Sirdaryo viloyatida charm-poyabzal va qurilish mollari chiqarish boʻyicha ishlab chiqarish kompleksining faoliyatini tashkil etishga oid chora-tadbirlar toʻgʻrisida (PQ-1139-son)

24.06.2009

Oʻzbekiston Respublikasi Prezidentining

Qarori

Jahon standartlariga mos keladigan yuqori sifatli raqobatbardosh charm-poyabzal mahsulotlari va zamonaviy qurilish materiallarining yangi turlarini ishlab chiqarishni yanada koʻpaytirish va shu asosda ular bilan ichki isteʼmol bozorini yanada toʻliq toʻldirish hamda eksportga yetkazib berishni kengaytirish maqsadida:

1. Maʼlumot uchun qabul qilinsinki, “Wenzhou Jinsheng Trade Co., Ltd” kompaniyasi (Xitoy Xalq Respublikasi) va “Sinlong” MCHJ (Oʻzbekiston Respublikasi) tomonidan xorijiy investitsiyalar ishtirokida masʼuliyati cheklangan jamiyat shaklidagi “Peng Sheng” qoʻshma korxonasi tashkil etilgan boʻlib, uning ustav kapitali 3,0 mln AQSH dollariga teng, ulushlar muassislar oʻrtasida quyidagicha taqsimlanadi:

“Wenzhou Jinsheng Trade Co., Ltd” kompaniyasi (Xitoy Xalq Respublikasi) — 1 500 ming AQSH dollari (50 foiz);

“Sinlong” MCHJ (Oʻzbekiston Respublikasi) — 1 500 ming AQSH dollari (50 foiz).

2. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi nomidan Oʻzbekiston Respublikasi Hukumati bilan “Wenzhou Jinsheng Trade Co., Ltd” kompaniyasi oʻrtasida 2009-yil 28-mayda imzolangan, Sirdaryo viloyatida “Peng Sheng” MCHJ negizida integratsiyalashgan ishlab chiqarish kompleksi faoliyatini tashkil etish boʻyicha xorijiy investorning aniq majburiyatlarini va uni Oʻzbekiston Respublikasi Hukumati tomonidan davlat tomonidan qoʻllab-quvvatlash chora-tadbirlarini belgilovchi Investitsiya shartnomasi tasdiqlansin.

3. Belgilansinki, koʻrsatib oʻtilgan Investitsiya shartnomasiga muvofiq “Wenzhou Jinsheng Trade Co., Ltd” kompaniyasi:

kamida 26 mln AQSH dollari miqdorida, shu jumladan birinchi bosqichda (2010-yil 1-iyungacha) — 12,3 mln AQSH dollari miqdorida investitsiya kiritish;

2010-yilning ikkinchi yarmidan boshlab xalqaro standartlarga muvofiq boʻlgan sifatni boshqarish tizimini joriy etishni taʼminlagan holda tayyor charm, poyabzal va keramik plitkalar ishlab chiqarishni boshlashni tashkil etish;

“Peng Sheng” MCHJning tashkil etilayotgan ishlab chiqarish quvvatlarida qoʻshma korxona loyiha quvvatiga chiqqan paytdan boshlab (2011-2012-yillar) 600 ming dona qoramol terisini qayta ishlashni, shuningdek yiliga 4 mln kv. m keramik plitkalar ishlab chiqarishni, 300 ming juft poyabzal ishlab chiqarishni taʼminlash;

ishlab chiqarilayotgan charm va poyabzalning kamida 70 foizini hamda keramik plitkalarning 55 foizini eksport qilishga;

ishlab chiqarishga yollangan xodimlar umumiy sonining kamida 70 foizi miqdorida mahalliy mutaxassislarni jalb etish.

Oʻzbekiston Respublikasi Investitsiyalar boʻyicha davlat qoʻmitasi xorijiy investor tomonidan tuzilgan Investitsiya shartnomasi doirasida qabul qilingan majburiyatlarning soʻzsiz bajarilishi ustidan nazoratni taʼminlasin.

4. Oʻzbekiston Respublikasi Prezidentining “Toʻgʻridan-toʻgʻri xususiy xorijiy investitsiyalarni jalb etishni ragʻbatlantirish borasidagi qoʻshimcha chora-tadbirlar toʻgʻrisida” 2005-yil 11-apreldagi PF-3594-son Farmoni 1-bandining birinchi xatboshida nazarda tutilgan imtiyozlar yuqorida koʻrsatib oʻtilgan Investitsiya shartnomasi kuchga kirgan sanadan boshlab 7 yil mobaynida “Peng Sheng” MCHJning xorijiy investitsiyalar ishtirokidagi korxonalariga ishlab chiqarilayotgan mahsulotlarning barcha turlariga tatbiq etilsin.

5. “Peng Sheng” MCHJ:

respublikada ishlab chiqarilmaydigan va qurilish uchun zarur boʻlgan, Vazirlar Mahkamasi tomonidan tasdiqlanadigan roʻyxatlar boʻyicha Sirdaryo viloyatida integratsiyalashgan ishlab chiqarish kompleksini qurish davrida olib kelinadigan texnik hujjatlar, mashinalar, maxsus texnika va mexanizmlar, maxsus transport vositalari (yengil avtomobillardan tashqari), qurilish materiallari va konstruksiyalari;

2012-yilning 1-yanvarigacha Vazirlar Mahkamasi tomonidan tasdiqlanadigan roʻyxatlar boʻyicha tayyor charm, charm mahsulotlari, poyabzal va keramik plitalar ishlab chiqarish uchun foydalaniladigan, respublikada ishlab chiqarilmaydigan asbob-uskunalar, xomashyo va materiallar.

6. Oʻzbekiston Respublikasi Tashqi ishlar vazirligi “Peng Sheng” MCHJ buyurtmanomalariga binoan mazkur qarorni amalga oshirish doirasida jalb etiladigan xorijiy mutaxassislar va ularning oila aʼzolariga kirish vizalari belgilangan tartibda rasmiylashtirilishini taʼminlasin.

7. Oʻzbekiston Respublikasi Ichki ishlar vazirligi “Peng Sheng” MCHJning buyurtmanomalari boʻyicha koʻp martalik vizalar berilishi va muddati uzaytirilishini, shuningdek, xorijiy mutaxassislar va ularning oila aʼzolari vaqtincha yashash joyida vaqtincha roʻyxatdan oʻtkazilishini va vaqtincha roʻyxatdan oʻtkazish muddati uzaytirilishini belgilangan tartibda taʼminlasin.

8. Oʻzbekiston Respublikasi Mehnat va aholini ijtimoiy muhofaza qilish vazirligi “Peng Sheng” MCHJga koʻrsatib oʻtilgan loyihani amalga oshirish uchun yuqori malakali xorijiy mutaxassislarni Oʻzbekiston Respublikasiga jalb etishga belgilangan tartibda ruxsatnomalar berilishini taʼminlasin.

9. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin

Oʻzbekiston Respublikasi Prezidenti I. KARIMOV

Toshkent sh.,

2009-yil 24-iyun,

PQ-1139-son