Hayvon va parrandalarning infeksion kasalliklarini davolash va oldini olishda tiamfenikol 20%li preparat kukunini qoʻllash boʻyicha qoʻllanmani tasdiqlash toʻgʻrisida (39-son)
19.03.2008
Oʻzbekiston Respublikasi Qishloq va suv xoʻjaligi vazirligi huzuridagi davlat veterinariya bosh boshqarmasi boshligʻining
buyrugʻi
[Oʻzbekiston Respublikasi Adliya vazirligi bilan kelishilgan holda texnik hujjat deb topilgan. 2008-yil 2-aprel 20-15-89/11-son]
Oʻzbekiston Respublikasining “Veterinariya toʻgʻrisida”gi Qonuni talablarini bajarish maqsadida Oʻzbekiston Respublikasi Vazirlar Mahkamasining 2007-yil 21-dekabrdagi 03-38-144-sonli Bayoniga muvofiq buyuraman:
1. “Hayvon va parrandalarning infeksion kasalliklarini davolash va oldini olishda tiamfenikol 20%li preparat kukunini qoʻllash boʻyicha Qoʻllanma” ilovaga muvofiq tasdiqlansin.
2. Mazkur hujjat Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.
3. Mazkur Qoʻllanma tasdiqlanishi munosabati bilan Oʻzbekiston Respublikasi Davlat veterinariya bosh boshqarmasi tomonidan 2007-yil 14-avgustda tasdiqlangan “Hayvon va parrandalarning infeksion kasalliklarini davolash va oldini olishda tiamfenikol 20%li preparat kukunini qoʻllash boʻyicha Qoʻllanma” oʻz kuchini yoʻqotgan deb hisoblansin.
4. Mazkur buyruqning ijrosini nazorat qilishni oʻz zimmamda qoldiraman.
Boshliq v.v.b. M. YUSUPOV
Toshkent sh.,
2008-yil 19-mart,
39-son
Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining 2008-yil 19-martdagi 39-sonli buyrugʻi bilan “TASDIQLANGAN”
Hayvon va parrandalarning infeksion kasalliklarini davolash va oldini olishda tiamfenikol 20%li preparat kukunini qoʻllash boʻyicha
QOʻLLANMA
I. Umumiy maʼlumotlar
1. Tiamfenikol 20%li kukuni (Tiamphenicol pulvis 20%) — faol taʼsir etuvchi moddasi sifatida tiamfenikol antibiotikli preparat. Sinonimlari: Tiamfenikola glitsinat atsetilsisteinat, fluimutsil.
2. Tarkibi: 100 g preparat tarkibida 20,0 g (20000000 UE) tiamfenikol va 80,0 g toʻldiruvchi mavjud.
3. Tashqi koʻrinishiga koʻra bir turdagi oqdan och sariq ranggacha boʻlgan, achchiq taʼmli kukun.
4. Chiqarilish shakli — banka va polietilen flakonlarga yoki alyumin folgali yoki aralash materiallardan tayyorlangan paketlarga 10,0; 20,0; 50,0; 100,0; 200,0; 400,0; 500,0 va 1000,0 g dan qadoqlangan kukun.
Preparat quruq binoda, bolalar qoʻli yetmaydigan joyda, 25°S dan yuqori boʻlmagan haroratda, “B” roʻyxati boʻyicha saqlanadi.
Preparatning yaroqlilik muddati saqlash qoidalariga rioya qilinganda tayyorlangan kunidan boshlab 3 yil.
II. Farmakologik xususiyatlari
5. Preparat tarkibiga kiruvchi tiamfenikol amfenikollar guruhiga mansub antibiotik. U xloramfenikolga oʻxshash va keng koʻlamdagi bakteriyalarga qarshi taʼsirga ega. Grammusbat va grammanfiy mikroorganizmlar, rikketsiylar, baʼzi yirik viruslar va protozoylar, streptokokklar, stafilokokklar, pnevmokokklar, kolibakteriyalar, salmonellalar, pasterellalar, spiroxetlar, psitakkoz viruslari (ornitoz), Q — bezgagi va boshqalarning rivojlanishini kamaytiradi. Xloramfenikoldan farqli ravishda u aplastik anemiyani vujudga keltirmaydi (bosh miya suyagiga qon yetkazish funksiyasi pasayishi taʼsirida qondagi gemoglobin moddasining kamayib ketishi), jigar va buyrakka zarar yetkazmaydi.
6. Preparat organizmdan asosan axlat va siydik orqali ajraladi.
III. Qoʻllash tartibi
7. Ot va toylarga, yirik va mayda shoxli molga: nafas va hazm qilish organlarining oʻtkir va surunkali kasalliklari (qoʻzgʻatuvchilari grammanfiy organizmlar boʻlgan pnevmoniyalar, enterit, kolibakterioz, salmonellez, pasterellez, bakterial artiritlar, septitsemiyalar) da qoʻllaniladi.
8. Ona choʻchqalarning “metrit-mastit-agalaktiya” sindromi (MMA-sindromi), nafas olish va hazm qilish organlari infeksiyalari (shu jumladan salmonellez, dizenteriya) va boshqa infeksiyalarini davolash maqsadida qoʻllaniladi.
9. Parrandalarning mikoplazmoz, nafas va hazm qilish organlari infeksiyalarini (shu qatorda infeksion rinit, pasterellez, salmonellez, koliinfeksiya va boshqalar) davolashda qoʻllaniladi.
10. Preparat oral ravishda qoʻllaniladi, kukunning kerakli dozasi kasal hayvonning bir martalik ovqatlanishiga moʻljallangan ozuqasining 1/2-1/3 qismiga yaxshilab aralashtiriladi. Dozirovkasi: 3,5-4,5 g/ kg ozuqaga (700000-900000 UE). Davolash kursi 3—5 kun.
11. Tavsiya etilgan dozalarda qoʻshimcha asoratlar kuzatilmaydi. Doza oshirib yuborilganda tomir toritishishi, kollaps va nafas olish qiyinlashuvi paydo boʻladi. Analeptiklar va simptomatik davolash belgilanadi.
12. Kavsh qaytaruvchi hayvonlarga katta dozalarda yuborilganda tiamfenikol ovqat hazm qilish traktini mikroflorasini boʻshashtiradi va mikozlar, avitaminozlar, oshqozon oldi atoniyasi va timpaniyasini qoʻzgʻatadi. Bunday hollarda Gastrovet, Rumiton preparatlarini hoʻllash tavsiya etiladi.
13. Preparatni siydik yoʻllari, nafas va ovqat hazm qilish organlarining mikotik kasalliklarida, hamda amfenikollarga oʻta taʼsirchanlikda qoʻllash tavsiya etilmaydi. Preparat achitqilar, sulfanilamidlar, urotropin bilan birga qoʻllanilmaydi. Tetratsiklinlar safiga mansub antibiotiklar bilan birga qoʻllanilishi mumkin. Preparatning terapevtik taʼsiri hayvonlarga vitaminlarga boy ozuqalar berilganda kuchayadi.
14. Hayvonlarni soʻyishga preparat soʻnggi marta qoʻllanilgandan keyin 10 kun, parrandalarni 5 kun oʻtgach ruxsat etiladi.
Sutdan isteʼmol maqsadida foydalanishga preparat qoʻllanilgach 3 kundan soʻng ruxsat etiladi.
15. Belgilangan muddatdan avval soʻyilgan goʻsht va olingan tuxumdan goʻshtxoʻr hayvonlarga yemish sifatida yoki goʻsht suyak uni ishlab chiqarishda foydalaniladi.
IV. Shaxsiy profilaktika choralari
16. Preparat bilan ishlashda shaxsiy gigiyena va xavfsizlik texnikasining umumiy qoidalariga rioya etish lozim.
V. Noroziliklarni bayon etish tartibi
17. Preparat ushbu Qoʻllanma talablariga muvofiq kelmagan taqdirda, uning qoʻllanilishi toʻxtatilib, bu haqida Oʻzbekiston veterinariya preparatlari davlat ilmiy nazorat laboratoriyasiga quyidagi manzil boʻyicha murojaat qilinadi: 100178, Toshkent sh., A.Yunusov koʻchasi, 1a uy. Tel./faks: 228-76-14, 229-30-47. E-mail: [email protected]. Bir vaqtning oʻzida laboratoriyaga preparatning laboratoriya bilan kelishilgan miqdordagi ochilmagan oʻramlari va preparatning qoʻllanmaga muvofiq kelmasligining toʻliq tavsifi joʻnatiladi.