Aholiga maishiy xizmat koʻrsatish tizimida islohotlarni davom ettirish toʻgʻrisida (PF-1843-son)

17.09.1997

Oʻzbekiston Respublikasi Prezidentining

Farmoni

Aholiga maishiy xizmat koʻrsatish sohasini boshqarishni markazlashtirishdan chiqarishni davom ettirish va raqobat muhitini mustahkamlash, maishiy xizmat koʻrsatish korxonalari va mahalliy boshqaruv organlarining xoʻjalik mustaqilligini oshirish maqsadida:

1. Oʻzbekiston Respublikasi Davlat mulki qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, maishiy xizmat koʻrsatish hududiy uyushmalarining Oʻzbekiston aholiga maishiy xizmat koʻrsatish korxonalari va tashkilotlari respublika uyushmasi (“Oʻzmaishiyxizmatuyushma”)ni tugatish toʻgʻrisidagi taklifi qabul qilinsin.

2. Aholiga maishiy xizmat koʻrsatish mavjud hududiy uyushmalarini hamda maishiy xizmat koʻrsatuvchi tadbirkorlar tuman (shahar) uyushmalarini saqlab qolish maqsadga muvofiq deb hisoblansin.

Belgilab qoʻyilsinki, aholiga maishiy xizmat koʻrsatish hududiy uyushmalari oʻz faoliyati toʻgʻrisida tegishli ravishda Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga, maishiy xizmat koʻrsatuvchi tadbirkorlar tuman (shahar) uyushmalari esa tuman (shahar)lar hokimliklariga hisob beradilar.

3. Aholiga maishiy xizmat koʻrsatish hududiy uyushmalari zimmasiga quyidagi asosiy vazifalarni hal etish yuklansin:

tuman (shahar) maishiy xizmat koʻrsatish uyushmalari, shuningdek ixtiyoriy asosda uyushmaga kiruvchi maishiy xizmat koʻrsatish korxonalari faoliyatini muvofiqlashtirib borish hamda ularga korxonalarni texnika bilan qayta jihozlash va rekonstruksiya qilish masalalarida koʻmaklashish;

aholiga maishiy xizmat koʻrsatish tuman (shahar) uyushmalari va korxonalari faoliyati bilan bogʻliq boʻlgan yuridik, moliyaviy, texnik va boshqa xil xizmatlar koʻrsatish;

aholini ish bilan taʼminlashni kengaytirish uchun tegishli mintaqalar hududlarida, birinchi navbatda, qishloq joylarda xizmatlar koʻrsatishning har xil turlarini rivojlantirish uchun sharoitlar yaratish;

hududiy uyushmalarga kiruvchi korxonalarga marketing faoliyatida, moddiy xomashyo resurslari sotib olishda koʻmaklashish.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari aholiga maishiy xizmat koʻrsatish hududiy uyushmalariga ular zimmasiga yuklangan vazifalarni hal etishda har tomonlama koʻmaklashsinlar.

4. Quyidagilar maishiy xizmat koʻrsatuvchi tadbirkorlar tuman (shahar) uyushmalarining asosiy vazifalari etib belgilansin:

ixtiyoriy asosda uyushma tarkibiga kiruvchi maishiy xizmat koʻrsatish korxonalariga ular faoliyatini amalga oshirish uchun zarur boʻlgan asbob-uskunalar, jihozlar, ishlatiladigan va boshqa xomashyo resurslari bilan taʼminlash masalalarida koʻmaklashish;

maishiy xizmat koʻrsatish korxonalariga korxonalar faoliyati bilan bogʻliq boʻlgan iqtisodiy, moliyaviy va huquqiy masalalar boʻyicha maslahat xizmatlari koʻrsatish.

5. Maishiy xizmat koʻrsatish sohasidagi tadbirkorlar va korxonalarga samarali va malakali yordam berish maqsadida texnika siyosati bilan shugʻullanuvchi hamda konsalting xizmatlari koʻrsatuvchi korxonalar va tashkilotlar negizida “Maishiy xizmat markazi” aksiyadorlik firmasi tashkil etish maqsadga muvofiq deb hisoblansin.

6. Ushbu Farmonni bajarish boʻyicha tashkiliy qoʻmita tuzilsin. Tashkiliy qoʻmitaga, shuningdek Oʻzbekiston aholiga maishiy xizmat koʻrsatish korxonalari va tashkilotlari respublika uyushmasi (“Oʻzmaishiyxizmatuyushma”)ni tugatish komissiyasi funksiyasi ham yuklansin.

7. Oʻzbekiston Respublikasi Prezidentining 1992-yil 7-apreldagi PF-385-son Farmoni oʻz kuchini yoʻqotgan deb hisoblansin.

8. Oʻzbekiston Respublikasi Vazirlar Mahkamasi ushbu Farmonni bajarish yuzasidan bir hafta muddatda qaror qabul qilsin.

Oʻzbekiston Respublikasining Prezidenti I. KARIMOV

Toshkent sh.,

1997-yil 17-sentabr,

PF-1843-son