Tadbirkorlik faoliyati subyektlarining quvvati 50 kvtgacha boʻlgan elektr qurilmalarini elektr tarmoqlariga ulashning soddalashtirilgan tartibi toʻgʻrisida nizomni tasdiqlash haqida (2220-son)
27.04.2011
ELEKTR ENERGETIKADA NAZORAT BOʻYIChA DAVLAT INSPEKSIYASI BOShLIGʻINING
buyrugʻi
[Oʻzbekiston Respublikasi Adliya vazirligi tomonidan 2011-yil 27-aprelda roʻyxatdan oʻtkazildi, roʻyxat raqami 2220]
Oʻzbekiston Respublikasi Prezidentining 2011-yil 7-fevraldagi PQ-1474-son “Kichik biznes va xususiy tadbirkorlik yili” Davlat dasturi toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2011-y., 6-son, 47-modda) va Vazirlar Mahkamasining 2011-yil 5-apreldagi 103-son “Tadbirkorlik faoliyati subyektlarining quvvati 50 kVtgacha boʻlgan elektr qurilmalarini elektr tarmoqlariga ulashning soddalashtirilgan tartibini joriy etish toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2011-y., 14-son, 139-modda) muvofiq buyuraman:
1. Tadbirkorlik faoliyati subyektlarining quvvati 50 kVtgacha boʻlgan elektr qurilmalarini elektr tarmoqlariga ulashning soddalashtirilgan tartibi toʻgʻrisida nizom ilovaga muvofiq tasdiqlansin.
2. Elektr energetikada nazorat boʻyicha davlat inspeksiyasi boshligʻining 2005-yil 16-fevraldagi 57-son “Xoʻjalik yurituvchi subyektlarning quvvati 10 kilovattgacha boʻlgan elektr uskunalarini ulash tartibi toʻgʻrisidagi nizomni tasdiqlash haqida”gi buyrugʻi (roʻyxat raqami 1454, 2005-yil 10-mart) (Oʻzbekiston Respublikasi qonun hujjatlari toʻplami, 2005-y., 10-11-son, 76-modda) oʻz kuchini yoʻqotgan deb hisoblansin.
3. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.
Boshliq A. NIMATULLAYEV
Toshkent sh.,
2011-yil 7-aprel,
3-son
Elektr energetikada nazorat boʻyicha davlat inspeksiyasi boshligʻining 2011-yil 7-apreldagi 3-son buyrugʻiga ILOVA
Tadbirkorlik faoliyati subyektlarining quvvati 50 kVtgacha boʻlgan elektr qurilmalarini elektr tarmoqlariga ulashning soddalashtirilgan tartibi toʻgʻrisida
NIZOM
Mazkur Nizom Oʻzbekiston Respublikasi Prezidentining 2011-yil 7-fevraldagi PQ-1474-son “Kichik biznes va xususiy tadbirkorlik yili” Davlat dasturi toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2011-y., 6-son, 47-modda) va Vazirlar Mahkamasining 2011-yil 5-apreldagi 103-son “Tadbirkorlik faoliyati subyektlarining quvvati 50 kVtgacha boʻlgan elektr qurilmalarini elektr tarmoqlariga ulashning soddalashtirilgan tartibini joriy etish toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2011-y., 14-son, 139-modda) muvofiq isteʼmolchilarning quvvati 10 kVtgacha boʻlgan elektr qurilmalarini, shuningdek tadbirkorlik faoliyati subyektlarining, shu jumladan kichik biznes subyektlarining (bundan buyon matnda tadbirkorlik subyektlari deb yuritiladi) quvvati 50 kVt va undan past boʻlgan elektr qurilmalarini elektr tarmoqlariga ulashning soddalashtirilgan tartibini belgilaydi.
I. Umumiy qoidalar
1. Isteʼmolchi (tadbirkorlik subyekti) elektr qurilmalarining yangi va qoʻshimcha quvvatlarini ishga tushirishdan oldin hududiy elektr tarmoqlari korxonalarining elektr tarmoqlariga (bundan bayon matnda elektr tarmoqlari deb yuritiladi) ulash uchun texnik shartlarni olishga majburdir.
2. Elektr tarmoqlariga ulash uchun texnik shartlarsiz (bundan buyon matnda texnik shartlar deb yuritiladi) elektr qurilmalarning elektr taʼminotini loyihalashtirish, uskunalarni montaj qilish va ularni elektr tarmoqlariga ulash taqiqlanadi.
3. Texnik shartlar, shu jumladan qoʻshimcha texnik shartlar toʻlov undirilmasdan beriladi.
4. Tadbirkorlik subyektlarining 50 kVtdan yuqori boʻlgan elektr qurilmalarini elektr tarmoqlariga ulash tartibi Vazirlar Mahkamasining 2009-yil 22-avgustdagi 245-son qarori (Oʻzbekiston Respublikasi qonun hujjatlari toʻplami, 2009-y., 35-son, 382-modda) bilan tasdiqlangan Elektr energiyasidan foydalanish qoidalarining talablariga muvofiq belgilanadi.
5. Mazkur Nizomda quyidagi atamalar va tushunchalardan foydalanilgan:
isteʼmolchi — elektr taʼminoti shartnomasiga muvofiq quvvati 10 kVtgacha boʻlgan elektr qurilmalarini ishlab chiqarish va (yoki) maishiy ehtiyojlar uchun foydalanuvchi yuridik yoki jismoniy shaxs;
subisteʼmolchi — hududiy elektr tarmoqlari korxonasi roziligi bilan isteʼmolchi (tadbirkorlik subyekti)ning elektr tarmoqlariga bevosita ulangan va elektr taʼminoti shartnomasini tuzgan isteʼmolchi (tadbirkorlik subyekti). Elektr energiyasi subisteʼmolchiga berilganda, isteʼmolchi (tadbirkorlik subyekti) elektr energiyasidan foydalanish qoidalariga rioya qilinishi boʻyicha hududiy elektr tarmoqlari oldida javobgar boʻladi;
tadbirkorlik subyektlari — oʻrnatilgan tartibda roʻyxatdan oʻtgan va tadbirkorlik faoliyatini amalga oshirayotgan hamda elektr taʼminoti shartnomasiga muvofiq 10 kVtdan 50 kVtgacha boʻlgan elektr qurilmalarini ishlab chiqarish va (yoki) maishiy ehtiyojlar uchun foydalanuvchi yuridik yoki jismoniy shaxs;
elektr taʼminoti korxonasi — hududiy elektr tarmoqlari korxonasining tuman, shahar, iqtisodiy zona (sanoat zonasi) doirasida elektr energiyasini taqsimlash va sotishni amalga oshiruvchi boʻlinmasi;
elektr qurilmasi — elektr energiyasini ishlab chiqarish, transformatsiya qilish, uzatish, taqsimlash hamda uni energiyaning boshqa turiga aylantirish uchun moʻljallangan mashinalar, apparatlar, elektr uzatish liniyalari va yordamchi uskunalar yigʻindisi (ular oʻrnatilgan inshootlar va binolar bilan birga);
hududiy elektr tarmoqlari korxonasi — viloyat, shahar, iqtisodiy zona (sanoat zonasi) doirasida elektr taʼminoti shartnomasi asosida isteʼmolchilarga elektr energiyasini sotish va taqsimlash huquqiga ega boʻlgan yuridik shaxs.
II. Texnik shartlarni berish va elektr taʼminoti loyihalarini kelishish
6. Elektr qurilmalarning yangi yoki qoʻshimcha quvvatlarini elektr tarmoqlariga ulash uchun texnik shartlar hududiy elektr tarmoqlari korxona (elektr taʼminoti korxona)lari tomonidan tuman (shahar)lar hokimliklari huzuridagi Tadbirkorlik subyektlarini roʻyxatdan oʻtkazish inspeksiyalari orqali tuman (shahar)lar arxitektura va qurilish boshqarma (boʻlim)laridan, isteʼmolchilardan yoki elektr taʼminoti loyihasini ishlab chiqayotgan loyiha tashkilotidan tegishli talabnoma kelib tushganidan soʻng uch ish kunidan koʻp boʻlmagan muddatda beriladi.
7. Texnik shartlarni olish boʻyicha talabnomada isteʼmolchi (tadbirkorlik subyekti) loyihalashtirilayotgan obyektni tavsiflovchi quyidagi maʼlumotlarni qisqacha shaklda koʻrsatadi: yuklama miqdori, isteʼmolchi (tadbirkorlik subyekti)ning elektr taʼminoti ishonchliligi boʻyicha toifasi, oʻrnashgan joyi (aholi punkti bilan bogʻliq kartografiya materiali), obyektni loyihalashtirish va qurish muddatlari.
Quvvati 10 kVt gacha boʻlgan elektr qurilmalari boʻyicha texnik shartlarni olish uchun talabnomalar tegishli elektr taʼminoti korxonalariga, 10 kVtdan 50 kVtgacha boʻlganda esa — talabnomalar tegishli hududiy elektr tarmoqlari korxonalariga yuboriladi.
8. Texnik shartlarning berilishi Vazirlar Mahkamasining 2003-yil 20-avgustdagi 357-son qarori (Oʻzbekiston Respublikasi qonun hujjatlari toʻplami, 2003-y., 15-16-son, 130-modda) bilan tasdiqlangan Tadbirkorlik subyektlarini davlat roʻyxatidan oʻtkazish, hisobga qoʻyish va ruxsat beruvchi hujjatlarni rasmiylashtirish tartibi toʻgʻrisidagi nizomning 491-bandida nazarda tutilgan holatlarda rad etilishi mumkin.
9. Texnik shartlar yaqin joylashgan, ishlab turgan past kuchlanishli elektr tarmoqlaridan beriladi.
Yaqin joylashgan, ishlab turgan past kuchlanishli elektr tarmoqlari boʻlmaganda yoki ushbu elektr tarmoqlarida kuchlanishning yoʻl qoʻyib boʻlmaydigan qiymatlargacha tushib ketishi yoxud elektr energiyasi yoʻqotishlari holatlari aniqlanganda, shuningdek isteʼmolchi (tadbirkorlik subyekti)larning taklifiga koʻra texnik shartlar yuqori kuchlanishli elektr tarmoqlaridan (10-6/0,4 kV transformator punkti (TP)ning qurilishi bilan) berilishi mumkin.
10. Elektr qurilmalarning yangi yoki qoʻshimcha quvvatlarini ulash bilan bogʻliq boʻlmagan ishlab turgan elektr uskunalarini rekonstruksiya qilishga bevosita asoslanmagan talablarni texnik shartlarga kiritish taqiqlanadi.
Elektr qurilmalarning yangi yoki qoʻshimcha quvvatlarini ulash bilan bogʻliq boʻlgan ishlab turgan elektr tarmoqlarini rekonstruksiya qilish (transformatorni, simlarni, kabellarni almashtirish va boshqalar) zaruriyati belgilangan tartibda amalga oshirilgan hisob-kitoblarga asosan elektr taʼminoti loyihasi bilan aniqlanadi.
11. Berilgan texnik shartlarga muvofiq ishlab chiqilgan elektr taʼminoti loyihasi hududiy elektr tarmoqlari korxonasi va “Oʻzdavenergonazorat” inspeksiyasi bilan kelishilishi lozim, quvvati 10 kVtgacha boʻlgan elektr taʼminoti loyihalari bundan mustasno.
Bunda quvvati 10 kVtgacha boʻlgan elektr qurilmalarining hisob-montaj sxemasi elektr taʼminoti loyihasi boʻlib hisoblanadi.
12. Elektr taʼminoti loyihasini kelishish muddati har bir kelishuvchi tashkilot uchun uch ish kunidan oshmasligi lozim.
13. Agar isteʼmolchining yuklamasi ortishi sababli undagi elektr qurilmalarning umumiy quvvatini 10 kVtdan oshirish talab etilsa, qoʻshimcha texnik shartlar olinishi lozim. Bunda elektr qurilmalarning elektr tarmoqlariga avval ulangan quvvati hisobga olingan holda elektr taʼminoti loyihasi ishlab chiqiladi va ushbu Nizomda belgilangan tartibda kelishiladi.
III. Elektr qurilmalarini elektr tarmoqlariga ulash
14. Elektr qurilmalar quyidagilar amalga oshirilganda elektr tarmoqlariga ulanadi va ularga kuchlanish beriladi:
elektr qurilmalarining quvvati 10 kVtgacha boʻlganda isteʼmolchining ushbu Nizomning 1-ilovasiga muvofiq ariza-majburiyati elektr taʼminoti korxonasiga taqdim etilganda;
elektr qurilmalarining quvvati 10 kVtdan 50 kVtgacha boʻlganda elektr qurilmalarni ekspluatatsiya qilishga ijozat berish toʻgʻrisidagi dalolatnoma mavjud boʻlganda;
elektr energiyasi isteʼmolini hisobga olish va nazorat qilishning avtomatlashtirilgan tizimida ishlay oladigan, belgilangan tartibda qiyoslashdan oʻtkazilgan hisobga olish priborlari oʻrnatilganda;
elektr energiyasidan foydalanish shartnomasi tuzilganida.
15. Quvvati 10 kVtgacha boʻlgan elektr qurilmalarini elektr tarmoqlariga ulash uchun isteʼmolchi elektr taʼminoti korxonasiga ushbu Nizomning 1-ilovasiga muvofiq ariza-majburiyatni taqdim etadi.
16. Elektr taʼminoti korxonasi isteʼmolchining ariza-majburiyatini olgan kundan eʼtiboran uch kunlik muddatda berilgan texnik shartlarning bajarilganligini tekshiradi va texnik shartlardan chetga chiqishlar aniqlanmaganda, shuningdek hisobga olish priborlari toʻgʻri ulangan taqdirda isteʼmolchi bilan elektr taʼminoti shartnomasini tuzadi.
17. Isteʼmolchi tomonidan berilgan texnik shartlardan chetga chiqishlarga yoʻl qoʻyilganda, shu jumladan elektr qurilmalarining quvvati 10 kVtdan oshirilganda, shuningdek hisobga olish priborlari toʻgʻri ulanmaganda, ushbu kamchiliklar bartaraf etilgunga qadar elektr taʼminoti korxonasi bilan elektr taʼminoti shartnomasi tuzilishiga yoʻl qoʻyilmaydi va bu haqda kamchiliklar aniq koʻrsatilgan holda belgilangan tartibda isteʼmolchi xabardor qilinadi.
18. Quvvati 10 kVtdan 50 kVtgacha boʻlgan elektr qurilmalarni ekspluatatsiya qilishga ijozat berish toʻgʻrisidagi dalolatnomani olish uchun tadbirkorlik subyektlari (pudrat tashkilotlari) “Oʻzdavenergonazorat” inspeksiyasining hududiy boʻlimlariga quyidagi hujjatlarni taqdim etadilar:
elektr qurilmalarini koʻrikdan oʻtkazish va ularni ekspluatatsiya qilishga ijozat berish toʻgʻrisidagi dalolatnomani olish uchun ariza;
tadbirkorlik subyektini davlat roʻyxatidan oʻtkazilganligi toʻgʻrisidagi guvohnomaning nusxasi;
ushbu Nizomning 2-ilovasiga muvofiq texnik hujjatlar.
19. “Oʻzdavenergonazorat” inspeksiyasi hududiy boʻlimining inspektori (bundan buyon matnda inspektor deb yuritiladi) ariza berilgan kundan eʼtiboran uch kunlik muddatda tadbirkorlik subyektining elektr qurilmalarini koʻrikdan oʻtkazadi.
Bunda elektr qurilmalarni koʻrikdan oʻtkazish tekshiruv boʻlib hisoblanmaydi va koʻrik oʻtkazilganligi haqidagi maʼlumotlar tadbirkorlik subyektlarining Tekshirishlarni roʻyxatga olish kitobiga kiritilmaydi.
20. Elektr qurilmalarni koʻrikdan oʻtkazishda inspektor elektr qurilmalarni montaj qilishdagi kamchiliklarning yoʻqligini, ulanish texnik shartlarga muvofiqligini, belgilangan tartibda sertifikatsiya qilinishi lozim boʻlgan montaj qilingan yoki qayta tiklangan elektr qurilmalar uchun muvofiqlik sertifikati hamda belgilangan texnik hujjatlar mavjudligini, shuningdek elektr xoʻjaligining xavfsiz ekspluatatsiya qilinishi uchun javobgar shaxs tayinlanganligini yoki yollanganligini tekshiradi.
Elektr qurilmalarni boshqa shartlar boʻyicha koʻrikdan oʻtkazilishiga hamda yuqorida qayd etilganlardan tashqari boshqa hujjatlarni talab qilinishiga yoʻl qoʻyilmaydi.
21. Tadbirkorlik subyekti (isteʼmolchi) tomonidan chakana savdo tarmogʻiga aholiga sotish uchun kelib tushayotgan va tegishli muvofiqlik sertifikatiga ega boʻlgan 400 voltgacha kuchlanishli yoritish qurilmalari, elektr asboblari va elektr mashinalaridan foydalanilganda, shuningdek elektr xoʻjaligining xavfsiz ekspluatatsiya qilinishi uchun javobgar shaxsni tayinlash yoki yollash imkoniyati boʻlmagan taqdirda, elektr xoʻjaligining xavfsiz ekspluatatsiya qilinishi uchun javobgarlikni tadbirkorlik subyekti (isteʼmolchi)ning oʻzi (yuridik shaxsning rahbari) oʻz zimmasiga olishi mumkin.
Bunda elektr xoʻjaligining xavfsiz ekspluatatsiya qilinishi uchun javobgarlikni oʻz zimmasiga olgan shaxsga inspektor tomonidan elektr qurilmalarni koʻrikdan oʻtkazish bilan bir vaqtda elektr qurilmalarni ekspluatatsiya qilishda xavfsizlik texnikasi boʻyicha yoʻriqnoma beriladi va bu haqda yoʻriqnomalarni roʻyxatga olish jurnaliga qayd qilinadi.
22. Ushbu Nizomning 20-bandida koʻrsatilgan talablar bajarilgan taqdirda inspektor elektr qurilmalarni ekspluatatsiya qilishga ijozat berilishi toʻgʻrisidagi dalolatnomani rasmiylashtiradi.
23. Inspektor tomonidan elektr qurilmalarni koʻrikdan oʻtkazishda ushbu Nizomning 20-bandida koʻrsatilgan talablarning bajarilishida kamchiliklar aniqlanganda, ushbu kamchiliklar bartaraf etilgunga qadar elektr qurilmalarini ekspluatatsiya qilishga ijozat berilishi toʻgʻrisidagi dalolatnomani berish rad etiladi va bu haqda kamchiliklar aniq koʻrsatilgan holda belgilangan tartibda tadbirkorlik subyekti xabardor qilinadi.
Elektr qurilmalarini ekspluatatsiya qilishga ijozat berish toʻgʻrisidagi dalolatnoma berilishini boshqa sabablar boʻyicha rad etishga yoʻl qoʻyilmaydi.
24. Isteʼmolchining quvvati 10 kVtgacha boʻlgan hamda tadbirkorlik subyektining quvvati 10 kVtdan 50 kVtgacha boʻlgan yangi va rekonstruksiya qilingan elektr qurilmalarini, shuningdek subisteʼmolchining elektr qurilmalarini, shu jumladan yangi va rekonstruksiya qilingan elektr qurilmalarini elektr tarmoqlariga ulash ushbu Nizomda belgilangan tartib boʻyicha amalga oshiriladi.
25. Elektr taʼminoti korxonasi tadbirkorlik subyekti bilan elektr taʼminoti shartnomasini tuzishi uchun inspektor tomonidan berilgan elektr qurilmalarni ekspluatatsiya qilishga ijozat berish toʻgʻrisidagi dalolatnoma hamda hisobga olish pribori toʻgʻri ulanganligi asos boʻlib hisoblanadi.
26. Elektr taʼminoti shartnomasi tuzilgan kundan eʼtiboran elektr taʼminoti korxonasi isteʼmolchi (tadbirkorlik subyekti)ning elektr qurilmalarini elektr energetika tizimining tarmoqlariga ulashni amalga oshiradi.
27. Elektr qurilmalar elektr tarmoqqa ulangan kunda elektr taʼminoti korxonasi tomonidan toʻgʻri ulangan hisobga olish priborlarining klemmnik qopqoqlari plombalanadi.
28. Tadbirkorlik subyekti (isteʼmolchi)ning elektr qurilmalarini elektr tarmoqlariga ulash va ularga kuchlanishni berish elektr taʼminoti korxonasi tomonidan ulanayotgan obyektning rahbari yoki elektr xoʻjaligining xavfsiz ekspluatatsiya qilinishi uchun javobgar shaxsi ishtirokida amalga oshirilishi shart.
29. Elektr qurilmalarni ulanayotgan obyektning rahbari yoki elektr xoʻjaligining xavfsiz ekspluatatsiya qilinishi uchun javobgar shaxsi hamda elektr taʼminoti korxonasining xodimlari ishtirokisiz elektr tarmoqlariga ulash man etiladi.
30. Isteʼmolchining elektr uskunalarini texnik koʻrikdan oʻtkazgan va ekspluatatsiya qilishga ijozat bergan inspektor va hududiy elektr tarmoqlari korxonasi elektr qurilmalarni ekspluatatsiya qilish jarayonida bir maromda ishlashi uchun javobgar boʻlmaydi.
IV. Yakuniy qoida
31. Mazkur Nizom Oʻzbekiston Respublikasi Davlat arxitektura va qurilish qoʻmitasi, Monopoliyadan chiqarish va raqobatni rivojlantirish Davlat qoʻmitasi, “Oʻzbekenergo” DAK va “Qishloqenergoloyiha” OAJ bilan kelishilgan.
Davlat arxitektura va qurilish qoʻmitasi raisi B. XODJAYEV
2011-yil 5-aprel
Monopoliyadan chiqarish va raqobatni rivojlantirish Davlat qoʻmitasi raisi J. ISMAILOV
2011-yil 5-aprel
“Oʻzbekenergo” DAK Boshqaruvi raisi B. TEShABOYEV
2011-yil 5-aprel
“Qishloqenergoloyiha” OAJ direktori Z. ABDUJABBAROV
2011-yil 5-aprel
Tadbirkorlik faoliyati subyektlarining quvvati 50 kVtgacha boʻlgan elektr qurilmalarini elektr tarmoqlariga ulashning soddalashtirilgan tartibi toʻgʻrisidagi nizomga 1-ILOVA
Tadbirkorlik faoliyati subyektlarining quvvati 50 kVtgacha boʻlgan elektr qurilmalarini elektr tarmoqlariga ulashning soddalashtirilgan tartibi toʻgʻrisidagi nizomga 2-ILOVA
Tadbirkorlik subyektlarining quvvati 10 kVtdan 50 kVtgacha boʻlgan elektr qurilmalarini ekspluatatsiyaga qabul qilish imkoniyatini aniqlash uchun taqdim etilishi kerak boʻlgan texnik hujjatlarning
ROʻYXATI
1. Ulash uchun texnik shartlar.
2. Elektr taʼminoti loyihasi.
3. Elektr taʼminoti loyihasini texnik shartlarni bergan tashkilot va “Oʻzdavenergonazorat” inspeksiyasi bilan kelishilganligi toʻgʻrisidagi maʼlumot.
4. Elektr xoʻjaligining xavfsiz ekspluatatsiya qilinishi uchun javobgar shaxsni tayinlash toʻgʻrisidagi buyruqdan koʻchirma.
5. Xavfsizlik texnikasi boʻyicha mavjud boʻlgan himoya vositalarining roʻyxati.
6. Taqdim etilgan texnik hujjatlarning tadbirkorlik subyektining rahbari yoki elektr xoʻjaligining xavfsiz ekspluatatsiya qilinishi uchun javobgar shaxsi tomonidan tasdiqlangan roʻyxati.
7. Kabel va havo liniyasining ijro chizmasi.
8. Kabelni yotqizish, mexanik shikastlanishlardan himoya qilish boʻyicha ishlarni ochish dalolatnomasi.
9. Kabelni yotqizilishidan (montaj qilinishidan) keyingi sinash bayonnomasi.
10. Simlar va elektr uskunalar izolatsiyasining qarshiligini oʻlchash bayonnomasi.
11. Zaminlagichlar va zaminlanuvchi elementlar oʻrtasida zanjir mavjudligini tekshirish bayonnomasi.
12. Zaminlovchi qurilmalar qarshiligini oʻlchash bayonnomasi.
13. 10-6/0,4 kV transformator punktini (TP) oʻrnatishda yoki ishlab turgan TPda transformatorni almashtirishda:
zaminlash konturini bajarish boʻyicha ijro chizmasi va ishlarni ochish dalolatnomasi (faqat yangi TPni ishga tushirishda);
kuch transformatorini sinash bayonnomasi;
transformator moyining qisqartma tahlili bayonnomasi;
yuqori kuchlanishli shinalarni sanoat chastotasida oshirilgan kuchlanish bilan sinash bayonnomasi;
TPni zaminlash konturining qarshiligini oʻlchash bayonnomasi.
Izoh: 5—12-bandlarda koʻrsatilgan hujjatlar tarmoqning tegishli elementlarini ishga tushirish hollarida zarur boʻladi.