2011-2012-yillarda Toshkent viloyatining Piskent tumanini ijtimoiy-iqtisodiy rivojlantirishga doir kompleks chora-tadbirlar dasturini amalga oshirish toʻgʻrisida (120-son)

27.04.2011

Oʻzbekiston Respublikasi Vazirlar Mahkamasining

qarori

Toshkent viloyati Piskent tumanining iqtisodiy salohiyatini, ishlab chiqarish va ijtimoiy infratuzilmasini yanada rivojlantirish, yer, suv va mehnat resurslaridan samarali va oqilona foydalanish, qishloq xoʻjaligining moddiy-texnika bazasini mustahkamlash, xizmat koʻrsatish va servis sohasi hamda kichik biznes va xususiy tadbirkorlikni rivojlantirish, yangi ish oʻrinlari tashkil etish maqsadida Vazirlar Mahkamasi qaror qiladi:

1. 2011-2012-yillarda Toshkent viloyatining Piskent tumanini ijtimoiy-iqtisodiy rivojlantirishga doir kompleks chora-tadbirlar dasturi (keyingi oʻrinlarda Dastur deb ataladi) 1-ilovaga* muvofiq;

*1-ilova berilmaydi.

Piskent tumanidagi “nol” qiymatida investitsiya kiritish sharti bilan investorlarga bepul beriladigan foydalanilmayotgan va boʻsh turgan obyektlar roʻyxati 2-ilovaga* muvofiq;

*2-ilova berilmaydi.

Piskent tumanidagi ommaviy savdolar orqali sotiladigan boʻsh turgan obyektlar roʻyxati 3-ilovaga* muvofiq tasdiqlansin.

*3-ilova berilmaydi.

2. Quyidagilar Dasturning asosiy yoʻnalishlari etib belgilansin:

tumanni ijtimoiy-iqtisodiy rivojlantirish, aholini ish bilan taʼminlash darajasini oshirish;

tijorat banklari tomonidan moliyaviy qoʻllab-quvvatlash hisobiga kichik biznes va xususiy tadbirkorlikni rivojlantirish;

sanoat mahsulotlari ishlab chiqarish hajmlarini koʻpaytirish, yangi ishlab chiqarish quvvatlarini ishga tushirish hamda mavjud quvvatlarni modernizatsiya qilish;

qishloq xoʻjaligi mahsulotlari yetishtirishni koʻpaytirish, meva-sabzavot mahsulotlari yetishtirishda zamonaviy agrosanoat texnologiyalarini amaliyotga tatbiq etish, qishloq xoʻjaligining moddiy-texnika bazasini mustahkamlash;

ishlab chiqarish va ijtimoiy infratuzilmani rivojlantirish, jumladan ichki yoʻllarni taʼmirlash, aholini ichimlik suv, elektr energiyasi va tabiiy gaz bilan taʼminlash hamda boshqa ijtimoiy-maishiy xizmatlar koʻrsatish darajasini yaxshilash.

3. Oʻzbekiston Respublikasi Davlat mulki qoʻmitasi Toshkent viloyati hokimligi bilan birgalikda 2 va 3-ilovalarga muvofiq xususiylashtirilishi belgilangan davlat obyektlarini savdolarga qoʻyish boʻyicha tegishli choralar koʻrilishini taʼminlasin.

Belgilab qoʻyilsinki, 2-ilovaga muvofiq Piskent tumanida “nol” qiymatida investitsiya kiritish sharti bilan investorlarga bepul beriladigan foydalanilmayotgan va boʻsh turgan obyektlar Toshkent viloyati hokimligi huzuridagi hududiy tanlov komissiyasining qaroriga asosan belgilangan tartibda sotiladi.

4. Dasturga kiritilgan loyihalarning amalga oshirilishini taʼminlash boʻyicha 4-ilovaga* muvofiq tarkibda Muvofiqlashtiruvchi ishchi guruh tashkil etilsin.

*4-ilova berilmaydi.

5. Muvofiqlashtiruvchi ishchi guruhga davlat va xoʻjalik boshqaruvi organlari, tijorat banklari, mahalliy davlat hokimiyati organlarining Dasturda nazarda tutilgan tadbirlarni amalga oshirish bilan bogʻliq faoliyatini muvofiqlashtirish vazifasi yuklansin.

6. Dasturni amalga oshirish uchun masʼul boʻlgan Toshkent viloyati va Piskent tumani hokimliklari, vazirliklar, idoralar, xoʻjalik birlashmalari, tijorat banklari:

belgilangan chora-tadbirlarning Dasturda nazarda tutilgan parametrlar va muddatlarga muvofiq toʻliq bajarilishini taʼminlasinlar;

har oyda barcha yoʻnalishlar boʻyicha Dastur parametrlari bajarilishi yuzasidan monitoring olib borsinlar, ularni hal etish yuzasidan zarur tezkor va qatʼiy chora-tadbirlar koʻrsinlar;

har chorak yakuni boʻyicha keyingi oyning 10-sanasida Oʻzbekiston Respublikasi Iqtisodiyot vazirligiga Dasturning bajarilishi toʻgʻrisida axborot taqdim etsinlar.

7. Oʻzbekiston Respublikasi Iqtisodiyot vazirligi har chorak yakunida tegishli davlat va xoʻjalik boshqaruvi organlari bilan birgalikda mazkur Dasturning bajarilishi holati haqida materiallarni koʻrib chiqish uchun Muvofiqlashtiruvchi ishchi guruhga kiritsin.

8. Toshkent viloyati va Piskent tumani hokimliklari yer uchastkalari va turarjoy boʻlmagan obyektlarni ajratishda, shuningdek biznesni tashkil etish uchun zarur boʻlgan roʻyxatdan oʻtkazish tartibotlarini amalga oshirishda loyihalar tashabbuskorlariga har tomonlama koʻmaklashsinlar.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov va Toshkent viloyati hokimi R.Q. Xolmatov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2011-yil 27-aprel,

120-son