“Sharq taronalari” xalqaro musiqa festivaliga tayyorgarlik koʻrish va uni oʻtkazish toʻgʻrisida (PQ-103-son)

15.06.2005

Oʻzbekiston Respublikasi Prezidentining

Qarori

Samarqand shahrida 1997-yildan buyon oʻtkazib kelinayotgan anʼanaviy “Sharq taronalari” xalqaro musiqa festivali qisqa muddatda jahondagi nufuzli musiqa anjumanlari qatoridan munosib oʻrin egalladi. Koʻplab davlatlar, xalqaro madaniyat tashkilotlari, dunyo miqyosida tanilgan mashhur sanʼat namoyandalarining bu festivalga boʻlgan qiziqishi va eʼtibori ortib, ishtirokchi mamlakatlar safi kengayib borayotgani buning yaqqol dalilidir.

Asosiy gʻoyasi insonlarni goʻzallik, nafosat va ezgulikka daʼvat etish, dunyo xalqlarining noyob musiqiy merosi va anʼanalarini asrab-avaylash va rivojlantirishdan iborat boʻlgan “Sharq taronalari” musiqa festivali tili, madaniyati, milliy qadriyatlari rang-barang boʻlgan turli millat va elatlarni sanʼat vositasida mushtarak maqsadlar yoʻlida yaqinlashtirishga, Oʻzbekistonning jahon miqyosidagi obroʻ-eʼtibori ortishiga xizmat qilayotganini qayd etish zarur.

Ayniqsa, bugungi notinch va tahlikali zamonda yovuzlik va jaholatning har qanday koʻrinishlariga qarshi maʼrifat asosida kurashish, xalqimiz maʼnaviyati, uning koʻp asrlik musiqa xazinasini boyitishda mazkur festivalning roli va ahamiyati yanada kuchayib bormoqda.

Shu munosabat bilan 2005-yilning 25 — 30-avgust kunlari Samarqand shahridagi Registon maydonida boʻlib oʻtadigan “Sharq taronalari” 5-xalqaro musiqa festivalini yuksak gʻoyaviy-badiiy darajada, uyushqoqlik bilan oʻtkazish maqsadida:

1. “Sharq taronalari” xalqaro musiqa festivaliga tayyorgarlik koʻrish va uni oʻtkazish boʻyicha tashkiliy qoʻmita tarkibi 1-ilovaga, festivalning tantanali ochilish va yopilish marosimlari uchun badiiy dasturlar yaratish boʻyicha ijodiy guruh tarkibi 2-ilovaga muvofiq tasdiqlansin.

2. Tashkiliy qoʻmita oʻn kun muddatda festivalga tayyorgarlik koʻrish va uni oʻtkazish rejasini, anjumanning tantanali ochilish va yopilish marosimlari hamda uni oʻtkazish bilan bogʻliq boshqa tadbirlarning badiiy ssenariylarini ishlab chiqsin.

3. Festivalga tayyorgarlik koʻrish va badiiy dasturlarning ssenariylarini ishlab chiqishda quyidagilarga alohida eʼtibor qaratilsin:

Sharq musiqasi — Sharq sivilizatsiyasi va madaniyatining uzviy bir qismi, insoniyat tafakkurining bebaho xazinasi ekanini, uning ahamiyati va mohiyatini aks ettirish;

turli millat va elatlarni musiqa sanʼati vositasida oʻzaro yaqinlashtirish gʻoyasini badiiy talqin etish;

xalqlar oʻrtasidagi doʻstlik, birodarlik va hamkorlikni, chin insoniy fazilatlarni ulugʻlash;

yurtimizning, jumladan, Samarqand shahrining jahon tarixida tutgan oʻrni va ahamiyati, umumbashariy madaniyat rivojiga qoʻshgan ulkan hissasini. boy musiqiy merosimizni keng namoyon etish;

yosh avlod qalbida sanʼatga boʻlgan mehr va ixlos tuygʻularini kamol toptirish;

mumtoz sharq musiqa sanʼati insonlarni gumanizm va ezgulik ruhida tarbiyalashda, jaholatga qarshi maʼrifat bilan kurashda taʼsirchan vosita boʻlib xizmat qilishini yorqin ifoda etish.

4. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

5. Mazkur qarorning ijrosini nazorat qilish Bosh vazir Sh. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2005-yil 15-iyun,

PQ-103-son

Oʻzbekiston Respublikasi Prezidentining 2005-yil 15-iyundagi PQ-103-son qaroriga 1-ILOVA

“Sharq taronalari” xalqaro musiqa festivaliga tayyorgarlik koʻrish va uni oʻtkazish boʻyicha tashkiliy qoʻmita

tarkibi

Oʻzbekiston Respublikasi Prezidentining 2005-yil 15-iyundagi PQ-103-son qaroriga 2-ILOVA

“Sharq taronalari” xalqaro musiqa festivalining tantanali ochilish va yopilish marosimlari uchun badiiy dasturlar yaratish boʻyicha ijodiy guruh

tarkibi