Qimmatbaho metallar xarid qilish, saqlash va sotish tizimini takomillashtirish toʻgʻrisida (PF-3346-son)

31.10.2003

Oʻzbekiston Respublikasi Prezidentining

Farmoni

[Koʻchirma]

“Oʻzbekiston Respublikasining Markaziy banki toʻgʻrisida”gi Qonunning 42-moddasiga muvofiq hamda qimmatbaho metallar xarid qilish, saqlash va eksport qilish jarayonini boshqarish tizimi samaradorligini oshirish va ortiqcha boʻgʻinlarni qisqartirish maqsadida:

1. 2004-yilning 1-yanvaridan boshlab Oʻzbekiston Respublikasi Moliya vazirligi huzuridagi Qimmatbaho metallar va qimmatbaho toshlar qoʻmitasini Oʻzbekiston Respublikasi Markaziy banki huzuridagi Qimmatbaho metallar agentligi etib qayta tashkil qilish, Davlat asllik darajasini belgilash palatasini uning ixtiyorida saqlab qolish toʻgʻrisida Oʻzbekiston Respublikasi Markaziy banki hamda Oʻzbekiston Respublikasi Moliya vazirligining taklifi qabul qilinsin.

2. Quyidagilar Qimmatbaho metallar agentligining asosiy vazifalari etib belgilansin:

Oʻzbekiston Respublikasi Markaziy banki tomonidan sotib olinadigan va sotiladigan qimmatbaho metallarni xarid qilish, saqlash, hisobini yuritish va ortib joʻnatish borasidagi ishlarni bajarish;

Oʻzbekiston Respublikasi Markaziy banki zaxiralari tarkibidagi qimmatbaho metallar, shuningdek saqlanayotgan boshqa boyliklar hisobi yuritilishi hamda saqlanishini taʼminlash boʻyicha chora-tadbirlarni amalga oshirish;

3. Belgilab qoʻyilsinki:

Qimmatbaho metallar agentligi Oʻzbekiston Respublikasi Markaziy banki muassasasi maqomiga egadir;

Agentlik faoliyatini moliyalash Oʻzbekiston Respublikasining Markaziy banki tomonidan belgilangan tartibda amalga oshiriladi;

Qimmatbaho metallar agentligi bosh direktori maqomiga koʻra vazir oʻrinbosari lavozimiga tenglashtiriladi va belgilangan tartibda tayinlanadi.

4. Oʻzbekiston Respublikasi Moliya vazirligi va Markaziy banki Qimmatbaho metallar va qimmatbaho toshlar qoʻmitasida saqlanayotgan boyliklarni 2004-yilning 1-yanvari holati boʻyicha qonunchilikda belgilangan tartibda xatlovdan oʻtkazib, qabul qilish va topshirish ishlarini amalga oshirsinlar.

5. Oʻzbekiston Respublikasi Markaziy banki va Hisob palatasi oltin-valyuta zaxiralarining eng maqbul tarkibiga erishish hamda tavakkalchiliklarini boshqarish vazifalaridan kelib chiqqan holda respublikaning qimmatbaho metallaridan samarali foydalanishni taʼminlasinlar.

6. Oʻzbekiston Respublikasi Adliya vazirligi Markaziy bank va Moliya vazirligi bilan birgalikda bir oy muddatda qonunchilikka ushbu Farmondan kelib chiqadigan oʻzgartish va qoʻshimchalar kiritish toʻgʻrisidagi takliflarni Oʻzbekiston Respublikasi Vazirlar Mahkamasiga taqdim etsin.

7. Mazkur Farmonning ijrosini nazorat qilish Oʻzbekiston Respublikasi Bosh vaziri Oʻ.T. Sultonov va Oʻzbekiston Respublikasi Markaziy banki Raisi F.M. Mullajonov zimmalariga yuklatilsin.

Oʻzbekiston Respublikasining Prezidenti I. KARIMOV

Toshkent sh.,

2003-yil 31-oktabr,

PF-3346-son