Respublikada musiqiy taʼlimni, madaniyat va sanʼat oʻquv yurtlari faoliyatini yaxshilash toʻgʻrisida (PF-1692-son)

31.12.1996

Oʻzbekiston Respublikasi Prezidentining

Farmoni

Yosh avlodni oʻzbek madaniyati va sanʼati anʼanalari, ilgʻor jahon andozalari asosida bilim olishini taʼminlash hamda ushbu soha oʻqituvchi, ilmiy-ijodiy xodimlari mehnatini ragʻbatlantirish, shuningdek, respublika madaniyat va sanʼat bilim yurtlarining moddiy-texnik bazasini mustahkamlash maqsadida:

1. Oʻzbekiston Respublikasi Madaniyat ishlari vazirligining oʻz tasarrufidagi bolalar musiqa va sanʼat maktablarini “Taʼlim muassasalari” roʻyxatiga kiritish haqidagi taklifi qabul qilinsin.

1997-yil 1-yanvardan eʼtiboran Oʻzbekiston Respublikasi Madaniyat vazirligi tizimidagi:

bolalar musiqa va sanʼat maktablari oʻqituvchilari (direktor, direktor oʻrinbosari, oʻqituvchi va konsertmeystyerlar)ga Vazirlar Mahkamasining 1992-yil 8-yanvardagi 3-sonli qarorida belgilangan imtiyozlar;

oʻrta maxsus oʻquv yurtlarining oʻqituvchilari, konsertmeystyerlariga hamda Sanʼatshunoslik ilmiy-tadqiqot instituti ilmiy xodimlariga Oʻzbekiston Respublikasi Prezidentining “Oʻzbekistonda teatr va musiqa sanʼatini yanada rivojlantirishni qoʻllab-quvvatlash va ragʻbatlantirish toʻgʻrisida”gi Farmoni hamda Vazirlar Mahkamasining 1995-yil 28-oktabrdagi 415-sonli qarorida belgilangan moddiy ragʻbatlantirish boʻyicha barcha imtiyozlar tatbiq etilsin.

2. Oʻzbekiston Respublikasi Madaniyat vazirligiga:

tegishli vazirlik, tashkilot va muassasalar bilan birgalikda yosh avlodni vatanparvarlik hamda istiqlol gʻoyalariga sadoqat ruhida tarbiyalash, boy milliy-maʼnaviy merosimiz, hozirgi zamon ijodiy yutuqlarimiz, shuningdek, umuminsoniy qadriyatlarni hurmat qilish, oʻrganish va oʻzlashtirish ishlarini yanada yaxshilash chora-tadbirlarini ishlab chiqib amalga oshirish;

bolalar musiqa va sanʼat maktablari, oliy va oʻrta maxsus oʻquv yurtlarida iqtidorli yoshlarning milliy anʼanalarni chuqur oʻrganish va oʻzlashtirish, shuningdek, jahon andozalariga mos ravishda taʼlim olishlari uchun maxsus oʻquv dasturlarini tayyorlash;

oʻquv yurtlarini yuqori sifatli cholgʻu asboblari va zarur zamonaviy texnik vositalar bilan taʼminlash chora-tadbirlarini koʻrish;

nodir, qimmatbaho musiqa asboblarini toʻplash, asrash, ulardan unumli foydalanish maqsadida vazirlik huzurida “Musiqiy cholgʻular davlat kolleksiyasi”ni tashkil etish;

isteʼdodli yoshlarni sanʼat sohasidagi xalqaro va respublika miqyosidagi koʻrik-tanlovlar, festivallar va boshqa turdagi anjumanlarda ishtirok etishlari, ularning chet ellarga ijodiy safarlarga chiqishlari, shuningdek, mamlakatimizda bunday tadbirlarning oʻtkazilishini taʼminlash topshirilsin.

3. Oʻzbekiston Respublikasi Moliya vazirligi ushbu Farmonda koʻzda tutilgan sarf-xarajatlarni Madaniyat vazirligining buyurtmasiga muvofiq Oʻzbekiston Respublikasining respublika budjetidan qoplasin.

Markaziy bank tegishli mablagʻlarni belgilangan tartibda erkin muomaladagi valyutaga ayirboshlashni taʼminlasin.

4. Joylardagi bolalar musiqa va sanʼat maktablari oʻqituvchilarini moddiy ragʻbatlantirish va bilim yurtlarining moddiy-texnik bazasini mustahkamlash bilan bogʻliq sarf-xarajatlarning Qoraqalpogʻiston Respublikasi budjeti, viloyatlar va Toshkent shahar mahalliy budjetlari hisobidan qoplanishi belgilab qoʻyilsin.

5. Ommaviy axborot vositalariga yoshlarning madaniyat va sanʼat sohasida erishayotgan yutuqlarini keng targʻib qilish, yangi isteʼdodlarni izlab topish va ularni tanitishda bevosita ishtirok etish tavsiya etilsin.

Oʻzbekiston Respublikasining Prezidenti I. KARIMOV

Toshkent sh.,

1996-yil 31-dekabr,

PF-1692-son