Qandim guruhi, Xovuzak va Shodi konlarini oʻzlashtirishga toʻgʻridan-toʻgʻri xorijiy investitsiyalarni jalb etish chora-tadbirlari toʻgʻrisida (PF-3245-son)

15.05.2003

Oʻzbekiston Respublikasi Prezidentining

Farmoni

Qandim guruhi, Xovuzak va Shodi konlarini toʻgʻridan-toʻgʻri xorijiy investitsiyalarni jalb etgan holda mahsulotni taqsimlash toʻgʻrisidagi bitim shartlari asosida oʻzlashtirish maqsadida:

1. Belgilab qoʻyilsinki, mahsulotni taqsimlash toʻgʻrisidagi bitim shartlari asosida berilgan Qandim guruhi, Xovuzak va Shodi konlarini oʻzlashtirish hamda qazish chogʻida investorlarning ehtimol tutilgan sarf-xarajatlari tijorat maqsadida qazib chiqarish boshlangan kunga toʻgʻri keladigan kalendar yilidan boshlab kompensatsiya mahsuloti hisobiga qoplanadi.

2. “Oʻzbekneftgaz” MXK, uning aksiyadorlik kompaniyalariga, shuningdek ularning tizimiga kiruvchi boshqa tashkilotlarga mahsulotni taqsimlash toʻgʻrisidagi bitimlarda investorlar sifatida ishtirok etuvchi yuridik shaxslarning birlashmalarida qatnashishga ruxsat berilsin.

3. Oʻzbekiston Respublikasi Adliya vazirligi Oʻzbekiston Respublikasining manfaatdor vazirliklari va idoralari bilan birgalikda bir oy muddatda amaldagi qonunchilikka ushbu Farmondan kelib chiqadigan oʻzgartish va qoʻshimchalarni kiritish toʻgʻrisidagi takliflarni Oʻzbekiston Respublikasi Vazirlar Mahkamasiga taqdim etsin.

4. Mazkur Farmonning ijrosini nazorat qilish Oʻzbekiston Respublikasining Bosh vaziri Oʻ. Sultonov zimmasiga yuklatilsin.

Oʻzbekiston Respublikasining Prezidenti I. KARIMOV

Toshkent sh.,

2003-yil 15-may,

PF-3245-son