarini shakllantirishdagi, ijro etuvchi hokimiyat organlari tomonidan qonun hujjatlarining ijro etilishi ustidan samarali parlament, deputatlik nazoratini amalga oshirishdagi rolini kuchaytirish boʻyicha takliflar ishlab chiqish;

jamiyatda demokratiya va adolatni taʼminlashning eng muhim omili sifatida sud hokimiyati mustaqilligi va erkinligini mustahkamlash jarayonlarini kompleks tahlil qilish, sudni inson va fuqaroning huquq va erkinliklarini muhofaza va himoya etishga xizmat qiladigan davlatning tom maʼnodagi mustaqil institutiga aylantirish boʻyicha takliflar ishlab chiqish;

hokimiyatlar boʻlinishi prinsipini hayotga tatbiq etish, ularning samarali tarzda kelishilgan holda faoliyat yuritishi hamda hamkorligini taʼminlash boʻyicha rivojlangan demokratik mamlakatlar tajribasini tizimli oʻrganish, ushbu tajribadan globallashuv sharoitida jahonda roʻy berayotgan demokratik jarayonlarni chuqurlashtirishning zamonaviy tendensiyalarini hisobga olgan holda davlat qurilishi tizimida foydalanish boʻyicha takliflar ishlab chiqish.

5. Institut oʻziga yuklatilgan vazifalarni bajarish uchun quyidagilarni amalga oshiradi:

qonun ijodkorligi jarayonining barcha bosqichlarida qonun loyihalarini ekspertizadan oʻtkazadi hamda qonun loyihalari boʻyicha baholar va xulosalarni tayyorlaydi; amaldagi qonun hujjatlari ijrosi monitoringini amalga oshiradi, uning natijalari boʻyicha axborot-tahliliy materiallar va baholar tayyorlaydi;

qonun hujjatlari monitoringi, qonun ijodkorligi faoliyatini oʻrganish bilan bogʻliq tadqiqot va tahliliy ishlarni amalga oshiradi;

markazda va joylarda hokimiyatning vakillik, ijro etuvchi va sud tarmoqlari organlarining faoliyati monitoringini amalga oshirishda, ularning faoliyat yuritish samaradorligini oshirish va ular oʻrtasida taʼsirchan hamkorlikni taʼminlash boʻyicha takliflar ishlab chiqishda ishtirok etadi;

qonun hujjatlarining aholi va ijrochilarga yetkazilishi amaliyotini oʻrganishni tashkillashtiradi, qonunlarning nazorat nusxalarini, hisobini yuritish va tizimlashtirishni, shuningdek ijro etuvchi hokimiyat organlarining norma ijodkorligi faoliyati, ular tomonidan qabul qilinayotgan hujjatlarning Oʻzbekiston Respublikasi Konstitutsiyasiga, qonun hujjatlariga muvofiqligi monitoringini amalga oshiradi;

ijro etuvchi hokimiyat organlari tomonidan qonun hujjatlari ijro etilishi ustidan parlament, deputatlik nazoratini amalga oshirish boʻyicha faoliyatning tizimli monitoringini, uning samaradorligini oshirish yuzasidan takliflar ishlab chiqishni taʼminlaydi;

qonun hujjatlari va ularga tenglashtirilgan hujjatlar loyihalari monitoringini va tizimli tahlilini amalga oshiradi, shuningdek qabul qilingan qonun hujjatlari va huquqiy normalarning bajarilishi ustidan doimiy nazoratni olib boradi;

mamlakatda haqiqiy koʻppartiyaviylik tizimining rivojlanish jarayonlari, Oʻzbekiston Respublikasi Oliy Majlisi Qonunchilik palatasidagi siyosiy partiyalarning fraksiyalari, deputatlik guruhlari faoliyati monitoringini amalga oshiradi, mamlakat parlamentida fraksiyalararo raqobatni professional va predmetli asosda rivojlantirish boʻyicha takliflar ishlab chiqadi;

davlat hokimiyati va boshqaruvi tizimini demokratlashtirishga, sotsial-iqtisodiy, ijtimoiy-siyosiy islohotlarning va mamlakatda fuqarolik jamiyatini shakllantirishning huquqiy bazasini takomillashtirishga oid dolzarb muammolarni oʻrganish boʻyicha ilmiy-tadqiqot, axborot-tahliliy ishlarning maqsadli kompleks dasturlarini muvofiqlashtirish, tayyorlash hamda amalga oshirishni taʼminlaydi; ilmiy-tadqiqot natijalaridan davlat va jamiyat qurilishi amaliyotida, qonun ijodkorligi faoliyatida foydalanishni tashkillashtiradi;

xalqaro huquq normalaridan, ularni Oʻzbekiston Respublikasi qonunchiligiga implementatsiya qilish jarayonidan, rivojlangan demokratik mamlakatlarning mamlakatda demokratik islohotlarni yanada chuqurlashtirish va fuqarolik jamiyatini rivojlantirish masalalari boʻyicha tajribasidan foydalanish boʻyicha takliflarni oʻrganadi va ishlab chiqadi;

Oʻzbekiston Respublikasi Oliy Majlisi Qonunchilik palatasidagi qoʻmitalar va komissiyalar, siyosiy partiyalarning fraksiyalari, Senatining qoʻmitalari va komissiyalari, ijro etuvchi va sud hokimiyati organlari bilan hamkorlik qiladi;

Oʻzbekiston Respublikasi Prezidenti devonining Oliy Majlis, siyosiy va jamoat tashkilotlari bilan hamkorlik qilish xizmati hamda Oʻzbekiston Respublikasi Prezidenti huzuridagi Davlat va jamiyat qurilishi, sud-huquq tizimining qonunchilik asoslarini isloh qilish boʻyicha kengash bilan hamkorlik qiladi;

davlat va jamiyat qurilishi sohasida demokratik islohotlarni chuqurlashtirish, sud-huquq tizimini liberallashtirishning siyosiy-huquqiy muammolarini oʻrganish boʻyicha ishlarni tashkil etish hamda amalga oshirish masalalari yuzasidan respublika ilmiy-tadqiqot institutlari va markazlari, oliy taʼlim muassasalari faoliyatini muvofiqlashtiradi;

xalqaro tashkilotlar, xorijiy ilmiy-tadqiqot, maslahat va oʻquv markazlari, olimlar va mutaxassislar bilan ilmiy va amaliy aloqalarni oʻrnatadi va rivojlantiradi, ular bilan hamkorlik toʻgʻrisidagi shartnomalarni tuzadi;

respublika va xorijiy mamlakatlarning olimlari va mutaxassislari ishtirokida muammoli-maqsadli ilmiy munozaralar, konferensiyalar, simpoziumlar oʻtkazadi.

III. Institut huquqlari

6. Institut oʻziga yuklatilgan vazifalarni bajarish uchun quyidagi huquqlarga ega:

qonun hujjatlarida belgilangan huquqiy munosabatlarga oʻz nomidan kirishish;

Institut vakolatiga kiradigan masalalar koʻrib chiqilayotgan taqdirda oʻz vakillari orqali Oʻzbekiston Respublikasi Vazirlar Mahkamasi, Oliy Majlisi palatalari, ularning kengashlari, qoʻmitalari va komissiyalari, siyosiy partiyalar fraksiyalari, Oʻzbekiston Respublikasi Konstitutsiyaviy sudi, Oliy sudi, Oliy xoʻjalik sudi majlislarida belgilangan tartibda ishtirok etish;

Institut vakolatiga kiradigan masalalar yuzasidan davlat organlari, korxonalar, muassasalar, tashkilotlardan zarur axborot, hujjatlar va materiallar, shu jumladan tahliliy, statistik va boshqa materiallarni belgilangan tartibda talab qilib olish;

monitoring oʻtkazish maqsadida vazirliklar, davlat qoʻmitalari, idoralar, sudlar, huquqni muhofaza qiluvchi organlar, mahalliy davlat hokimiyati organlari, korxonalar, muassasalar, tashkilotlarda qonun hujjatlarini qoʻllash amaliyoti bilan tanishish;

ilmiy-muvofiqlashtirish kengashlari va boshqa kengashlar, ekspertlik guruhlarini tashkil qilish, shuningdek Institut vakolatiga kiruvchi muammolar boʻyicha maxsus yigʻilishlar chaqirish;

qonun hujjatlari loyihalarini ekspertizadan oʻtkazish, qonun hujjatlari monitoringi natijalari boʻyicha axborot-tahliliy materiallar va baholar tayyorlash uchun, zarur boʻlganda, olimlar, mutaxassislardan iborat, shu jumladan shartnoma asosida vaqtinchalik ishchi guruhlari tashkil etish;

tegishli xalqaro va chet el tashkilotlari bilan belgilangan tartibda oʻzaro manfaatli asosda ilmiy axborotlar almashish;

oʻz faoliyatini moliyalashtirish maqsadida qonunda belgilangan tartibda Institut tomonidan olinadigan budjetdan tashqari mablagʻlar, shu jumladan valyuta mablagʻlaridan foydalanish;

davlat hokimiyati va boshqaruvi organlari, xoʻjalik boshqaruvi organlari, korxonalar, muassasalar va tashkilotlardan amaldagi qonun hujjatlari monitoringini oʻtkazish uchun zarur boʻlgan normativ-huquqiy hujjatlar, axborot va tahliliy materiallarni bepul asosda olish;

belgilangan tartibda noshirlik faoliyatini amalga oshirish, davlat hokimiyati va boshqaruvi tizimini demokratlashtirish, sud-huquq tizimini isloh etish, ijtimoiy-iqtisodiy rivojlanish huquqiy asoslarini takomillashtirishning dolzarb muammolari boʻyicha davriy ilmiy-amaliy nashrlar chiqarish;

shartnoma asosida ilmiy-tadqiqot ishlarini olib borish, daromad sifatida kelib tushgan mablagʻlarni qonun hujjatlarida belgilangan tartibda Institut xodimlarini moddiy ragʻbatlantirishga, uning moddiy-texnik bazasini mustahkamlashga, ijtimoiy masalalarni hal qilishga yoʻnaltirish;

Oʻzbekiston Respublikasining banklarida hisob raqamlari ochish va ular boʻyicha tegishli operatsiyalarni amalga oshirish.

IV. Institut faoliyatini tashkil etish

7. Institutga Oʻzbekiston Respublikasi Prezidenti tomonidan lavozimga tayinlanadigan va lavozimidan ozod qilinadigan direktor boshchilik qiladi.

Direktor respublika va mahalliy davlat hokimiyati va boshqaruvi organlari, xoʻjalik boshqaruvi organlari, korxonalar, muassasalar va tashkilotlarda, xalqaro tashkilotlarda Institut nomidan ish yuritadi.

Institut qoshida Institutning ilgʻor ilmiy xodimlari, ilmiy-tadqiqot institutlari va markazlarining, oliy taʼlim muassasalarining sud-huquq tizimini isloh qilishni, ijtimoiy-siyosiy va sotsial-iqtisodiy rivojlanishni demokratlashtirish sohalaridagi muammolarni oʻrganish bilan shugʻullanayotgan vakillaridan iborat Ilmiy-muvofiqlashtiruvchi kengash (keyingi oʻrinlarda — Kengash) tuziladi.

Kengash tarkibini tasdiqlash, Institut oldiga qoʻyilgan vazifalarni bajarish boʻyicha uning faoliyatini samarali rejalashtirish va tashkillashtirishni taʼminlash Institut direktori tomonidan amalga oshiriladi.

8. Institut direktori:

Institut faoliyatiga rahbarlik qiladi;

oʻz vakolatiga kiruvchi masalalar yuzasidan qarorlar qabul qiladi;

Institut xodimlari tomonidan bajarilishi majburiy boʻlgan buyruq va farmoyishlar chiqaradi;

Institut zimmasiga yuklatilgan vazifalarni bajarish va funksiyalarni amalga oshirish yuzasidan shaxsan javobgar boʻladi;

tasdiqlangan ish haqi fondi doirasida belgilangan tuzilma va xodimlar soniga muvofiq Institutning shtatlar jadvalini tasdiqlaydi;

Institutning tarkibiy boʻlinmalari toʻgʻrisidagi nizomlarni tasdiqlaydi;

Institutning xarajatlar smetasini tasdiqlaydi;

Institutning ish rejalari, hisobotlari va metodik ishlanmalarini tasdiqlaydi;

Institut nomidan shartnoma va kelishuvlar tuzadi;

Institut xodimlari bilan mehnat shartnomalarini tuzadi va bekor qiladi;

qonun hujjatlariga muvofiq xodimlarni ragʻbatlantirish va mukofotlash shakllarini belgilaydi, lavozim maoshlariga ustama va qoʻshimcha haqlarni oʻrnatadi, xodimlarga moddiy yordam koʻrsatish toʻgʻrisida qarorlar qabul qiladi;

Institut aktivlarini tasarruf etadi, mol-mulkni boshqarish boʻyicha qarorlar qabul qiladi, moliyaviy, toʻlov-hisob va boshqa hujjatlarni imzolaydi;

Institut xodimlari oʻrtasida mansab vazifalarini taqsimlaydi;

oʻz vakolati doirasida boshqa masalalarni hal qiladi.

9. Institut direktori oʻrinbosari Oʻzbekiston Respublikasi Prezidenti tomonidan lavozimiga tayinlanadi va lavozimidan ozod etiladi.

Institut direktori oʻrinbosari direktor topshirigʻi boʻyicha uning ayrim funksiyalarini bajaradi va direktor yoʻqligida yoki u oʻz vazifalarini bajara olmaydigan hollarda uning vazifalarini amalga oshiradi.

10. Institut xodimlarining koʻp yil ishlaganliklari uchun ustama va qoʻshimcha haqlari, oldingi ish joyidan berilgan maxsus unvonlar va martaba darajalari saqlab qolinadi.

Institutdagi ish davri maxsus unvonlar va martaba darajalarini olish uchun zarur boʻlgan ish stajiga qoʻshiladi.

V. Institut faoliyatini moliyalashtirish

11. Institut faoliyatini moliyalashtirish quyidagilar hisobiga amalga oshiriladi:

Institutning ustav faoliyatini amalga oshirish uchun ajratiladigan budjet mablagʻlari;

Davlat ilmiy-texnikaviy dasturlari roʻyxatiga kiritilgan ilmiy dasturlarni maqsadli moliyalashtirish, davlat hokimiyati va boshqaruvi organlari buyurtmasi boʻyicha tanlov asosida bajariladigan ishlar uchun ajratiladigan mablagʻlar;

ishlar, xizmatlar va xoʻjalik faoliyatining boshqa turlarini, xususan tashqi iqtisodiy faoliyatni amalga oshirishdan olingan daromadlar;

yuridik va jismoniy shaxslarning xayriya, homiylik begʻaraz tushumlari;

qonun hujjatlari bilan taqiqlanmagan boshqa manbalar.

VI. Yakuniy qoidalar

12. Institut oʻz faoliyati natijalari boʻyicha buxgalteriya hisobini amalga oshiradi, statistik hisobot yuritadi.

13. Institut Ustaviga oʻzgartish va qoʻshimchalar Oʻzbekiston Respublikasi Prezidenti tomonidan kiritilishi mumkin.

14. Institutni qayta tashkil etish va tugatish Oʻzbekiston Respublikasi Prezidentining qaroriga muvofiq amalga oshiriladi.

Oʻzbekiston Respublikasi Prezidentining 2011-yil 4-maydagi PF-4305-son Farmoniga 2-ILOVA

Respublikasi Prezidenti huzuridagi Amaldagi qonun hujjatlari monitoringi institutining

TUZILMASI

Oʻzbekiston Respublikasi Prezidentining 2011-yil 4-maydagi PF-4305-son Farmoniga 2a-ILOVA

Oʻzbekiston Respublikasi Prezidenti huzuridagi Amaldagi qonun hujjatlari monitoringi institutining

ShTATLAR JADVALI

Oʻzbekiston Respublikasi Prezidentining 2011-yil 4-maydagi PF-4305-son Farmoniga 3-ILOVA

Oʻzbekiston Respublikasi Prezidentining 2005-yil 2-apreldagi “Oʻzbekiston Respublikasi Prezidenti huzuridagi Amaldagi qonun hujjatlari monitoringi institutini tashkil qilish toʻgʻrisida”gi PF-3590-sonli Farmoniga kiritilayotgan oʻzgartishlar

Respublikasi Prezidentining 2005-yil 2-apreldagi “Oʻzbekiston Respublikasi Prezidenti huzuridagi Amaldagi qonun hujjatlari monitoringi institutini tashkil qilish toʻgʻrisida”gi PF-3590-sonli Farmonining 2-bandida:

birinchi xatboshi va 1, 2 va 2a-ilovalar chiqarib tashlansin;

ikkinchi—beshinchi xatboshilar tegishli ravishda birinchi — toʻrtinchi xatboshilar deb hisoblansin;

toʻrtinchi xatboshidagi “Oʻzbekiston Respublikasi Prezidentining Mamlakatni isloh qilish va yangilashning huquqiy bazasini takomillashtirish masalalari boʻyicha Davlat maslahatchisi xizmati” degan soʻzlar “Oʻzbekiston Respublikasi Prezidentining ijro etuvchi, qonun chiqaruvchi va sud hokimiyati tarmoqlari faoliyatini muvofiqlashtirish boʻyicha Davlat maslahatchisi xizmati” degan soʻzlar bilan almashtirilsin.