Oliy taʼlim muassasalari boshqaruv, texnik, xizmat koʻrsatuvchi va oʻquv-yordamchi xodimlarining namunaviy shtatlarini tasdiqlash toʻgʻrisida (2182-son)
14.01.2011
Oʻzbekiston Respublikasi Oliy va oʻrta maxsus taʼlim vazirligi Oʻzbekiston Respublikasi Mehnat va aholini ijtimoiy muhofaza qilish vazirligi Oʻzbekiston Respublikasi Moliya vazirligining
Qarori
[Oʻzbekiston Respublikasi Adliya vazirligi tomonidan 2011-yil 14-yanvarda roʻyxatdan oʻtkazildi, roʻyxat raqami 2182]
Oʻzbekiston Respublikasi Vazirlar Mahkamasining 2010-yil 16-avgustdagi 178-son “Respublikaning oliy taʼlim muassasalarini moliyalashtirish tartibini yanada takomillashtirish chora-tadbirlari toʻgʻrisida”gi qarorining (Oʻzbekiston Respublikasi qonun hujjatlari toʻplami, 2010-y., 33-son, 276-modda) 3-bandi ijrosini taʼminlash maqsadida Oʻzbekiston Respublikasi Oliy va oʻrta maxsus taʼlim vazirligi, Mehnat va aholini ijtimoiy muhofaza qilish vazirligi va Moliya vazirligi qaror qiladilar:
1. Oliy taʼlim muassasalari boshqaruv, texnik, xizmat koʻrsatuvchi va oʻquv-yordamchi xodimlarining namunaviy shtatlari (bundan buyon matnda Namunaviy shtatlar deb yuritiladi) ilovaga muvofiq tasdiqlansin.
2. Belgilansinki:
Namunaviy shtatlar oliy taʼlim muassasalarining budjet mablagʻlari va oʻqitishning toʻlov-kontrakt shaklidan tushadigan mablagʻlari hisobidan joriy qilinadi;
Namunaviy shtatlarni joriy qilinishi munosabati bilan boshqaruv, texnik, xizmat koʻrsatuvchi va oʻquv-yordamchi xodimlar sonining qisqartirilishi qonun hujjatlarida belgilangan tartibda amalga oshiriladi;
ayrim oliy taʼlim muassasalarining shtatlar jadvallarini tuzishda, ular faoliyatining oʻziga xos xususiyatlaridan kelib chiqib, Oʻzbekiston Respublikasi Oliy va oʻrta maxsus taʼlim vazirligi, Mehnat vazirligi va Moliya vazirligi bilan kelishilgan holda Namunaviy shtatlarda koʻzda tutilmagan lavozimlar, tarkibiy tuzilmalar va xodimlar soni belgilanishi mumkin.
3. Oliy taʼlim muassasalarining rektorlari shtat jadvallarini tasdiqlangan namunaviy shtatlarga qatʼiy amal qilgan holda moslashtirilishini taʼminlasin.
4. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.
Oliy va oʻrta maxsus taʼlim vaziri B. XODIYEV
Toshkent sh.,
2010-yil 15-dekabr,
485/1-son
Mehnat va aholini ijtimoiy muhofaza qilish vaziri A. XAITOV
Toshkent sh.,
2010-yil 15-dekabr,
200-KK-son
Moliya vaziri R. AZIMOV
Toshkent sh.,
2010-yil 15-dekabr,
107-son
Oʻzbekiston Respublikasi Oliy va oʻrta maxsus taʼlim vazirligi, Mehnat va aholini ijtimoiy muhofaza qilish vazirligi, Moliya vazirligining 2010-yil 15-dekabrdagi 485/1, 200-KK, 107-son qaroriga ILOVA
Oliy taʼlim muassasalari boshqaruv, texnik, xizmat koʻrsatuvchi va oʻquv-yordamchi xodimlarining
namunaviy shtatlari
* Oʻzbekiston Respublikasi Prezidentining 2006-yil 20-iyundagi PQ–381-son “Respublika aholisini axborot-kutubxona bilan taʼminlashni tashkil etish toʻgʻrisidagi” qaroriga (Oʻzbekiston Respublikasi qonun hujjatlari toʻplami, 2006-y., 25-26-son, 228-modda) muvofiq tashkil etilgan axborot-resurs markazlari xodimlarining shtat birligi mazkur Namunaviy shtatlarning ilovasiga muvofiq belgilanadi.
Oliy taʼlim muassasalari boshqaruv, texnik, xizmat koʻrsatuvchi va oʻquv-yordamchi xodimlarining namunaviy shtatlariga ILOVA
Oliy taʼlim muassasalari boshqaruv, texnik, xizmat koʻrsatuvchi va oʻquv-yordamchi xodimlari uchun alohida lavozimlarni kiritish
meʼyorlari
I. UMUMIY QOIDALAR
1. Oliy taʼlim muassasalari (bundan buyon matnda OTM deb yuritiladi) xodimlarining soni kunduzgi va sirtqi taʼlim shakllaridagi talabalarning, shuningdek magistrantlarning (bundan buyon matnda talabalar deb yuritiladi) keltirilgan kontingentidan kelib chiqqan holda Oliy taʼlim muassasalari boshqaruv, texnik, xizmat koʻrsatuvchi va oʻquv-yordamchi xodimlarining namunaviy shtatlariga (bundan buyon matnda Namunaviy shtatlar deb yuritiladi) muvofiq aniqlanadi. OTM talabalarining keltirilgan kontingenti joriy kalendar yilning boshida amalda mavjud talabalar soni asosida quyidagi koeffitsiyentlarni qoʻllagan holda hisoblanadi:
kunduzgi taʼlim talabalari uchun — 1,0;
sirtqi taʼlim talabalari uchun — 0,4.
2. Talabalarning keltirilgan kontingenti 8000 nafardan ziyod boʻlgan OTM xodimlari soni Oʻzbekiston Respublikasi Oliy va oʻrta maxsus taʼlim vazirligi, Mehnat vazirligi va Moliya vazirligi bilan kelishilgan holda belgilanadi.
3. OTM qoshidagi oʻquv telestudiyalar, teatrlar, botanik bogʻlar, oʻquv-ilmiy stansiyalar, bazalar, poligonlar, muzeylar, vivariylar, sport inshootlari (komplekslar) va boshqalarning xodimlari soni Oʻzbekiston Respublikasi Oliy va oʻrta maxsus taʼlim vazirligi, Mehnat vazirligi va Moliya vazirligi bilan kelishilgan holda belgilanadi.
4. Oʻzbekiston Respublikasi Prezidentining 2006-yil 20-iyundagi PQ–381-son “Respublika aholisini axborot-kutubxona bilan taʼminlashni tashkil etish toʻgʻrisidagi” qaroriga (Oʻzbekiston Respublikasi qonun hujjatlari toʻplami, 2006-y., 25-26-son, 228-modda) muvofiq tashkil etilgan axborot-resurs markazlari xodimlarining shtat birligi oʻrnatilgan tartibda Oʻzbekiston Respublikasi Oliy va oʻrta maxsus taʼlim vazirligi, Mehnat vazirligi va Moliya vazirligi bilan kelishilgan holda belgilanadi.
II. OTMDA ALOHIDA TUZILMALAR VA LAVOZIMLARNI KIRITISh NORMATIVLARI
§1. Rektorat
5. Ilmiy ishlar boʻyicha prorektor (filial direktori oʻrinbosari) lavozimi talabalarning keltirilgan kontingenti 1000 nafardan ziyod boʻlgan holda quyidagi shartlarning biri mavjud boʻlganida kiritiladi:
davlat granti yoki xoʻjalik shartnomasi asosida OTM tomonidan ilmiy-tadqiqot ishlarini bajarilishi va OTMda ilmiy-tadqiqot sektori, muammoviy laboratoriyalar va boshqalarning mavjudligi;
OTMda katta ilmiy xodim-izlanuvchilar institutining mavjudligi;
OTMda fan doktori ilmiy darajasini beruvchi ilmiy kengashlarning mavjudligi.
6. Xalqaro aloqalar boʻyicha prorektor (filial direktori oʻrinbosari) lavozimi Oʻzbekiston Respublikasi Oliy va oʻrta maxsus taʼlim vazirligining qarori asosida OTM tomonidan xalqaro faoliyat yuritilgan taqdirda hamda xorijiy oliy taʼlim va ilmiy-tadqiqot muassasalari bilan hamkorlik bitimlari mavjud boʻlganida kiritiladi.
7. Bosh muhandis lavozimi talabalarning keltirilgan kontingenti 2500 nafardan ziyod boʻlgan holda yoki OTMda murakkab oʻquv-laboratoriya va texnologik asbob-uskunalar mavjud boʻlganida kiritiladi. Asbob-uskunani oʻquv-laboratoriya va texnologik jihatdan murakkab jihozlar toifasiga kiritilishi tasarrufida OTM boʻlgan vazirlik yoki idoraning xulosasi asosida amalga oshiriladi.
8. Bosh mexanik va bosh energetik lavozimlari OTMda 30 dan 50 ming kv.metrgacha umumiy oʻquv-laboratoriya, turar joy va boshqa maydon mavjud boʻlganda kiritiladi.
50 ming kv.metrdan ziyod boʻlgan umumiy oʻquv-laboratoriya, turar va boshqa maydonga ega OTMda Namunaviy shtatlarga muvofiq belgilangan OTM xodimlarining umumiy soni doirasida bosh mexanik va bosh energetiklarning boʻlimlari alohida tuzilishi mumkin.
9. Ilmiy kengashning ilmiy kotibi lavozimi fan doktori ilmiy darajasini beruvchi ilmiy kengash tashkil etilgan OTM uchun 1 birlik sonida kiritiladi.
11. Kotib—ish yurituvchi lavozimi 1 birlik hisobida rektor va har bir prorektor uchun alohida kiritiladi.
§2. Oʻquv-uslubiy boʻlim (boshqarma)
12. Uslubchi lavozimi OTMda kunduzgi taʼlim talabalari kontingenti 2500 nafargacha boʻlganda 1 birlik belgilanadi va keyingi har 1000 nafar talaba uchun qoʻshimcha 1 birlikdan kiritiladi.
13. Sirtqi taʼlim boʻyicha uslubchi lavozimi:
sirtqi taʼlim talabalari kontingenti 500 dan 1000 nafargacha boʻlganda — 1 birlik;
sirtqi taʼlim talabalari kontingenti 1001 dan 2000 nafargacha boʻlganda — 2 birlik.
2000 nafardan keyingi har 1000 nafar sirtqi taʼlim talabalari uchun qoʻshimcha 1 birlik sirtqi taʼlim boʻyicha uslubchi lavozimi kiritiladi.
§3. Ilmiy-tadqiqot va ilmiy-pedagogik kadrlar tayyorlash boʻlimi (sektori)
14. Katta inspektor lavozimi OTMda katta ilmiy xodim-izlanuvchilar kontingenti 100 nafardan ziyod boʻlganida kiritiladi. Keyingi har 100 nafar katta ilmiy xodim-izlanuvchilar soniga qoʻshimcha 1 birlik katta inspektor lavozimi kiritiladi.
§4. Xalqaro boʻlim
15. Xalqaro boʻlim Oʻzbekiston Respublikasi Oliy va oʻrta maxsus taʼlim vazirligi qarori asosida OTM tomonidan xalqaro faoliyat yuritilgan taqdirda hamda xorijiy oliy taʼlim va ilmiy-tadqiqot muassasalari bilan hamkorlik bitimlari mavjud boʻlganda tashkil etiladi.
Xalqaro boʻlimda quyidagi lavozimlar kiritiladi:
boʻlim boshligʻi — 1 birlik;
uslubchi — 1 birlik.
§5. Kutubxona
16. OTM kutubxona xodimlarining shtat birligi oʻrnatilgan tartibda Oʻzbekiston Respublikasi Oliy va oʻrta maxsus taʼlim vazirligi, Mehnat vazirligi va Moliya vazirligi bilan kelishilgan holda belgilanadi.
§6. Tahririy-nashriyot boʻlimi
17. Tahririy-nashriyot boʻlimi boshligʻi lavozimi boʻlimdagi xodimlar soni 5 birlik va undan ortiq boʻlgan hollarda kiritiladi. Ushbu boʻlimda xodimlar soni 5 birlikdan kam boʻlganda OTM rahbari buyrugʻi bilan boʻlim boshligʻi vazifasi muharrirlardan biriga yuklatiladi.
18. Tahririy-nashriyot boʻlimi xodimlarining shtat birligi ish hajmiga (mualliflik varagʻi hisobidan) bogʻliq holda kiritiladi:
1 birlik muharrir lavozimi har bir 110 mualliflik varagʻi uchun;
1 birlik musahhih lavozimi har bir 210 mualliflik varagʻi uchun;
1 birlik texnik muharrir lavozimi har bir 900 mualliflik varagʻi uchun.
§7. Fakultet
19. Kunduzgi taʼlim fakulteti dekani lavozimi fakultetda:
kunduzgi taʼlim talabalari soni 200 gacha boʻlganda — 0,5 birlik;
kunduzgi taʼlim talabalari soni 200 dan ziyod boʻlganda — 1 birlik kiritiladi.
20. Sirtqi taʼlim fakulteti dekani lavozimi fakultetda sirtdan taʼlim oluvchi talabalari soni 300 va undan ortiq boʻlganda kiritiladi. Sirtqi taʼlim talabalari kontingenti fakultetda 300 kishidan kam boʻlganda, OTM rahbari buyrugʻi bilan sirtqi taʼlim fakulteti dekani vazifalari tegishli taʼlim yoʻnalishidagi kunduzgi taʼlim fakulteti dekaniga yuklatiladi.
21. Kunduzgi taʼlim fakulteti dekani oʻrinbosari lavozimi fakultetda:
kunduzgi taʼlim talabalari soni 201 dan 400 gacha boʻlganda — 0,5 birlik;
kunduzgi taʼlim talabalari soni 401 va undan ziyod boʻlganda, keyingi har 200 nafar talaba uchun qoʻshimcha 0,5 birlik lavozim kiritiladi, lekin fakultet uchun 3 shtat birligidan oshmagan holda.
22. Oʻquv ishlari boʻyicha dispetcheri lavozimi kunduzgi taʼlim fakultetida talabalar kontingenti soni 500 kishidan yuqori boʻlganda 1 birlik, talabalar kontingenti soni 1000 nafardan yuqori boʻlganda qoʻshimcha 1 birlik kiritiladi.
23. Sirtqi taʼlim uslubchisi lavozimi sirtqi taʼlim fakulteti uchun 1 birlik miqdorida kiritiladi.
24. Fakultetlarda kotib—ish yurituvchi lavozimi:
fakultetda talabalarning keltirilgan kontingenti soni 200 dan yuqori boʻlganda — 1 birlik;
fakultetda talabalarning keltirilgan kontingenti soni 700 dan yuqori boʻlganda — 2 birlik;
talabalarning keltirilgan kontingenti soni 700 dan yuqori boʻlganda, keyingi har 1000 talabalarning keltirilgan kontingenti uchun qoʻshimcha 1 birlik kiritiladi.
§8. Malaka oshirish va qayta tayyorlash fakulteti (markazi)
25. Malaka oshirish va qayta tayyorlash fakulteti (markazi) dekani lavozimi malaka oshirish va qayta tayyorlash tinglovchilarining soni oʻrtacha yillik hisobda:
100 nafargacha tinglovchilar boʻlganda — 0,5 birlik;
100 nafardan ortiq tinglovchilar boʻlganda — 1 birlik kiritiladi.
26. Malaka oshirish va qayta tayyorlash fakulteti (markazi) uchun 1 birlik uslubchi lavozimi kiritiladi.
27. Malaka oshirish va qayta tayyorlash fakulteti (markazi) uchun 1 birlik kotib—ish yurituvchi lavozimi kiritiladi.
§9. Magistratura boʻlimi
28. Magistratura boʻlimi Oʻzbekiston Respublikasi Vazirlar Mahkamasining 2007-yil 10-sentabrdagi “Oʻzbekiston Respublikasi oliy taʼlim tizimida magistratura faoliyatini yanada takomillashtirish, uning samaradorligini oshirish chora-tadbirlari toʻgʻrisida”gi 190-son qarorida (Oʻzbekiston Respublikasi qonun hujjatlari toʻplami, 2007-y., 37-38-son, 384-modda) belgilangan shtat birliklariga muvofiq tashkil etiladi.
Bunda boʻlim boshligʻi va uslubchi lavozimlari:
OTMda magistrantlar soni 200 nafargacha boʻlganida — 0,5 birlik;
OTMda magistrantlar soni 201 nafar va undan ortiq boʻlganda — 1 birlik kiritiladi.
§10. Birinchi va ikkinchi boʻlim
29. Birinchi boʻlimning boʻlim boshligʻi va inspektor lavozimlari hamda ikkinchi boʻlimning boʻlim boshligʻi, 1-toifali muhandisi, katta inspektori va muhandisi lavozimlari qonun hujjatlarida belgilangan tartibda kiritiladi.
§11. Texnik-foydalanish va xoʻjalik boʻlimi
30. OTMda omborxonalar (omborlar) mavjud boʻlganida 1 birlik omborxona mudiri lavozimi kiritiladi.
31. Omborchi lavozimi alohida turuvchi har bir omborxona (ombor) uchun 1 birlik hisobidan kiritiladi, radioaktiv moddalar saqlanayotgan omborxona bundan mustasno.
32. OTMda radioaktiv moddalar saqlanayotgan omborxona mavjud boʻlganida, 1 birlik radioaktiv moddalar saqlanayotgan omborxona mudiri lavozimi kiritiladi.
33. Bino komendanti lavozimi har bir alohida turuvchi bino uchun 1 birlikdan kiritiladi, talabalar turar joylari binolari bundan mustasno.
34. Xoʻjalik mudiri lavozimi 400 va undan ortiq nafar talaba istiqomat qiluvchi har bir talabalar turar joyi uchun 1 birlikdan kiritiladi.
35. OTMda issiqlik energiyasi, gaz taʼminoti va yongʻin xavfsizligi markazlashtirilgan boshqaruv tugmasi mavjud boʻlganida kecha-kunduz ishlovchi dispetcherlik posti tashkil etiladi va har bir postga 4 birlikdan iborat boʻlgan dispetcherlik xizmati operatorlari lavozimlari kiritiladi.
36. Talabalar turar joyi mudiri lavozimi har bir talabalar turar joyiga 1 birlik hisobidan kelib chiqqan holda kiritiladi.
37. Bino, inshootlar va jihozlarni joriy taʼmirlovchi va xizmat koʻrsatuvchi ishchilar lavozimi quyidagilar boʻyicha kiritiladi:
slesar-santexnik — suv quvurlari, kanalizatsiya va issiqlik quvvati bilan jihozlangan 2000 kv.metr maydon uchun 1 birlik;
elektromontyor — 500 yoritish nuqtalari uchun 1 birlik;
duradgor — 2500 kv.metr maydon uchun 1 birlik, lekin har bir OTMga 1 birlik lavozimdan kam boʻlmagan holda;
ventilatsiya va konditsionerlashtirish tizimlarini taʼmirlash va xizmat koʻrsatish boʻyicha chilangar — 100 ta markazdan qochuvchi (tsentrobej) va derazali uskunalarga xizmat koʻrsatish uchun 1 birlik lavozimda kiritiladi.
38. Pol pardozlovchi lavozimi 7500 kv.metr parket poli uchun 1 birlik hisobidan kelib chiqqan holda kiritiladi.
39. Xizmat binolarini tozalovchi farrosh lavozimi 800 kv.metr tozalash maydoni uchun 1 birlik hisobidan kelib chiqqan holda kiritiladi.
Xizmat binolarini tozalovchi farroshlarning qoʻshimcha lavozimlari quyidagi hollarda belgilanadi:
ikki smenada ishlovchi OTMlarida — 800 kv.metr tozalash maydoni uchun 0,12 birlik lavozimdan kelib chiqqan holda;
ikkidan ortiq smenada ishlovchi OTMlarida — 800 kv.metr tozalash maydoni uchun 0,3 birlik lavozimdan kelib chiqqan holda.
40. Talabalar turar joyini tozalovchi farroshi lavozimi 800 kv.metr tozalash maydoni uchun, yashash hududi bundan mustasno, 1 birlikdan kelib chiqqan holda kiritiladi.
41. Garderob (jihozlangan kiyim saqlash joylari) mavjud boʻlganda bir smenada (lekin 2,5 smenadan ortiq boʻlmagan holda) 250 ta xizmat koʻrsatish joylari uchun 1 birlik hisobidan kelib chiquvchi garderobchi (kiyim saqlovchi) lavozimi (mavsumiy 6 oy) kiritiladi.
42. Liftchi lavozimi bir smenada (lekin 2,5 smenadan ortiq boʻlmagan holda) bir binoda joylashgan va foydalanilayotgan bir lift yoki liftlar guruhi uchun 1 birlik hisobidan kelib chiqib kiritiladi.
43. Qorovul lavozimi alohida turuvchi binoning kecha-kunduz ishlovchi bir qoʻriqlash posti uchun dam olish va bayram kunlarini inobatga olgan holda 4 ta birlikdan koʻp boʻlmagan holda kiritiladi.
44. Bogʻbon lavozimi OTMning koʻkalamzorlashtiriladigan har bir 2 ga maydoni uchun 1 birlik hisobidan kelib chiqqan holda kiritiladi.
45. Hovli supuruvchi (dvornik) lavozimi OTMning tozalanadigan 2500 kv.metr maydoni uchun 1 birlik hisobidan kelib chiqqan holda kiritiladi.
46. Xoʻjalik bekasi (kastelyansha) lavozimi talabalar turar joyida istiqomat qiluvchi 250 kishiga 0,5 birlik hisobidan kelib chiqqan holda kiritiladi.
47. Pasportist lavozimi:
talabalar turar joyida 500 kishigacha istiqomat qiluvchi OTM uchun 0,5 birlik;
talabalar turar joyida 501 nafar va undan ortiq kishi istiqomat qiluvchi OTM uchun 1 birlik.
48. OTMlarida 1000 nafardan ortiq kishi istiqomat qiladigan uch va undan ortiq bir-biriga yaqin turuvchi talabalar turar joylari binolari mavjud boʻlganida, talabalar turar joylari talabalar shaharchasiga birlashtirilishi mumkin.
Talabalar shaharchasi tashkil etilganida, 1 birlikdan iborat boʻlgan talabalar shaharchasi direktori lavozimi kiritiladi.
Talabalar shaharchasida 2000 nafardan ortiq kishi istiqomat qilsa, talabalar shaharchasi direktori oʻrinbosari lavozimi kiritiladi.
49. Dispetcher — garaj boshligʻi lavozimi OTMda soni 5 tadan kam boʻlmagan avtotransport vositalari boʻlgan transport xoʻjaligi (garaj) mavjud boʻlganda kiritiladi. Soni 5 tadan kam avtotransport vositasi mavjud boʻlsa, OTM rahbarining buyrugʻiga muvofiq OTMning maʼmuriy xodimlaridan biriga garaj boshligʻi vazifalarini bajarish yuklanadi.
Soni 5 tadan ortiq avtotransport vositasi mavjud boʻlganida 1 birlik mexanik lavozimi kiritiladi.
50. Haydovchi lavozimi OTM balansida mavjud har bir foydalanilayotgan avtotransport vositasi uchun 1 birlik hisobidan kelib chiqqan holda kiritiladi.
Avtotransport vositalari haydovchilarini saqlash OTMning budjetdan tashqari mablagʻlari hisobidan amalga oshiriladi.
51. Oʻzbekiston Respublikasi Vazirlar Mahkamasining 1999-yil 2-apreldagi 154-son “Budjetdan mablagʻ bilan taʼminlanadigan tashkilotlarda xizmat yengil avtotransportidan foydalanishni tartibga solish toʻgʻrisida”gi qaroriga muvofiq xodimlar soniga qarab, xizmat va navbatchi avtomashinalar uchun quyidagi chegaralar belgilangan:
1 ta xizmat mashinasi — OTM uchun;
1 ta navbatchi mashina — xodimlar soni 100 nafargacha boʻlganida;
2 ta navbatchi mashina — xodimlar soni 100 dan 200 nafargacha boʻlganida;
3 ta navbatchi mashina — xodimlar soni 200 dan 300 nafargacha boʻlganida;
4 ta navbatchi mashina — xodimlar soni 300 nafar va undan ortiq boʻlganida.
OTMning taʼlim jarayoni xususiyatidan kelib chiqqan holda, talabalar kontingentini inobatga olib maxsus avtomashinalarga (yuk avtomashinasi, avtobus) quyidagi limitlar oʻrnatiladi:
talabalar soni 5000 nafargacha boʻlganda — 1 ta maxsus avtomashina;
talabalar soni 5000 nafardan koʻp boʻlganda — 2 ta maxsus avtomashina.
52. Qozonxonasi, ventilatsion, kompressor, boyler jihozlari, nasos stansiyalari va boshqa ekspluatatsiya-kommunikatsiya boʻlinmalariga xizmat koʻrsatuvchi xodimlarning shtat birligi Oʻzbekiston Respublikasi Oliy va oʻrta maxsus taʼlim vazirligi, Mehnat vazirligi va Moliya vazirligi bilan kelishilgan holda belgilanadi.
§12. Avtomatlashtirilgan telefon stansiya (ATS)
53. OTMda telefon stansiyasi mavjud boʻlgan hollarda Avtomatlashtirilgan telefon stansiyasiga quyidagi lavozimlar kiritiladi:
300 dan ortiq telefon bogʻlamalari mavjud holda 1 birlik stansiya boshligʻi lavozimi;
1 birlik aloqa muhandisi lavozimi;
1 birlik aloqa boʻyicha texnik lavozimi;
har 300 telefon bogʻlamalari (parallel bogʻlamalari bilan birgalikda) uchun 1 birlik aloqachi (aloqa elektr montyori) lavozimi kiritiladi.
§13. Oʻquv-yordamchi xodimlar
54. OTMning oʻquv-yordamchi xodimlara soni quyidagi meʼyorlar asosida aniqlanadi:
kafedraga 1 birlik kabinet mudiri lavozimi;
texnika, tibbiyot va qishloq xoʻjaligi yoʻnalishlaridagi OTMda laborantlarning shtat birligi professor-oʻqituvchilar tarkibiga 1:7 nisbatda, boshqa OTMda 1:10 nisbatda belgilanadi;
Oʻzbekiston milliy universiteti va Toshkent davlat texnika universitetlarida laborantlarning shtat birligi professor-oʻqituvchilar tarkibiga 1:5 nisbatda belgilanadi;
texnika, tibbiyot va qishloq xoʻjaligi yoʻnalishlaridagi OTM hamda Oʻzbekiston milliy universitetidagi katta laborantlarning shtat birligi laborantlarga 1:3 nisbatda boshqa OTMlarida 1:5 nisbatda belgilanadi;
muhandis, texnik va ishlab chiqarish taʼlimi ustalarining shtat birligi tegishli jihozlar bilan taʼminlangan joy mavjud boʻlganda laborantlarning soniga 1:10 nisbatda belgilanadi;
sanʼat va madaniyat yoʻnalishlari boʻyicha tayyorlovchi OTM va fakultetlarda konsertmeyster va yetakchi konsertmeystyerlarning shtat birligi taʼlim jarayonining xususiyatlaridan kelib chiqib, Oʻzbekiston Respublikasi Oliy va oʻrta maxsus taʼlim vazirligi, Mehnat vazirligi hamda Moliya vazirligi bilan kelishgan holda belgilanadi.
55. OTMning murojaati va Oʻzbekiston Respublikasi Oliy va oʻrta maxsus taʼlim vazirligi hamda Mehnat vazirligining iltimosnomalari asosida oʻquv-yordamchi xodimlari soni mazkur meʼyorlar asosida belgilangan oʻquv-yordamchi xodimlarning umumiy shtat birligi sonidan 20% dan koʻp boʻlmagan miqdorga koʻpaytirilishi mumkin.
§14. Texnik-taʼmirlash va tezkor qayta tiklash xizmati
56. Texnik-taʼmirlash va tezkor qayta tiklash xizmatining shtat birliklari soni va lavozimlari joriy va kapital taʼmirlash hajmlaridan, shuningdek, loyiha-smeta hujjatlarida nazarda tutilgan ish turlaridan kelib chiqqan holda belgilanadi.
Texnik-taʼmirlash va tezkor qayta tiklash xizmati shtat birliklarini saqlash xarajatlari OTMning budjetdan tashqari mablagʻlari hisobidan qoplanadi.
III. YAKUNIY QOIDALAR
57. Ushbu meʼyor asosida tuziladigan shtat jadvalini Oʻzbekiston Respublikasi Moliya vazirligida roʻyxatdan oʻtkazish uchun taqdim qilishda, unga OTMni asosiy ishlab chiqarish koʻrsatkichlari toʻgʻrisidagi materiallarni (talabalar kontingenti, binolar soni, maydonlar hajmi va boshqalar) rahbar, bosh buxgalter va reja-moliya boʻlimining boshligʻi tomonidan imzolangan holda ilova qilishlari shart.
58. Ushbu meʼyor hamda OTMning ishlab chiqarish koʻrsatkichlariga muvofiq tuziladigan shtat jadvalining toʻgʻriligi yuzasidan javobgarlik OTMning rahbarlari va reja-moliya boʻlimi xodimlariga yuklatiladi.