Barcha yoshdagi mushuklar uchun la-cat quruq ozuqasini qoʻllash boʻyicha qoʻllanmani tasdiqlash toʻgʻrisida (34-son)

19.03.2008

Oʻzbekiston Respublikasi Qishloq va suv xoʻjaligi vazirligi huzuridagi davlat veterinariya bosh boshqarmasi boshligʻining

buyrugʻi

[Oʻzbekiston Respublikasi Adliya vazirligi bilan kelishilgan holda texnik hujjat deb topilgan. 2008-yil 2-aprel 20-15-89/11-son]

Oʻzbekiston Respublikasining “Veterinariya toʻgʻrisida”gi Qonuni talablarini bajarish maqsadida Oʻzbekiston Respublikasi Vazirlar Mahkamasining 2007-yil 21-dekabrdagi 03-38-144-sonli Bayoniga muvofiq buyuraman:

1. “Barcha yoshdagi mushuklar uchun La-Cat quruq ozuqasini qoʻllash boʻyicha Qoʻllanma” ilovaga muvofiq tasdiqlansin.

2. Mazkur hujjat Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kun oʻtgandan keyin kuchga kiradi.

3. Mazkur Qoʻllanma tasdiqlanishi munosabati bilan Oʻzbekiston Respublikasi Davlat veterinariya bosh boshqarmasi tomonidan 2007-yil 24-dekabrda tasdiqlangan “Barcha yoshdagi mushuklar uchun La-Cat quruq ozuqasini qoʻllash boʻyicha Qoʻllanma” oʻz kuchini yoʻqotgan deb hisoblansin.

4. Mazkur buyruqning ijrosini nazorat qilishni oʻz zimmamda qoldiraman.

Boshliq v.v.b. M. YUSUPOV

Toshkent sh.,

2008-yil 19-mart,

34-son

Oʻzbekiston Respublikasi Qishloq va suv xoʻjaligi vazirligi huzuridagi Davlat veterinariya bosh boshqarmasining 2008-yil 19-martdagi 34-sonli buyrugʻi bilan “TASDIQLANGAN”

Barcha yoshdagi mushuklar uchun La-Cat quruq ozuqasini koʻllash boʻyicha

QOʻLLANMA

I. Umumiy maʼlumotlar

1. La-Cat — barcha yoshdagi mushuklar uchun meʼyorlashtirilgan quruq ozuqa. Komponentlari: vitaminlar, mikroelementlar va minerallar bilan boyitilgan uy parrandalarining yanchilgan ozuqa submahsulotlari, yirik tortilgan donli un (bugʻdoy, makkajoʻxori, guruch gʻallasi), don yelimshagi, baliq uni, pivo achitqisi, uy parrandalari yogʻlari, isteʼmol tuzi, tabiiy xushboʻy qoʻshimchalar, VNT antioksidanti, taurin.

Tarkibida konservantlar yoʻq.

2. Tashqi koʻrinishiga koʻra shakli va teksturasi mushuklarning tishlari va milklarini sogʻlomlashtirish uchun moslangan jigarrangli quruq granulalar.

3. La-Cat turli xil tabiiy xushboʻy qoʻshimchalar: joʻja hidi (La-Cat Chicken), baliq (La-Cat Fish), jigar (La-Cat Liver) va aralashgan hidli (La-Cat Mix) qoʻshimchalar bilan birgalikda, sof ogʻirligi 125 g., 400 g. va 3 kg boʻlgan folga qogʻozli paketlarga va laminatsiyalangan karton qutilarga qadoqlanadi.

4. Ozuqa yopiq oʻramlarda quruq, salqin joyda saqlanadi.

Yaroqlilik muddati saqlash shartlariga rioya qilinganda tayyorlangan kunidan boshlab 12 oy.

Odamlar isteʼmol qilishi uchun belgilanmagan.

II. Biologik xususiyatlari

5. La-Cat — isteʼmolga tayyor boʻlgan ozuqa boʻlib, oson chaynaladi va hazm boʻladi, nozik va yoqimli mazaga ega. Tarkibida mushuklar organizmi talablariga mos keluvchi, miqdoriy va foiz hisobida meʼyorlashtirilgan, zarur boʻlgan barcha toʻyimli moddalar mavjud.

Ozuqa siydik chiqarish yoʻllarida tosh paydo boʻlishining, uning tarkibidagi taurin esa — shuningdek koʻrlik va yurak kasalliklarining oldini oladi.

6. Kafolatlangan analitik tarkibi: oqsil 30 %, yogʻ 13 %, namligi 6,5 %, tolalar 2 %, kul 6,5 %, kalsiy 1,1 %, fosfor 0,9 %, magniy 0,11 %, tuz 1,5 %, taurin 0,15 %, vitamin A 20000 HB/kg, vitamin D3 1200 HB/kg, vitamin E 200 HB/kg. Koʻrsatilgan tarkibdan yoʻl qoʻyilgan farqlar 3% dan ortmasligi kerak.

Metabolik energiya 3600 kkal/kg.

III. Qoʻllash tartibi

7. 3-4 kg vazndagi katta yoshli mushuklarga, bir kunda 70-80 g. ozuqa talab etiladi. Mushuklarni kuniga ikki marta, kunlik ratsionning teng yarmini taʼminlagan holda boqish tavsiya etiladi. Biroq, aksariyat mushuklar, ular organizmi talab etgandan ortiq ozuqani qabul qila olmasligini hisobga olgan holda, xoʻrakni ozuqaning kunlik ehtiyojiga koʻra ertalab bir mahal yoki yeyishiga qarab toʻldirish mumkin.

8. Boshqa turdagi ozuqadan La-Cat ga oʻtkazish asta-sekinlik bilan, uning miqdorini oshirish va shu paytgacha berilgan ozuqani kamaytirish orqali, 7—10 kun davomida amalga oshiriladi.

9. Mushuk bolalarini ozroq miqdordagi La-Cat bilan, uni suvda ivitib, 3-4 haftaligidan boshlab boqish tavsiya etiladi. Mushuk bolalari ratsionidagi La-Cat miqdori ham asta-sekin oshiriladi.

10. La-Cat hayvon xohishiga koʻra, quruq holda yoki suv qoʻshib beriladi. Mushuklarga La-Cat ozuqaning yagona turi sifatida berilishi tavsiya qilinadi. Shu bilan birga, mushuklarning toza chuchuk suv bilan doimo bemalol taʼminlanishlarini kuzatib borish zarur.

IV. Noroziliklarni bayon etish tartibi

11. Ozuqa ushbu Qoʻllanma talablariga muvofiq kelmagan taqdirda, uning qoʻllanilishi toʻxtatilib, bu haqida Oʻzbekiston veterinariya preparatlari davlat ilmiy nazorat laboratoriyasiga quyidagi manzil boʻyicha murojaat qilinadi; 100178, Toshkent sh., A.Yunusov koʻchasi, 1a uy. Tel./faks: 228-76-14, 229-30-47. E-mail: [email protected]. Bir vaqtning oʻzida laboratoriyaga ozuqaning laboratoriya bilan kelishilgan miqdordagi ochilmagan oʻramlari va ozuqaning qoʻllanmaga muvofiq kelmasligining toʻliq tavsifi joʻnatiladi.