Bozorlarning faoliyatini tashkil etishni va aholiga xizmat koʻrsatish sifatini yaxshilashga doir qoʻshimcha chora-tadbirlar toʻgʻrisida (PF-1384-son)

05.03.1996

Oʻzbekiston Respublikasi Prezidentining

Farmoni

Dehqon, buyum bozorlari va yarmarkalarda savdo-sotiqni tartibga solish, tushayotgan moliyaviy mablagʻlarni shakllantirish va ulardan samarali foydalanish mexanizmini takomillashtirish, ushbu sohadagi salbiy holatlarga qarshi kurashni kuchaytirish, shuningdek aholiga xizmat koʻrsatish sifatini oshirish maqsadida:

1. “Oʻztayyorlovsavdo” uyushmasi, Oʻzbekiston Respublikasi Davlat mulki qoʻmitasi va hokimliklarning:

dehqon, buyum bozorlari va yarmarkalarni respublika tumanlari (shaharlari) hokimliklari ixtiyoriga berish toʻgʻrisidagi;

oziq-ovqat va boshqa isteʼmol tovarlarini ishlab chiqarish (yetishtirish), tayyorlash, transportda tashish va sotish jarayoni barcha manfaatdor qatnashchilarining mol-mulki hamda mablagʻlarini birlashtirish asosida dehqon, buyum bozorlari va yarmarkalar negizida ochiq turdagi aksionerlik jamiyatlari tashkil etish toʻgʻrisidagi;

Toshkent shahrida va boshqa yirik shaharlarda koʻrsatib oʻtilgan ochiq turdagi aksionerlik jamiyatlarining uyushmalarini tashkil etish toʻgʻrisidagi takliflari qabul qilinsin.

2. Belgilab qoʻyilsinki:

aholini keng assortimentdagi dehqonchilik, chorvachilik va boshqa isteʼmol tovarlari bilan taʼminlash; dehqonlarning hamda boshqa oziq-ovqat va buyum tovarlari sotuvchilarining savdo-sotiqni amalga oshirishlari uchun zarur maishiy sharoitlar yaratish; huquqbuzarliklarga qarshi kurashni kuchaytirish hamda huquqni muhofaza qiluvchi va davlat boshqa organlari bilan birgalikda ushbu sohada zarur tartibni taʼminlash tashkil etilayotgan aksionerlik jamiyatlarining asosiy vazifalari hisoblanadi;

tashkil etilayotgan aksionerlik jamiyatlari aksiyalarining nazorat paketi hududida ushbu bozorlar va yarmarkalar joylashgan tumanlar (shaharlar) hokimliklariga yoki ularning vakolatli organlariga tegishli boʻladi;

aksionerlik jamiyatlariga aylantirilgan bozorlar va yarmarkalarning joriy faoliyati tumanlar (shaharlar) hokimlari tavsiyasiga hamda joylardagi fuqarolarning oʻz-oʻzini boshqarish organlari bilan kelishuvga binoan aksionyerlarning umumiy majlisi tayinlanadigan direktor tomonidan taʼminlanadi.

4. Oʻzbekiston Respublikasi Oliy sudiga:

mahsulot ishlab chiqaruvchilarning bozorlarga erkin kirib kelishlariga toʻsqinlik qiluvchi, yuqori narxlarni sunʼiy ravishda saqlab turuvchi va boshqa huquqbuzarliklarga yoʻl qoʻyuvchi shaxslarning, shuningdek bozorlarning savdoni tashkil etishning qonunchilik bilan belgilangan tartibini buzuvchi, nohaq yigʻimlar olish va tovlamachilik bilan shugʻullanuvchi mansabdor shaxslari va maʼmuriyati xodimlarining noqonuniy faoliyatlari toʻgʻrisidagi ishlar yuzasidan sud amaliyotini oʻrganib chiqish;

Jinoyat kodeksining va Maʼmuriy javobgarlik toʻgʻrisidagi kodeksning tegishli moddalarini koʻrsatib oʻtilgan va boshqa huquqbuzarliklarga nisbatan qoʻllanish tartibi haqida tushuntirishlarni ishlab chiqish maqsadida ushbu masalani Oliy sud Plenumi koʻrib chiqish uchun kiritish tavsiya qilinsin.

5. Ichki ishlar vazirligi (Almatov), Davlat soliq qoʻmitasi (Gataulin):

yirik bozorlarda xodimlarning doimiy ishlovchi guruhini tashkil etsinlar, ularga savdo, xizmatlar koʻrsatishning belgilangan qoidalarini buzuvchi, roʻyxatdan oʻtish, ruxsatnoma olish va soliqlar toʻlashdan bosh tortuvchi shaxslarni aniqlash hamda ularni Oʻzbekiston Respublikasi Oliy sudi Plenumi tushuntirishlariga muvofiq maʼmuriy va jinoiy javobgarlikka tortish yuzasidan aniq chora-tadbirlar koʻrish vazifasini yuklasinlar;

mahsulot ishlab chiqaruvchilarning bozorlarga erkin kirib kelishlariga toʻsqinlik qiluvchi shaxslarning, yuqori monopol narxlarni saqlab qolishni, mol-mulklarni kuch ishlatish va yoʻq qilish bilan qoʻrqitib arzonga sotib ketishni talab qiluvchi sotuvchilarning, shuningdek bozorlarning nohaq yigʻimlar oluvchi va tovlamachilik bilan shugʻullanuvchi rahbarlari va xodimlarining, davlat organlari boshqa mansabdor shaxslarining noqonuniy faoliyatlarini toʻxtatish boʻyicha tezkor-oldini olish chora-tadbirlarini amalga oshirsinlar.

6. Adliya vazirligi (Mirsafoyev) Oliy sud (Mingboyev) bilan birgalikda savdo qoidalarining buzilishi bilan bogʻliq maʼmuriy va jinoiy ishlarning sudlarda qonunda belgilangan muddatlarda koʻrib chiqilishini taʼminlasinlar.

7. Oʻzbekiston Respublikasi Prokuraturasi (Mustafoyev)ga huquqni muhofaza qilish va davlat boshqa organlarining savdo toʻgʻrisidagi qonunchilik buzilishlarining sodir boʻlishiga, qishloq xoʻjaligi mahsulotlarini va boshqa isteʼmol tovarlarini sotish sohasidagi uyushgan jinoyatchilikka qarshi kurashdagi faoliyatlarini muvofiqlashtirishni taʼminlash, bozorlar faoliyatini tartibga solish boʻyicha qonunchilikning bajarilishi ustidan nazoratni kuchaytirish taklif etilsin.

8. Oʻzbekiston Respublikasi Vazirlar Mahkamasi bir hafta muddatda mazkur Farmoyishning bajarilishini tashkil etish yuzasidan qaror qabul qilsin.

Oʻzbekiston Respublikasi Prezidenti I. KARIMOV

Toshkent sh.,

1996-yil 5-mart,

PF-1384-son