49. Qonunga umumlashtirilgan shaklda oʻzgartishlar yoki qoʻshimchalar kiritilishiga yoʻl qoʻyilmasligi
Oʻzbekiston Respublikasi Oliy Majlisi Qonunchilik palatasiga kiritiladigan qonun loyihalarini va Oʻzbekiston Respublikasi Oliy Majlisi Senatiga taqdim etilgan qonunlarni yuridik-texnik jihatdan rasmiylashtirish qoidalarini tasdiqlash toʻgʻrisida (237-II-son) · Sana: 30.12.2010 · Amalda
Qonunga umumlashtirilgan shaklda oʻzgartishlar yoki qoʻshimchalar kiritilishiga (shu jumladan, soʻzlar va soʻz birikmalarini “matn boʻyicha” degan shakldan foydalangan holda almashtirishga yoki toʻldirishga) yoʻl qoʻyilmaydi.
Umumiy qoidaga binoan har bir oʻzgartish yoki qoʻshimcha oʻzgartirilayotgan yoki qoʻshimcha kiritilayotgan qonunning aniq tarkibiy birligini koʻrsatgan holda alohida rasmiylashtirilishi kerak.
Istisno tariqasida, faqat qonunning bitta moddasiga yoki moddaning tarkibiy birligiga umumlashgan shaklda oʻzgartishlar yoki qoʻshimchalar kiritish mumkin. Agar bu moddaga yoki uning tarkibiy birligiga boshqa hech qanday oʻzgartishlar yoki qoʻshimchalar kiritilmasa, almashtirilayotgan yoki toʻldirilayotgan soʻz yoki soʻzlardan hamma joyda bir xil sonda va kelishikda foydalanilgan boʻlsa, bunday oʻzgartish yoki qoʻshimcha quyidagi tarzda rasmiylashtirilishi kerak:
1-misol:
Oʻzbekiston Respublikasining _______ yil ________da qabul qilingan “__________________”gi ______-sonli Qonunining (Oʻzbekiston Respublikasi Oliy Majlisi palatalarining Axborotnomasi, ______yil, №____, ___-modda) 10-moddasidagi “________________” degan soʻzlar “________________” degan soʻzlar bilan almashtirilsin.
2-misol:
Oʻzbekiston Respublikasining _______ yil ________da qabul qilingan “_________________”gi _____-sonli Qonunining (Oʻzbekiston Respublikasi Oliy Majlisi palatalarining Axborotnomasi, ______yil, №____, ___-modda) 10-moddasi “_____________” degan soʻzlardan keyin “_____________” degan soʻzlar bilan toʻldirilsin.