5% li, 10% li, 20% li va 40% li glyukoza inyeksion eritmasini veterinariyada qoʻllash boʻyicha qoʻllanmani tasdiqlash toʻgʻrisida (48-son)
19.03.2008
Oʻzbekiston Respublikasi Qishloq va suv xoʻjaligi vazirligi huzuridagi davlat veterinariya bosh boshqarmasi boshligʻining
buyrugʻi
[Oʻzbekiston Respublikasi Adliya vazirligi bilan kelishilgan holda texnik hujjat deb topilgan. 2008-yil 2-aprel 20-15-89/11-son]
Oʻzbekiston Respublikasining “Veterinariya toʻgʻrisida”gi Qonuni talablarini bajarish maqsadida Oʻzbekiston Respublikasi Vazirlar Mahkamasining 2007-yil 21-dekabrdagi 03-38-144-sonli Bayoniga muvofiq buyuraman:
1. “5 % li, 10% li, 20% li va 40% li glyukoza inyeksion eritmasini veterinariyada qoʻllash boʻyicha Qoʻllanma” ilovaga muvofiq tasdiqlansin.
2. Mazkur hujjat Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.
3. Mazkur Qoʻllanma tasdiqlanishi munosabati bilan Oʻzbekiston Respublikasi Davlat veterinariya bosh boshqarmasi tomonidan 2007-yil 17-avgustda tasdiqlangan “5 % li, 10% li, 20% li va 40% li glyukoza inyeksion eritmasini veterinariyada qoʻllash boʻyicha Qoʻllanma” oʻz kuchini yoʻqotgan deb hisoblansin.
4. Mazkur buyruqning ijrosini nazorat qilishni oʻz zimmamda qoldiraman.
Boshliq v.v.b. M. YUSUPOV
Toshkent sh.,
2008-yil 19-mart,
48-son
Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining 2008-yil 19-martdagi 48-sonli buyrugʻi bilan “TASDIQLANGAN”
5 % li, 10% li, 20% li va 40% li glyukoza inyeksion eritmasini veterinariyada qoʻllash boʻyicha
QOʻLLANMA
I. Umumiy maʼlumotlar
1. 5, 10, 20 va 40 % li glyukoza eritmasi 100, 200 va 400 ml li qon va qon oʻrnini bosadigan moddalarga moʻljallangan shisha butilkalarga qadoqlangan rangsiz yoki sal sargʻishroq tiniq, hidsiz, shirinroq taʼmdagi suyuqlikdan iborat.
2. Butilkalarda TSh 64-15368831-06:2007 ning 1.4.1 bandi talablariga muvofiq ravishda etiketka boʻlishi kerak. Preparat oʻrab joylashtirilgan gofrirlangan karton yashiklarda TSh 64-15368831-06:2007 ning 1.4.2-1-bandi talablariga muvofiq boʻlgan etiketka boʻlishi kerak.
3. Shikastlangan butilkalardan foydalanishga ruxsat etilmaydi.
4. Dorivor preparatning yaroqlilik muddati saqlash shartlariga rioya qilingan taqdirda (quruq joyda, plyus 5°S dan 25°S gacha haroratda) ishlab chiqarilgan kundan boshlab ikki yil.
II. Farmokologik xususiyatlari
5. Glyukoza markaziy asab tizimi, vegetativ asablar, yurak kabi organlarning funksional faoliyatiga samarali taʼsir koʻrsatadi. Glyukoza taʼsiri ostida vegetativ innervatsiyaning boshqaruv taʼsiri sezilarli yaxshilanadi. Buning taʼsiri natijasida yurak-tomir va ovqat hazm qilish tizimlarining faoliyati yaxshilanadi.
Glyukoza ichki sekretsiya bezlari funksiyasida muhim ahamiyatga ega.
Glyukoza juda qimmatli zaharga qarshi vosita hisoblanadi. Bu mishyak, morfin, strixnin, natriy nitriti kabi zaharlar bilan zaharlanganda ham namoyon boʻladi.
III. Qoʻllash tartibi
6. Glyukozani qoʻllash boʻyicha koʻrsatmalar juda turli-tuman. Ushbu preparat markaziy asab tizimi toliqqanda, vegetativ innervatsiya buzilganda, yurak faoliyati zaiflashishining turli koʻrinishlarida, jigar kasalliklarida, tugʻish parezida, intoksikatsiyalarda tavsiya qilinadi. Glyukoza ishtirokida narkotiklar, adrenalin, penitsillin va boshqa qator dorivor moddalarning taʼsir etish vaqti uzayadi.
Preparat quyidagi dozalarda (g larda) qon tomiri orqali yuboriladi:
otlarga: 30,0—120,0;
yirik shoxli mollarga: 30,0—150,0
mayda shoxli mollarga: 6,0—30,0
itlarga: 2,0—8,0
7. Hayvonlar veterinar vrachning doimiy kuzatuvida boʻlishi kerak.
8. Glyukoza qoʻllanilganda uning toʻgʻri kelmasligini koʻrsatuvchi belgilar kuzatilmagan.
9. Preparat hayvonlarga kiritilgandan soʻng, yirik qoramolning goʻshti va sutini, qoʻyning goʻshtini 7 kun davomida isteʼmol qilishga ruxsat etilmaydi.
IV. Ehtiyotkorlik choralari
10. Preparat qoʻllanilayotgan paytda dorivor veterinariya preparatlari bilan ishlashning shaxsiy gigiyena va texnika xavfsizligi qoidalariga rioya qilish kerak.
V. Noroziliklarni bayon etish tartibi
11. Preparat ushbu Qoʻllanma talablariga muvofiq kelmagan taqdirda, uning qoʻllanilishi toʻxtatilib, bu haqida Oʻzbekiston veterinariya preparatlari davlat ilmiy nazorat laboratoriyasiga quyidagi manzil boʻyicha murojaat qilinadi: 100178, Toshkent sh., A.Yunusov koʻchasi, 1a uy. Tel./faks: 228-76-14, 229-30-47. E-mail: [email protected]. Bir vaqtning oʻzida laboratoriyaga preparatning laboratoriya bilan kelishilgan miqdordagi ochilmagan oʻramlari va preparatning qoʻllanmaga muvofiq kelmasligining toʻliq tavsifi joʻnatiladi.