76. Qonunchilik palatasi qabul qilgan qonunga ilova qilinadigan qiyosiy jadvalni rasmiylashtirish

Qonunchilik palatasi qabul qilgan qonun matniga qiyosiy jadval ham ilova qilinadi. Qiyosiy jadval, qoida tariqasida, uchta grafadan iborat boʻladi: birinchisi — “qonunchilik tashabbusi subyekti kiritgan qonun loyihasi tahriri”, ikkinchisi — “Qonunchilik palatasi qabul qilgan qonun tahriri”, uchinchisi — “kiritilayotgan oʻzgartish va qoʻshimchalarni asoslash”.

Qiyosiy jadvaldagi birinchi va ikkinchi grafalar quyidagi koʻrinishda bayon qilinadi:

oʻzgartirilayotgan raqamlar, soʻzlar, jumlalar, xatboshilar, kichik bandlar, bandlar, qismlar, moddalar, paragraflar, boblar, boʻlimlar yarim qora shriftlar bilan ajratiladi;

qoʻshimcha qilinayotgan raqamlar, soʻzlar, jumlalar, xatboshilar, kichik bandlar, bandlar, qismlar, moddalar, paragraflar, boblar, boʻlimlar yarim qora shriftlar bilan ajratiladi;

oʻz kuchini yoʻqotgan deb topilayotgan xatboshilar, kichik bandlar, bandlar, qismlar, moddalar, paragraflar, boblar, boʻlimlar yoki olib tashlanayotgan raqamlar, soʻzlar, jumlalar birinchi grafada kursiv bilan belgilanadi.

Agar qonunning tarkibiy birligi yangi tahrirda bayon qilinayotgan boʻlsa, u holda qiyosiy jadvalda tegishincha faqat oʻzgartirilayotgan, qoʻshilayotgan, oʻz kuchini yoʻqotgan deb topilayotgan yoki chiqarib tashlanayotgan raqamlar, soʻzlar, jumlalar, xatboshilar, kichik bandlar, bandlar, qismlar, moddalar, paragraflar, boblar, boʻlimlar ajratiladi.

Birinchi va ikkinchi grafalarda oʻzgartirilmayotgan tegishli raqamlar, soʻzlar, jumlalar, xatboshilar, kichik bandlar, bandlar, qismlar, moddalar, paragraflar, boblar, boʻlimlar va ilovalar kiritilayotgan oʻzgartishlar koʻzga tashlanib turishini taʼminlash uchun oddiy shrift bilan qayd etiladi.