Fuqarolik holati dalolatnomalarini qayd etish qoidalariga oʻzgartirish va qoʻshimchalar kiritish toʻgʻrisida (Oʻzbekiston Respublikasining “Adliya organlari va muassasalari faoliyati takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” 2010-yil 14-sentabrdagi OʻRQ-255-sonli qonuni) (319-son)

28.12.2010

Oʻzbekiston Respublikasi Vazirlar Mahkamasining

qarori

Oʻzbekiston Respublikasining “Adliya organlari va muassasalari faoliyati takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” 2010-yil 14-sentabrdagi OʻRQ-255-sonli Qonuniga muvofiq hamda fuqarolik holati dalolatnomalarini qayd etish tartibini takomillashtirish maqsadida Vazirlar Mahkamasi qaror qiladi:

1. Vazirlar Mahkamasining 1999-yil 12-apreldagi 171-son qarori (Oʻzbekiston Respublikasi QT, 1999-y., 4-son, 18-modda) bilan tasdiqlangan Fuqarolik holati dalolatnomalarini qayd etish qoidalariga ilovaga muvofiq oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi adliya vaziri R.A. Muhitdinov zimmasiga yuklansin.

Oʻzbekiston Respublikasi Bosh vaziri Sh. MIRZIYOYEV

Toshkent sh.,

2010-yil 28-dekabr,

319-son

Vazirlar Mahkamasining 2010-yil 28-dekabrdagi 319-son qaroriga ILOVA

Fuqarolik holati dalolatnomalarini qayd etish qoidalariga kiritilayotgan oʻzgartirish va qoʻshimchalar

1. 13-bandda:

birinchi xatboshidagi “tugʻilish, oʻlim, nikoh tuzish, nikohdan ajralish, otalikni belgilash” soʻzlari “oʻlim” soʻzi bilan almashtirilsin;

ikkinchi xatboshidagi “fuqarolik holati dalolatnomalarini” soʻzlari “oʻlimni” soʻzi bilan almashtirilsin.

2. 18-bandda:

birinchi xatboshiga “ariza” soʻzidan keyin “yoxud nikohda boʻlmagan onaning arizasi” soʻzlari qoʻshilsin;

toʻrtinchi xatboshiga “vazni, boʻyi” soʻzlari qoʻshilsin.

3. 25-band quyidagi tahrirda bayon qilinsin:

“25. Ota-onasining pasportlariga ichki ishlar organlari tomonidan bola toʻgʻrisidagi maʼlumotlar: familiyasi, ismi, ota ismi, jinsi, tugʻilgan yili, kuni, oyi yozib qoʻyiladi”.

4. 63-bandga quyidagi tahrirdagi xatboshi qoʻshilsin:

“Farzandlikka olinayotgan bolaning tugʻilganligi toʻgʻrisidagi yozuvlar daftariga zarur oʻzgartirishlar FHDY organlari tomonidan, farzandlikka olish toʻgʻrisidagi qaror chiqqan kundan boshlab oʻn kun mobaynida kiritiladi. FHDY organiga koʻrsatib oʻtilgan muddat tugagandan keyin murojaat qilingan taqdirda farzandlikka olish toʻgʻrisidagi qarorning haqiqiyligini tasdiqlaydigan hujjat taqdim etiladi”.

5. 74-bandning ikkinchi xatboshiga “Oʻzbekiston Respublikasining Oila kodeksi 13-moddasi beshinchi boʻlimida koʻrsatilgan holatlar bundan mustasno” soʻzlari qoʻshilsin.

6. 119 va 120-bandlar quyidagi tahrirda bayon qilinsin:

“119. Oila kodeksining 47-moddasiga binoan nikoh fuqarolik holati dalolatnomalarini qayd etish organida nikohdan ajratish qayd etilgan kundan boshlab toʻxtatiladi.

120. FHDY organi sud qarori asosida er-xotinlardan birining arizasiga binoan nikohdan ajratish toʻgʻrisidagi dalolatnoma yozuvini qayd etadi va nikohdan ajratish toʻgʻrisidagi guvohnomani beradi.

Er-xotinlarning shaxsini tasdiqlovchi pasportlar yoki boshqa hujjatlarga nikohdan ajratilganlik toʻgʻrisida FHDY organi tomonidan shtamp qoʻyiladi.

Ushbu Qoidalar 1998-yil 1-sentabrgacha va 2010-yil 15-sentabrdan boshlab qonuniy kuchga kirgan sud qarorlariga nisbatan qoʻllanadi”.

7. 121-bandda:

quyidagi mazmundagi ikkinchi xatboshi qoʻshilsin:

“2010-yil 15-sentabrdan boshlab qonuniy kuchga kirgan nikohdan ajratishni qayd etish respublika sudlari qarorlari bilan er-xotindan birining yashash joyidagi FHDY organi tomonidan amalga oshiriladi”;

ikkinchi, uchinchi va toʻrtinchi xatboshilar tegishli ravishda uchinchi, toʻrtinchi va beshinchi xatboshilar deb hisoblansin;

beshinchi xatboshiga quyidagi mazmundagi jumla qoʻshilsin:

“Nikohdan ajratish toʻgʻrisidagi dalolatnomadagi yozuvlarga qoʻshimchalar kiritish va nikohdan ajratilganligi toʻgʻrisidagi guvohnomani berish, shuningdek tomonlardan birining ishonchnoma asosida harakat qiluvchi oʻz vakili orqali berilgan arizasi boʻyicha ham amalga oshirilishi mumkin. Bunda ariza va ishonchnoma notarial tasdiqlangan boʻlishi kerak”.

8. 192 — 197, 200-bandlar oʻz kuchini yoʻqotgan deb hisoblansin.

9. 198-199-bandlar quyidagi tahrirda bayon qilinsin:

“198. Oʻlik tugʻilgan bola toʻgʻrisidagi dalolatnoma yozuvini rasmiylashtirishda tugʻilganlik haqidagi dalolatnoma yozuviga maʼlumotlar oʻlim haqidagi tibbiy guvohnoma boʻyicha kiritiladi.

199. Tirik tugʻilib, ammo hayotining birinchi haftasida oʻlgan bolaga nisbatan oʻlim haqidagi dalolatnoma yozuviga maʼlumotlar perinatal oʻlim haqidagi tibbiy guvohnoma asosida kiritiladi”.

10. Quyidagi mazmundagi 2061-band qoʻshilsin:

“2061. Ota-onasi boʻlmagan taqdirda, voyaga yetmagan shaxslarga yoki pasport olishmagan shaxslarga tugʻilganlik haqidagi takroriy guvohnomalar ushbu shaxsning fotosurati yopishtirilgan, yashash joyidagi fuqarolarni oʻzini oʻzi boshqarish organi yoki mazkur shaxs taʼlim olayotgan taʼlim muassasasi tomonidan berilgan maʼlumotnoma asosida beriladi”.