Xodimlar soni va mehnatga haq toʻlash fondining eng kam meʼyorlari joriy etilishini hisobga olgan holda soliqlar va boshqa majburiy toʻlovlarni hisoblab chiqarish va toʻlash tartibi toʻgʻrisidagi nizomni tasdiqlash haqida (2200-son)

23.02.2011

OʻZBEKISTON RESPUBLIKASI DAVLAT SOLIQ QOʻMITASI OʻZBEKISTON RESPUBLIKASI MOLIYA VAZIRLIGINING

Qarori

[Oʻzbekiston Respublikasi Adliya vazirligi tomonidan 2011-yil 23-fevralda roʻyxatdan oʻtkazildi, roʻyxat raqami 2200]

Oʻzbekiston Respublikasi Prezidentining 2010-yil 24-dekabrdagi PQ-1449-son “Oʻzbekiston Respublikasining 2011-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2010-y., 52-son, 513-modda) muvofiq Oʻzbekiston Respublikasi Davlat soliq qoʻmitasi va Moliya vazirligi qaror qiladilar:

1. Xodimlar soni va mehnatga haq toʻlash fondining eng kam meʼyorlari joriy etilishini hisobga olgan holda soliqlar va boshqa majburiy toʻlovlarni hisoblab chiqarish va toʻlash tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Davlat soliq qoʻmitasi raisi B. PARPIYEV

Toshkent sh.,

2011-yil 2-fevral,

2011-5-son

Moliya vaziri R. AZIMOV

Toshkent sh.,

2011-yil 2-fevral,

6-son

Oʻzbekiston Respublikasi Davlat soliq qoʻmitasi va Moliya vazirligining 2011-yil 2-fevraldagi 2011-5, 6-son qaroriga ILOVA

Xodimlar soni va mehnatga haq toʻlash fondining eng kam meʼyorlari joriy etilishini hisobga olgan holda soliqlar va boshqa majburiy toʻlovlarni hisoblab chiqarish va toʻlash tartibi toʻgʻrisida

NIZOM

Mazkur Nizom Oʻzbekiston Respublikasi Prezidentining 2010-yil 24-dekabrdagi PQ-1449-son “Oʻzbekiston Respublikasining 2011-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2010-y., 52-son, 513-modda) muvofiq xodimlar soni va Mehnatga haq toʻlash fondining eng kam meʼyorlarini joriy etilishini hisobga olgan holda soliqlar va boshqa majburiy toʻlovlarni hisoblab chiqarish va toʻlash tartibini belgilaydi.

I. Umumiy qoidalar

1. 2011-yilning 1-yanvaridan chakana savdo, umumiy ovqatlanish va qurilish sohasida faoliyat yurituvchi tashkilotlar uchun Xodimlar soni va mehnatga haq toʻlash fondining belgilangan eng kam meʼyorlarini hisobga olingan holda soliqlar va boshqa majburiy toʻlovlarni hisoblab chiqarish va toʻlash tartibi joriy etiladi.

Xodimlar soni va mehnatga haq toʻlash fondining eng kam meʼyorlari Iqtisodiyotning ayrim tarmoqlari xoʻjalik yurituvchi subyektlari uchun xodimlar soni va Mehnatga haq toʻlash fondining eng kam meʼyorlarini aniqlash tartibi toʻgʻrisidagi nizomda (roʻyxat raqami 2173, 2010-yil 28-dekabr) (Oʻzbekiston Respublikasi qonun hujjatlari toʻplami, 2010-y., 52-son, 527-modda) belgilangan tartibda aniqlanadi.

Chakana savdo, umumiy ovqatlanish va qurilish tashkilotlariga Yagona ijtimoiy toʻlovning eng kam miqdori kiritilishi munosabati bilan yagona ijtimoiy toʻlovni hisoblab chiqarish va toʻlash tartibi toʻgʻrisidagi nizom (roʻyxat raqami 2095, 2010-yil 13-aprel) (Oʻzbekiston Respublikasi qonun hujjatlari toʻplami, 2010-y., 14-15-son, 120-modda) bilan belgilangan ijtimoiy toʻlovni hisoblab chiqarish va toʻlash tartibi tatbiq etilmaydi.

2. Yagona ijtimoiy toʻlovni, fuqarolarning sugʻurta badallarini va jismoniy shaxslardan olinadigan daromad soligʻini hisoblab chiqarish va toʻlash mazkur Nizomning 1-bandida koʻrsatilgan soliq toʻlovchilar tomonidan Oʻzbekiston Respublikasi Soliq kodeksida (Oʻzbekiston Respublikasi qonun hujjatlari toʻplami, 2007-y., 52 (I)-son) belgilangan tartibda amalga oshiriladi.

Xodimlar soni va Mehnatga haq toʻlash fondining belgilangan eng kam meʼyorlariga rioya qilinmagan taqdirda mazkur Nizomning 1-bandida koʻrsatilgan soliq toʻlovchilar tasdiqlangan meʼyorlardan kelib chiqqan holda mazkur Nizomda belgilangan tartibda yagona ijtimoiy toʻlovni, fuqarolarning sugʻurta badallarini va jismoniy shaxslardan olinadigan daromad soligʻini (keyingi oʻrinlarda toʻlovlar deb yuritiladi) qoʻshimcha hisoblashlari shart.

3. Mazkur Nizom maqsadlarida quyidagi asosiy tushunchalardan foydalaniladi:

chakana savdo tashkilotlari — hisobot oyi yakunlari boʻyicha asosiy faoliyat turi chakana savdo boʻlgan yuridik shaxslar;

umumiy ovqatlanish tashkilotlari — hisobot oyi yakunlari boʻyicha asosiy faoliyat turi umumiy ovqatlanish boʻlgan yuridik shaxslar;

qurilish tashkilotlari — hisobot oyi yakunlari boʻyicha asosiy faoliyat turi quyidagi turdagi qurilish ishlarini bajarish boʻlgan yuridik shaxslar:

barcha turdagi binolar, sport inshootlarini qurish, taʼmirlash va rekonstruksiya qilish, shuningdek qurilish maydonlaridagi yigʻma qurilish konstruksiyalarini montaj qilish;

bino va inshootlarni qurish va rekonstruksiya qilishda qurilish maydonini tayyorlash;

har xil turdagi bino va inshootlar uchun umumiy boʻlgan bir yoʻnalishga ixtisoslashtirilgan hamda maxsus malaka va asbob-uskunalarni talab qiluvchi qurilish faoliyati (fundament qurish, shu jumladan qoziq qoqish; oʻzi ishlab chiqarmagan poʻlat konstruksiyalarni montaj qilish; armatura karkaslari elementlarini bukish; gʻisht va boshqa toshlarni terish; havozalar va taxtasupalarni, shu jumladan ijaraga olinganlarini oʻrnatish va demontaj qilish, oʻzi ishlab chiqarmagan fasad karkaslarini montaj qilish va oʻrnatish);

bino va inshootlarni qurish va rekonstruksiya qilishda muhandislik asbob-uskunalarini oʻrnatish;

bino va inshootlarni qurishda ishlov berish va boshqa yakuniy ishlar;

aholi buyurtmalari boʻyicha uy-joylarni (kvartiralarni), shuningdek ishlab chiqarish uchun moʻljallanmagan bino (xona)larni taʼmirlash;

haqiqatdagi mehnatga haq toʻlash fondi — Oʻzbekiston Respublikasi Soliq kodeksining 172-moddasida nazarda tutilgan mehnatga haq toʻlash tarzidagi va yagona ijtimoiy toʻlovning soliq solish obyekti boʻlgan daromadlar, fuqarolik-huquqiy tusdagi shartnomalar boʻyicha faoliyat yurituvchi jismoniy shaxslarga toʻgʻri keladigan mehnatga haq toʻlash fondi bundan mustasno;

toʻlovlarning umumiy stavkasi — tegishli toifadagi toʻlovchilar uchun belgilanadigan yagona ijtimoiy toʻlov, fuqarolarning sugʻurta badallari stavkalarini va jismoniy shaxslarning shaxsiy jamgʻarib boriladigan pensiya hisobvaraqlariga oʻtkaziladigan 1 foizga kamaytirmagan holdagi jismoniy shaxslardan olinadigan daromad soligʻining stavkasini oʻz ichiga oluvchi umumiy stavka. Bunda jismoniy shaxslardan olinadigan daromad soligʻining stavkasi jismoniy shaxslardan olinadigan daromad soligʻining eng kam stavkasi boʻyicha soliq solinadigan jismoniy shaxslarning daromadlariga soliq solish maqsadida qoʻllaniladigan stavka miqdori qabul qilinadi.

II. Toʻlovlarni qoʻshimcha hisoblash

4. Toʻlovlarni qoʻshimcha hisoblash uchun baza boʻlib butun tashkilot boʻyicha umumiy Mehnatga haq toʻlash fondi eng kam meʼyori bilan haqiqatdagi Mehnatga haq toʻlash fondi oʻrtasidagi farq hisoblanadi va quyidagi formula asosida aniqlanadi:

QB = MHTFeng kam – MHTFhaqiqat, bu yerda:

QB — toʻlovlarni qoʻshimcha hisoblash amalga oshiriladigan baza;

MHTFeng kam — Iqtisodiyotning ayrim tarmoqlari xoʻjalik yurituvchi subyektlari uchun Xodimlar soni va mehnatga haq toʻlash fondining eng kam meʼyorlarini aniqlash tartibi toʻgʻrisidagi nizomga muvofiq hisobot oyi uchun aniqlangan soliq toʻlovchining Mehnatga haq toʻlash fondining eng kam meʼyori;

MHTFhaqiqat — hisobot oyi uchun haqiqatdagi mehnatga haq toʻlash fondi.

5. Soliq toʻlovchining haqiqatdagi Mehnatga haq toʻlash fondi Mehnatga haq toʻlash fondining eng kam meʼyoriga teng yoki undan ortiq boʻlsa toʻlovlar qoʻshimcha hisoblanmaydi.

6. Xodimlar sonining eng kam meʼyoriga rioya qilinmaganda soliq toʻlovchining haqiqatdagi Mehnatga haq toʻlash fondi Mehnatga haq toʻlash fondi eng kam meʼyoridan ortiq boʻlgan holda ham qoʻshimcha toʻlovlar hisoblanmaydi.

Masalan, Toshkent shahrida joylashgan savdo zali maydoni 60 kvadrat metr boʻlgan mini-marketda asosiy xodimlar sonining eng kam meʼyori 4 kishini tashkil qiladi.

Butun tashkilot boʻyicha Mehnatga haq toʻlash fondi eng kam meʼyorini hisoblash uchun xodimlarning umumiy soni, direktor (ekspeditor vazifasini ham oʻzi bajaruvchi) va buxgalterni qoʻshib hisoblaganda 6 kishini tashkil qiladi.

Chakana savdo tashkilotlari uchun yagona tarif setkasi boʻyicha mehnatga haq toʻlashning oʻrtacha razryadi 2 ni tashkil qiladi. Yagona tarif setkasi boʻyicha mehnatga haq toʻlashning 2-razryadiga muvofiq keluvchi tarif koeffitsiyenti 2,725 ga teng.

Belgilangan eng kam ish haqining miqdori 96 105 soʻmni tashkil etadi.

Iqtisodiyotning ayrim tarmoqlari xoʻjalik yurituvchi subyektlari uchun xodimlar soni va mehnatga haq toʻlash fondining eng kam meʼyorlarini aniqlash tartibi toʻgʻrisidagi nizomga (roʻyxat raqami 2173, 2010-yil 28-dekabr) muvofiq mazkur mini-market boʻyicha mehnatga haq toʻlash fondining eng kam meʼyori (MHTFmin = KXS x Tk x IHEKM) oy uchun hisoblanganda 1 571 317 soʻmni (6 x 2,725 x 96 105) tashkil etadi.

Amalda tashkilotda 5 kishi ishlaydi. Bunda ushbu xodimlarning haqiqatdagi mehnatga haq toʻlash fondi hisobot oyi uchun 1 780 000 soʻmni tashkil qilgan.

Tashkilotdagi xodimlarning haqiqatdagi soni xodimlar sonining belgilangan meʼyoridan kam boʻlishiga qaramasdan toʻlovlar qoʻshimcha hisoblanmaydi, chunki haqiqatdagi Mehnatga haq toʻlash fondi Mehnatga haq toʻlash fondining eng kam meʼyoridan ortib ketgan.

7. Agar hisobot oyi yakunlari boʻyicha tashkilotning asosiy faoliyat turi chakana savdo, umumiy ovqatlanish yoki qurilish boʻlmasa, u holda tashkilot hisobot oyi uchun yagona ijtimoiy toʻlovni Yagona ijtimoiy toʻlovning eng kam miqdori kiritilishi munosabati bilan yagona ijtimoiy toʻlovni hisoblab chiqarish va toʻlash tartibi toʻgʻrisidagi nizomda (roʻyxat raqami 2095, 2010-yil 13-aprel) belgilangan tartibda hisoblab chiqaradi va toʻlaydi.

8. Agar chakana savdo, umumiy ovqatlanish yoki qurilish tashkilotlari asosiy faoliyat turi bilan bir qatorda boshqa faoliyat turlari bilan ham shugʻullansa, u holda mehnatga haq toʻlash fondining eng kam meʼyori butun tashkilot boʻyicha xodimlar sonining eng kam meʼyoridan kelib chiqib, asosiy xodimlar, maʼmuriy, texnik, yordamchi xodimlar, shuningdek asosiy boʻlmagan faoliyat turi bilan band boʻlgan xodimlar sonini qoʻshish yoʻli bilan Iqtisodiyotning ayrim tarmoqlari xoʻjalik yurituvchi subyektlari uchun xodimlar soni va Mehnatga haq toʻlash fondining eng kam meʼyorlarini aniqlash tartibi toʻgʻrisidagi nizomning 5 va 9-ilovalarida belgilangan ishlarning oʻrtacha razryadi tarif koeffitsiyentini qoʻllagan holda aniqlanadi.

Misol uchun, asosiy faoliyat turi chakana savdo boʻlgan tashkilot sartaroshlik xizmatlarini koʻrsatadi. Butun tashkilot boʻyicha xodimlar sonining eng kam meʼyorini hisoblashda chakana savdo boʻyicha asosiy xodimlar sonining eng kam meʼyori — 5 kishi, maʼmuriy xodimlar — 2 kishi va sartaroshxonada faoliyat yurituvchi xodimlar — 3 kishi qoʻshiladi.

Shunday qilib, mazkur tashkilot boʻyicha Mehnatga haq toʻlash fondining eng kam meʼyori butun tashkilot boʻyicha xodimlar sonining eng kam meʼyoridan (10 kishidan) kelib chiqilib, chakana savdo tashkilotlari uchun belgilangan ishlarning oʻrtacha razryadi tarif koeffitsiyenti (2,725) qoʻllanilgan holda aniqlanadi.

9. Agar chakana savdo tashkilotlari bir nechta turgʻun savdo shoxobchalariga, umumiy ovqatlanish tashkilotlari esa bir nechta umumiy ovqatlanishni tashkil qilish joylariga ega boʻlsa, xodimlar sonining eng kam meʼyori chakana savdo tashkilotlari uchun har bir turgʻun savdo shoxobchasi boʻyicha, umumiy ovqatlanish tashkilotlari uchun umumiy ovqatlanishni tashkil qilish joylari boʻyicha alohida aniqlanadi.

10. Agar qurilish tashkiloti bir vaqtning oʻzida bir nechta obyektda qurilish ishlarini amalga oshirsa, toʻlovlar qoʻshimcha hisoblanadigan bazani hisob-kitob qilish uchun hisobot davrida amalga oshirilgan qurilish ishlarining umumiy hajmi olinadi. Bunda faqat oʻz kuchi bilan amalga oshirilgan ishlar hajmi hisobga olinadi (qurilish subpudrat shartnomasiga koʻra shaharsozlik normalari va qoidalari asosida tuzilgan smetaga muvofiq subpudrat tashkiloti tomonidan bajarilgan ishlar hajmi chegirilgan holdagi umumiy ishlar hajmi).

11. Hisobot oyi uchun qoʻshimcha hisoblangan toʻlovlar quyidagi formula boʻyicha aniqlanadi:

QH = QB x US / 100, bu yerda:

QH — qoʻshimcha hisoblangan toʻlovlar summasi;

QB — mazkur Nizomning 4-bandiga muvofiq aniqlangan toʻlovlarni qoʻshimcha hisoblash amalga oshiriladigan baza;

US — toʻlovlarning umumiy stavkasi.

12. Chakana savdo va umumiy ovqatlanish tashkilotlari har yili 1-fevralga qadar (2011-yilda — 1-aprelgacha), yangi tashkil qilinganlari esa davlat roʻyxatidan oʻtkazilgan sanadan boshlab 30 kun ichida soliq boʻyicha hisobga olish joyidagi davlat soliq xizmati organlariga tegishincha mazkur Nizomning 1a va 1b-ilovalariga muvofiq shaklda Xodimlar soni va mehnatga haq toʻlash fondining eng kam meʼyorlarini hisoblash uchun asos boʻladigan koʻrsatkichlar toʻgʻrisidagi axborotni (keyingi oʻrinlarda axborot deb yuritiladi) taqdim etadilar.

Kalendar yil davomida xodimlar soni va mehnatga haq toʻlash fondining belgilangan eng kam meʼyorlarini hisobga olgan holda toʻlovlarni hisoblash va toʻlashga oʻtilganda xodimlar soni va mehnatga haq toʻlash fondining eng kam meʼyorlarini hisoblash uchun asos boʻladigan koʻrsatkichlar Oʻzbekiston Respublikasi Davlat soliq qoʻmitasi va Moliya vazirligining 2013-yil 4-martdagi 23, 2013-8-sonli “Soliq hisobotining shakllarini tasdiqlash toʻgʻrisida”gi qarori (roʻyxat raqami 2439, 2013-yil 22-mart) (Oʻzbekiston Respublikasi qonun hujjatlari toʻplami, 2013-y., 12 (1)-son) bilan tasdiqlangan Yagona ijtimoiy toʻlov va fuqarolarning budjetdan tashqari Pensiya jamgʻarmasiga sugʻurta badallari hisob-kitobiga asosiy faoliyat turiga bogʻliq holda tasdiqlangan shaklda ilova qilinadigan Xodimlar soni va mehnatga haq toʻlash fondi toʻgʻrisidagi maʼlumotnoma-hisob-kitob (keyingi oʻrinlarda Maʼlumotnoma-hisob-kitob deb yuritiladi) boʻyicha qabul qilinadi.

Kalendar yili davomida avval taqdim etilgan axborotning oʻzgarishi kutilganda, chakana savdo va umumiy ovqatlanish tashkilotlari aniqlashtirilgan koʻrsatkichlar qoʻllanilishi kutilayotgan muddatlar koʻrsatilgan holda aniqlashtirilgan axborotni taqdim etadilar. Bunda xodimlar soni eng kam meʼyorlari aniqlashtirilgan axborot kiritilgan oydan keyingi oydan boshlab qoʻllaniladi.

Koʻrsatkichlarni (stollar soni, savdo zali maydoni, tashkilotning ish rejimi, umumiy ovqatlanish turini) kamaytirib koʻrsatish hollari aniqlangan taqdirda davlat soliq xizmati organlari joriy yilning boshidan boshlab (ushbu bandning ikkinchi va uchinchi xatboshilarida nazarda tutilgan hollarda esa — Axborotni yoki Maʼlumotnoma-hisob-kitobni taqdim etish sanasidan boshlab) kamaytirib koʻrsatish aniqlangan sanagacha Mehnatga haq toʻlash fondining eng kam meʼyorlarini, qoʻshimcha hisoblangan toʻlovlar summasini tegishincha qayta hisoblagan holda, qonunchilikda belgilangan tartibda qoʻshimcha hisoblaydilar.

13. Mazkur Nizom tatbiq etiladigan soliq toʻlovchilar asosiy faoliyat turiga bogʻliq holda tasdiqlangan shakl boʻyicha ortib boruvchi yakunsiz Maʼlumotnoma-hisob-kitobni Yagona ijtimoiy toʻlov va fuqarolarning budjetdan tashqari Pensiya jamgʻarmasiga sugʻurta badallari hisob-kitobiga ilova qiladi.

14. Qoʻshimcha hisoblangan toʻlovlar summasini toʻlash Maʼlumotnoma-hisob-kitobni taqdim etish kunidan kechiktirmay amalga oshiriladi.

15. Qoʻshimcha hisoblangan toʻlovlar summasi yagona hisob raqamga oʻtkazilib, ushbu mablagʻlar Davlat budjeti va Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi oʻrtasida mazkur Nizomning 5-ilovasida belgilangan normativlar boʻyicha taqsimlanadi.

16. Qoʻshimcha hisoblangan toʻlovlar summasi Oʻzbekiston Respublikasi Soliq kodeksining 145-moddasiga muvofiq yuridik shaxslardan olinadigan foyda soligʻining soliq solinadigan foydasini aniqlashda chegiriladi, mazkur Nizomning 19-bandida nazarda tutilgan holat bundan mustasno.

161. Mikrofirma va kichik korxonalar uchun belgilangan yagona ijtimoiy toʻlov stavkasini hisobot yilida qoʻllagan, biroq hisobot yili yakunlari boʻyicha mikrofirma va kichik korxonalar toifasiga kiritish uchun belgilangan xodimlar soni mezoniga mos kelmaydigan mazkur Nizomning 1-bandida koʻrsatilgan soliq toʻlovchilar mikrofirma va kichik korxonalar jumlasiga kirmaydigan yuridik shaxslar uchun belgilangan stavka (bundan buyon matnda umumbelgilangan stavka deb yuritiladi) boʻyicha hisoblab chiqarilgan yagona ijtimoiy toʻlov summasini qoʻshimcha hisoblaydi, shuningdek yagona ijtimoiy toʻlovning umumbelgilangan stavkasini hisobga olgan holda toʻlovlarning umumiy stavkasi boʻyicha qoʻshimcha hisoblangan toʻlovlar summasini qayta hisob-kitobi amalga oshiriladi.

Umumbelgilangan stavka boʻyicha yagona ijtimoiy toʻlovning qoʻshimcha summasi hisobot yili yakuni boʻyicha taqdim etiladigan Oʻzbekiston Respublikasi Moliya vazirligi va Davlat soliq qoʻmitasining 2013-yil 4-martdagi 23, 2013-8-son “Soliq hisobotining shakllarini tasdiqlash toʻgʻrisida”gi qarori (roʻyxat raqami 2439, 2013-yil 22-mart) bilan tasdiqlangan Yagona ijtimoiy toʻlov va fuqarolarning budjetdan tashqari Pensiya jamgʻarmasiga sugʻurta badallari hisob-kitobida aks ettiriladi.

162. Agar hisobot yilida yagona ijtimoiy toʻlovning umumbelgilangan stavkasini qoʻllagan mazkur Nizomning 1-bandida koʻrsatilgan soliq toʻlovchilar hisobot yili yakunlari boʻyicha ularni mikrofirma va kichik korxonalar toifasiga kiritish uchun belgilangan xodimlar soni mezoniga mos kelsa, soliq toʻlovchilarning mazkur toifasi mikrofirma va kichik korxonalar uchun belgilangan yagona ijtimoiy toʻlovning stavkasini hisobot yilidan keyingi yildan boshlab qoʻllaydi va shunga koʻra hisobot yili uchun qoʻshimcha hisoblangan toʻlovlar summasining qayta hisob-kitobi amalga oshirilmaydi.

17. Toʻlovlarni qoʻshimcha hisoblash uchun bazani hisob-kitob qilishga va qoʻshimcha hisoblangan toʻlovlar summasini aniqlashga doir shartli misollar mazkur Nizomning 6-ilovasida keltirilgan.

III. Yakuniy qoidalar

18. Davlat soliq xizmati organlari Xodimlar soni va mehnatga haq toʻlash fondining eng kam meʼyorlari joriy etilishini hisobga olgan holda toʻlovlarni toʻgʻri hisoblab chiqarish va toʻlash ustidan nazoratni amalga oshiradilar.

19. Mazkur Nizomda nazarda tutilgan Xodimlar soni va mehnatga haq toʻlash fondining eng kam meʼyorlari joriy etilishini hisobga olgan holda toʻlovlarni hisoblab chiqarish tartibi buzilishi holatlari aniqlangan taqdirda, davlat soliq xizmati organlari qonun hujjatlariga muvofiq penya hisoblanishini hisobga olgan holda Mehnatga haq toʻlash fondining eng kam meʼyorlaridan kelib chiqib toʻlovlarni qoʻshimcha hisoblashni amalga oshiradilar.

Xodimlar soni va mehnatga haq toʻlash fondining eng kam meʼyorlari joriy etilishini hisobga olgan holda soliqlar va boshqa majburiy toʻlovlarni hisoblab chiqarish va toʻlash tartibi toʻgʻrisidagi nizomga 1a-ILOVA

Izoh: yirik oʻlchamli tovarlarni sotuvchi va ushbu tovarlarni namuna sifatida koʻrgazmaga qoʻyuvchi (mebel va avtomototransport vositalarini sotish doʻkonlari, yirik oʻlchamli maishiy va boshqa texnikalarni namoyish qilish uchun koʻrgazma maydonlari, savdo zallari, qurilish mollari doʻkonlari) savdo zali maydoni 200 kvadrat metrdan ortiq boʻlgan chakana savdo tashkilotlari savdo zali maydonini 200 kvadrat metr deb koʻrsatadilar.

Xodimlar soni va mehnatga haq toʻlash fondining eng kam meʼyorlari joriy etilishini hisobga olgan holda soliqlar va boshqa majburiy toʻlovlarni hisoblab chiqarish va toʻlash tartibi toʻgʻrisidagi nizomga 1b-ILOVA

Eslatma:

1. Agar umumiy ovqatlanish tashkiloti 4 ta oʻrindan ortiq oʻtirish joyiga moʻljallangan stollarga ega boʻlsa, “020” — satr koʻrsatkichi barcha oʻrinlar sonini qoʻshish va olingan summani 4 ga boʻlish yoʻli bilan hisoblab toʻldiriladi. Masalan, tashkilot 10 oʻringa moʻljallangan 6 ta stolga ega boʻlsa, “020” satrda 15 (6*10/4) koʻrsatiladi.

2. 50 dan ortiq xizmat koʻrsatiladigan stoli boʻlgan banket zallariga ega restoran va kafelar 50 ta xizmat koʻrsatiladigan stolni koʻrsatadilar.

Xodimlar soni va mehnatga haq toʻlash fondining eng kam meʼyorlari joriy etilishini hisobga olgan holda soliqlar va boshqa majburiy toʻlovlarni hisoblab chiqarish va toʻlash tartibi toʻgʻrisidagi nizomga 5-ILOVA

Qoʻshimcha hisoblangan toʻlovlar summasini Davlat budjeti va Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi oʻrtasida taqsimlash

normativlari

T/r Toʻlovchilar Umumiy tushumlarga nisbatan foizlarda Davlat budjeti Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi 11. Mikrofirma va kichik korxonalar 25,0 75,0 22. 1-bandda nazarda tutilmagan boshqa toʻlovchilar 18,75 81,25

Xodimlar soni va mehnatga haq toʻlash fondining eng kam meʼyorlari joriy etilishini hisobga olgan holda soliqlar va boshqa majburiy toʻlovlarni hisoblab chiqarish va toʻlash tartibi toʻgʻrisidagi nizomga 6-ILOVA

Toʻlovlarni qoʻshimcha hisoblash uchun bazani hisob-kitob qilishga va qoʻshimcha hisoblangan toʻlovlar summasini aniqlashga doir

ShARTLI MISOLLAR

1-misol. Shaharda joylashgan mini-market boʻyicha quyidagi maʼlumotlar mavjud:

savdo zalining maydoni — 120 kv. m;

ish vaqti rejimi — haftasiga 84 soat;

maʼmuriy xodimlar soni — 1.

Mini-marketda ish vaqti rejimi (haftasiga 84 soat) haftasiga 72 soatdan ortib ketganini hisobga olib, asosiy xodimlar sonining eng kam meʼyoriga koʻpaytiruvchi koeffitsiyent qoʻllaniladi = 84/72 = 1,17.

Shunday qilib, mazkur mini-market boʻyicha asosiy xodimlar sonining eng kam meʼyori = 6 x 1,17 = 7 xodimni tashkil etadi.

Mehnatga haq toʻlash fondining eng kam meʼyorini hisoblash uchun mini-market boʻyicha barcha xodimlarning umumiy soni, 1 ta direktorni (ekspeditor va buxgalter vazifalarini ham oʻzi bajaruvchi) ham qoʻshib hisoblaganda = 7 + 1 = 8 xodimni tashkil qiladi.

Mini-market uchun yagona tarif setkasi boʻyicha ishlarning oʻrtacha razryadi 2 ni tashkil qiladi. Yagona tarif setkasi boʻyicha ishlarning 2-razryadiga muvofiq keluvchi hisob uchun olinadigan tarif koeffitsiyenti 2,725 ga teng.

Belgilangan eng kam ish haqining miqdori 96 105 soʻmni tashkil etadi.

Toʻlovlarning umumiy stavkasi 39% tashkil etadi.

Belgilangan formulaga muvofiq (MHTFmin = XS x Tk x IHEKM) mini-market boʻyicha mehnatga haq toʻlash fondining eng kam meʼyori = 8 x 2,725 x 96 105 = oyiga 2 095 089 soʻmni tashkil qiladi.

Oy uchun haqiqatdagi Mehnatga haq toʻlash fondi 1 875 035 soʻmni tashkil qiladi.

Toʻlovlarni qoʻshimcha hisoblash uchun bazani quyidagi formula boʻyicha aniqlaymiz:

QB = 2 095 089 – 1 875 035 = 220 054 soʻm.

Qoʻshimcha hisoblangan toʻlovlar summasi quyidagiga teng:

QH = 220 054 x 39% = 85 821 soʻm.

2-misol. Toshkent shahrida joylashgan kafe (bar mavjud emas) boʻyicha quyidagi maʼlumotlar mavjud:

xizmat koʻrsatiladigan stollar soni — 15;

ish vaqti rejimi — haftasiga 84 soat;

maʼmuriy xodimlar soni — 1;

texnik xodimlar soni — 1.

Xizmat koʻrsatiladigan stollar soni 15 ta boʻlgan kafe boʻyicha asosiy xodimlar sonining quyidagi eng kam meʼyorlari belgilangan:

1 stolga (4 oʻringa moʻljallangan standart stol) xizmat koʻrsatish uchun moʻljallangan xizmat koʻrsatuvchi xodimlar (ofitsiantlarni oʻz ichiga olgan holda) soni Oshpazlar Tarqatishda xizmat qiladigan xodimlar Oshxona xodimlari 0,25 2 — 1

Mazkur kafening ish vaqti rejimi haftasiga 84 soatdan ortib ketmaganini hisobga olib, xodimlar sonining eng kam meʼyoriga koʻpaytiruvchi koeffitsiyent qoʻllanilmaydi.

Shunday qilib, mazkur kafe boʻyicha asosiy xodimlar sonining eng kam meʼyori = 0,25 x 15 + 2 + 1 = 7 xodimni tashkil qiladi.

Mehnatga haq toʻlash fondining eng kam meʼyorini hisoblash uchun kafe boʻyicha barcha xodimlarning umumiy soni, jumladan 9 ta asosiy xodim, 1 ta direktor va 1 ta farroshni ham qoʻshib hisoblaganda = 7 + 1 + 1 = 9 xodimni tashkil qiladi.

Kafe uchun yagona tarif setkasi boʻyicha ishlarning oʻrtacha razryadi 3 ni tashkil qiladi. Yagona tarif setkasi boʻyicha ishlarning 3-razryadiga muvofiq keluvchi hisob uchun olinadigan tarif koeffitsiyenti 2,998 ga teng.

Belgilangan eng kam ish haqining miqdori 96 105 soʻmni tashkil etadi.

Toʻlovlarning umumiy stavkasi 39% tashkil etadi.

Belgilangan formulaga muvofiq (MHTFmin = XS x Tk x IHEKM) mazkur kafe boʻyicha mehnatga haq toʻlash fondining eng kam meʼyori = 9 x 2,998 x 96 105 = oyiga 2 593 105 soʻmni tashkil qiladi.

Oy uchun haqiqatdagi mehnatga haq toʻlash fondi 2 265 004 soʻmni tashkil qiladi.

Toʻlovlarni qoʻshimcha hisoblash uchun bazani quyidagi formula boʻyicha aniqlaymiz:

QB = 2 593 105 – 2 265 004 = 328 101 soʻm.

Qoʻshimcha hisoblangan toʻlovlar summasi quyidagiga teng:

QH = 328 101 x 39% = 127 959 soʻm.

3-misol. Bir qavatli uch xonali turar-joy binosini qoʻshimcha imoratlar bilan birga namunaviy qurish:

shaharsozlik normalari va qoidalari asosida tuzilgan smetaga muvofiq mazkur turar-joyning qurilishi uchun quruvchi ishchilarning mehnat sarfi 4 799,6 kishi/soatni tashkil qiladi;

qurilishning meʼyoriy muddati — 3 oy;

olti kunlik ish haftasida bir xodimga hisoblangan oʻrtacha oylik ish vaqti fondi — 163,1 soatni tashkil qiladi.

Belgilangan formulaga muvofiq (XSnorm = SIK/ BM / IVF) quruvchi ishchilarning oylik oʻrtacha sonining eng kam meʼyori (XSnorm) = 4 799,6 / 3 / 163,1 =10 xodimni tashkil qiladi.

Qurilish ishlarining oʻrtacha razryadi tarif koeffitsiyenti yagona tarif setkasi boʻyicha ishlarining 4-razryadi tarif koeffitsiyentiga toʻgʻri keladi. Yagona tarif setkasi boʻyicha ishlarning 4-razryadiga muvofiq keluvchi tarif koeffitsiyenti 3,297 ga teng.

Belgilangan eng kam ish haqining miqdori 96 105 soʻmni tashkil etadi.

Toʻlovlarning umumiy stavkasi 39% tashkil etadi.

Belgilangan formulaga muvofiq (MHTFmin = XSnorm (BPXSnorm) x Tk x Kt x IHEKM) quruvchi ishchilarning mehnatga haq toʻlash fondining eng kam meʼyori (MHTFmin) = 10 x 3,297 x 1,15 x 96 105 = 3 643 869 soʻmni tashkil qiladi.

Oy uchun haqiqatdagi Mehnatga haq toʻlash fondi 3 325 270 soʻmni tashkil qiladi.

Toʻlovlarni qoʻshimcha hisoblash uchun bazani quyidagi formula boʻyicha aniqlaymiz:

QB = 3 643 869 – 3 325 270= 318 599 soʻm.

Qoʻshimcha hisoblangan toʻlovlar summasi quyidagiga teng:

QH = 318 599 × 39% = 124 254 soʻm.