Oʻzbekiston Respublikasi Prezidenti I. Karimovning 2010-yil 12-noyabrda Oʻzbekiston Respublikasi Oliy Majlisi qonunchilik palatasi va senatining qoʻshma majlisidagi “Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi” mavzuyidagi maʼruzasida qoʻyilgan vazifalarni amalga oshirish toʻgʻrisida (220-II-son)
30.11.2010
Oʻzbekiston Respublikasi Oliy Majlisi Qonunchilik palatasining
Qarori
Oʻzbekiston Respublikasi Prezidenti I. Karimovning Oʻzbekiston Respublikasi Oliy Majlisi qonunchilik palatasi va Senatining 2010-yil 12-noyabrdagi qoʻshma majlisidagi maʼruzasini muhokama etib, Oʻzbekiston Respublikasi Oliy Majlisining qonunchilik palatasi qaror qiladi :
1. Oʻzbekiston Respublikasi Prezidenti I. Karimovning 2010-yil 12-noyabrdagi Oʻzbekiston Respublikasi Oliy Majlisi qonunchilik palatasi va Senatining qoʻshma majlisidagi “Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi” mavzuyidagi maʼruzasida bayon etilgan qoidalar va xulosalar toʻliq qoʻllab-quvvatlansin hamda Oʻzbekiston Respublikasi Oliy Majlisi qonunchilik palatasining 2011 – 2014-yillardagi faoliyati uchun asos qilib olinsin.
2. Oʻzbekiston Respublikasi Prezidenti maʼruzasida belgilab berilgan Mamlakatda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasini amalga oshirish boʻyicha uzoq muddatga moʻljallangan harakat dasturini ishlab chiqish zarur deb hisoblansin. Dastur loyihasini ishlab chiqish maqsadida ilovaga muvofiq ishchi guruhi tuzilsin.
3. Oʻzbekiston Respublikasi Oliy Majlisi qonunchilik palatasining qoʻmitalari:
Oʻzbekistonda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasini izchil roʻyobga chiqarish, siyosiy, iqtisodiy va ijtimoiy sohalarda islohotlarni amalga oshirish uchun zarur boʻlgan qonun loyihalarini chuqur va har tomonlama puxta ishlab chiqishga;
parlament nazorati shakllaridan, shu jumladan parlament soʻrovidan, parlament eshituvlaridan va parlament faoliyatining qonunda nazarda tutilgan boshqa shakllaridan foydalanishni kuchaytirishga;
davlat hokimiyati va boshqaruvini demokratlashtirish jarayonlarini chuqurlashtirishga;
sud-huquq tizimini isloh qilishning demokratik chora-tadbirlarini amalga oshirishga;
demokratik bozor islohotlarini va iqtisodiyotni erkinlashtirishni yanada chuqurlashtirishga;
fuqarolik jamiyati institutlari, nodavlat notijorat tashkilotlari, shu jumladan fuqarolar oʻzini oʻzi boshqarish organlari faoliyatining normativ-huquqiy bazasini rivojlantirish, jamiyat va davlat qurilishi tizimida ularning huquq va vakolatlarini kengaytirishga;
axborot sohasini isloh qilish hamda soʻz va axborot erkinligini taʼminlashga;
Oʻzbekistonda saylov erkinligini taʼminlash va saylov toʻgʻrisidagi qonun hujjatlarini rivojlantirishga qaratilgan Oʻzbekiston Respublikasi Oliy Majlisi qonunchilik palatasining 2011 – 2014-yillarga moʻljallangan qonun ijodkorligi va nazorat-tahlil faoliyatini yanada takomillashtirish hamda rivojlantirishga doir takliflarni ishchi guruhiga taqdim etsin.
4. Siyosiy partiyalar fraksiyalariga, Oʻzbekiston Ekologik harakatidan saylangan deputatlar guruhiga Oʻzbekiston Respublikasi Oliy Majlisi qonunchilik palatasi faoliyatining 2011 – 2014-yillarga moʻljallangan dasturi loyihasida jamiyatimizning oʻzlari ifodalaydigan qatlamlari va tuzilmalarining manfaatlarini aks ettirishga, shuningdek qabul qilingan qonunlarning ijro etuvchi hokimiyat organlari tomonidan bajarilishi ustidan parlament va deputatlar nazoratini kuchaytirishga alohida eʼtibor qaratish tavsiya etilsin.
5. Oʻzbekiston Respublikasi Oliy Majlisi qonunchilik palatasining deputatlari Oʻzbekiston Respublikasi Prezidentining maʼruzasidan kelib chiqadigan qoidalar va vazifalarni soʻzsiz hayotga tatbiq etish, qabul qilinayotgan qonunlarning mohiyatini tushuntirish boʻyicha saylovchilar bilan faol ish olib borsin.
6. Ushbu qarorning ijrosini nazorat qilish Oʻzbekiston Respublikasi Oliy Majlisi qonunchilik palatasi Spikerining oʻrinbosarlari zimmasiga yuklatilsin.
Oʻzbekiston Respublikasi Oliy Majlisi qonunchilik palatasining Spikeri D.TOSHMUHAMEDOVA
Toshkent sh.,
2010-yil 30-noyabr,
220-II-son
Oʻzbekiston Respublikasi Oliy Majlisi qonunchilik palatasining 2010-yil 30-noyabrdagi 220–II-sonli qaroriga ILOVA
Oʻzbekiston Respublikasi Prezidenti I. Karimovning 2010-yil 12-noyabrda Oʻzbekiston Respublikasi Oliy Majlisi qonunchilik palatasi va Senatining qoʻshma majlisidagi “Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi” mavzuyidagi maʼruzasida qoʻyilgan ustuvor vazifalarni amalga oshirish yuzasidan Mamlakatda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasini amalga oshirish yuzasidan harakat dasturi loyihasini ishlab chiqish boʻyicha ishchi guruhi
TARKIBI
(Oʻzbekiston Respublikasi Oliy Majlisi palatalarining Axborotnomasi, 2010-y., 11-son, 450-modda)