Qoraqalpogʻiston Respublikasi adliya vazirligi, viloyatlar va toshkent shahar adliya boshqarmalari huzuridagi malaka komissiyalari toʻgʻrisidagi nizomni tasdiqlash haqida (2151-son)
29.10.2010
OʻZBEKISTON RESPUBLIKASI ADLIYA VAZIRINING
buyrugʻi
[Oʻzbekiston Respublikasi Adliya vazirligi tomonidan 2010-yil 29-oktabrda roʻyxatdan oʻtkazildi, roʻyxat raqami 2151]
Oʻzbekiston Respublikasining “Adliya organlari va muassasalari faoliyati takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2010-y., 37-son, 313-modda) va Oʻzbekiston Respublikasi Prezidentining 2018-yil 13-apreldagi PQ-3666-son “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida”gi qaroriga muvofiq buyuraman:
1. Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi malaka komissiyalari toʻgʻrisidagi nizom ilovaga muvofiq tasdiqlansin.
2. Oʻzbekiston Respublikasi Adliya vazirligi Hayʼatining 2006-yil 8-noyabrdagi 27-son “Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari qoshidagi notariat boʻyicha malaka komissiyalari toʻgʻrisidagi nizomni tasdiqlash haqida”gi qarori Adliya vazirligi Hayʼatining 2010-yil 28-oktabrdagi 26/10-son qarori bilan oʻz kuchini yoʻqotganligi maʼlumot uchun qabul qilinsin.
3. Mazkur buyruq davlat roʻyxatidan oʻtkazilsin va Idoraviy meʼyoriy hujjatlarni davlat roʻyxatidan oʻtkazish boshqarmasi (B. Boliyev) Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining davlat reyestriga tegishli yozuv kiritsin.
4. Qonun hujjatlarini turkumlash va huquqiy axborot boshqarmasi (S. Nuriyev) va Notariat, FHDY va advokatura boshqarmasi (D. Yakubova) ushbu normativ-huquqiy hujjatni oʻn kun muddat ichida barcha manfaatdor shaxslarga yetkazilishi va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.
5. Mazkur buyruq davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.
6. Mazkur buyruq ijrosini nazorat qilish vazir oʻrinbosari E. Kanyazov zimmasiga yuklansin.
Vazir R. MUHITDINOV
Toshkent sh.,
2010-yil 29-oktabr,
232-mh-son
Oʻzbekiston Respublikasi adliya vazirining 2010-yil 29-oktabrdagi 232-mh-son buyrugʻiga ILOVA
Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi malaka komissiyalari toʻgʻrisida
NIZOM
Mazkur Nizom Oʻzbekiston Respublikasi “Notariat toʻgʻrisida”gi Qonunining (Oʻzbekiston Respublikasi Oliy Majlisining Axborotnomasi, 1997-y., 2-son, 42-modda) 31-moddasiga muvofiq, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi malaka komissiyalari (bundan keyingi oʻrinlarda malaka komissiyasi deb yuritiladi) faoliyatini tashkil etish tartibini belgilaydi.
I. Umumiy qoidalar
1. Malaka komissiyalari:
notarial idorada kamida bir yil stajirovka oʻtagan;
sudyalik lavozimida kamida besh yil ishlagan;
notarius yordamchisi lavozimida kamida uch yil ishlagan;
adliya organlarining notarial faoliyatga rahbarlik qilish va ushbu faoliyatni nazorat qilish bilan bogʻliq lavozimlarida kamida uch yil ishlagan;
malaka imtihonini topshirgan, lekin notarius lavozimida uch yil mobaynida ishlamagan shaxslardan (talabgorlardan) malaka imtihonini qabul qiladilar.
2. Malaka komissiyalari oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda boshqa qonun hujjatlariga, shuningdek mazkur Nizomga amal qiladi.
3. Malaka komissiyalari oʻz vakolatlari doirasida qarorlar qabul qiladi. Davlat organlari va boshqa manfaatdor shaxslarning malaka komissiyalari faoliyatiga aralashishiga yoʻl qoʻyilmaydi.
4. Malaka komissiyalarining moddiy-texnika va moliyaviy taʼminoti Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (bundan keyingi oʻrinlarda adliya boshqarmasi deb yuritiladi) tomonidan amalga oshiriladi.
II. Malaka komissiyasi faoliyatini tashkil etish
5. Malaka komissiyasi tarkibi uch yil muddatga tasdiqlanadi.
Malaka komissiyalari adliya boshqarmalari rahbarlarining buyruqlari bilan tajribali notariuslar va adliya organlarining boshqa xodimlari orasidan teng miqdorda, 7 yoki 9 kishidan iborat tarkibda tuziladi.
Malaka komissiyasi majlislarining xolisligi va odilligini taʼminlash maqsadida, zaruratga qarab, ularda Oʻzbekiston Respublikasi Adliya vazirligi Huquqiy xizmat koʻrsatishni davlat tomonidan tartibga solish boshqarmasi xodimlari ovoz berish huquqisiz ishtirok etishi mumkin.
6. Adliya boshqarmasi rahbarining oʻrinbosarlaridan biri malaka komissiyasi raisi hisoblanadi. Malaka komissiyasi raisi vaqtincha boʻlmaganda (xizmat safari, mehnat taʼtili, kasallik va h. k.) adliya boshqarmasining rahbari yoki uning boshqa oʻrinbosari rais etib tayinlanadi. Malaka komissiyasi raisi oʻrinbosari komissiya tarkibidan tayinlanadi.
7. Bir shaxs bir vaqtning oʻzida malaka komissiyasi va Oʻzbekiston Respublikasi Adliya vazirligi huzuridagi Oliy malaka komissiyasining (bundan keyingi oʻrinlarda Oliy malaka komissiyasi deb yuritiladi) aʼzosi boʻlishi mumkin emas.
8. Malaka komissiyasi aʼzosi boʻlgan adliya boshqarmasining notariat boʻyicha mutaxassis xodimlaridan biri malaka komissiyasining masʼul kotibi etib tayinlanadi.
9. Malaka komissiyasining majlislari zaruratga qarab oʻtkaziladi.
Malaka komissiyasining raisi majlis oʻtkazilishidan kamida yetti kun oldin majlisning sanasi, vaqti va joyini belgilaydi va bu haqda talabgorlar haqidagi maʼlumotlarni taqdim etgan holda Oʻzbekiston Respublikasi Adliya vazirligi Huquqiy xizmat koʻrsatishni davlat tomonidan tartibga solish boshqarmasini xabardor qiladi.
Malaka komissiyasining majlisi, agar unda malaka komissiyasi aʼzolarining kamida uchdan ikki qismi qatnashsa, vakolatli (kvorumga ega) hisoblanadi.
10. Malaka komissiyasining qarori ochiq ovoz berish yoʻli bilan majlisda qatnashgan komissiya aʼzolarining koʻpchilik ovozi bilan qabul qilinadi. Ovozlar teng boʻlganda, komissiya raisining ovozi hal qiluvchi hisoblanadi.
11. Malaka komissiyasining majlisi bayonnoma bilan rasmiylashtiriladi. Bayonnoma komissiya aʼzolari tomonidan imzolanadi va muhr bilan tasdiqlanadi.
Malaka komissiyasining qaroridan norozi boʻlgan malaka komissiyasining aʼzosi komissiya majlisining bayonnomasiga oʻzining fikr-mulohazalarini yozma shaklda bayon etishga haqli.
12. Bayonnomada:
majlis oʻtkaziladigan sana va joy, uning boshlanish va yakunlanish vaqti;
majlisda qatnashgan komissiya aʼzolarining roʻyxati;
majlisda Oʻzbekiston Respublikasi Adliya vazirligi Huquqiy xizmat koʻrsatishni davlat tomonidan tartibga solish boshqarmasi xodimi qatnashganda, uning familiyasi, ismi, otasining ismi va lavozimi;
majlisda hozir boʻlgan va hozir boʻlmagan talabgorlar roʻyxati;
har bir talabgor tomonidan olingan bilet raqami va undagi savollar mazmuni;
talabgor tomonidan biletdagi savollarga javob bergan yoki javob bera olmaganligi toʻgʻrisidagi maʼlumotlar;
ayrim javoblarni aniqlashtirish maqsadida komissiya aʼzolari tomonidan berilgan savollar va talabgorning unga bergan javoblari mazmuni;
talabgor tomonidan malaka imtihonini topshirish natijalari boʻyicha ovoz berish yakunlari;
qabul qilingan qarorlar;
komissiya qarorlari ustidan shikoyat qilish tartibi;
malaka imtihonini qabul qilish (stajirovka oʻtagan talabgorning hisobotini eshitish) jarayoniga taalluqli boʻlgan boshqa maʼlumotlar aks ettiriladi.
13. Malaka komissiyasi majlisining bayonnomasidan koʻchirmalar qaror qabul qilingan kundan boshlab uch kundan kechiktirmay manfaatdor shaxslarga yuboriladi yoki tilxat olingan holda topshiriladi. Malaka komissiyasi majlisining bayonnomasidan koʻchirmalar adliya boshqarmasining muhri bilan tasdiqlanadi.
Malaka komissiyasi majlisi bayonnomasidan koʻchirmalarda majlis oʻtkazilgan sana va joy toʻgʻrisidagi maʼlumotlar, qabul qilingan qaror va ushbu qaror ustidan shikoyat qilish tartibi bayon etiladi.
III. Malaka komissiyasining huquq va majburiyatlari
14. Malaka komissiyasi quyidagi huquqlarga ega:
talabgorlarning murojaatlarini koʻrib chiqishda zaruratga qarab, manfaatdor shaxslar va tegishli tashkilotlardan adliya boshqarmasi orqali qoʻshimcha hujjatlarni soʻrab olish;
mazkur Nizomning 33-bandi talablari buzilganda, talabgorni malaka imtihoni oʻtkazilayotgan xonadan chiqarib yuborish.
15. Malaka komissiyasi:
malaka imtihonlarini xolisona oʻtkazishga;
Oliy malaka komissiyasining qarorlarini bajarishga majburdir.
16. Qonun hujjatlariga muvofiq malaka komissiyasi boshqa huquq va majburiyatlarga ega boʻlishi mumkin.
IV. Stajirovkani oʻtagan talabgorni malaka imtihoniga qoʻyish
17. Stajirovkani oʻtagan talabgor malaka imtihonini topshirgunga qadar Notarius stajorining faoliyatini tashkil etish tartibi toʻgʻrisidagi nizomga (roʻyxat raqami 2149, 2010-yil 20-oktabr) muvofiq stajirovka natijalari boʻyicha malaka komissiyasiga hisobot beradi.
18. Hisobot eshitilgandan keyin malaka komissiyasi stajirovka oʻtagan talabgorning hisobotini maʼlumot uchun qabul qiladi.
19. Malaka komissiyasi stajirovkani oʻtagan talabgorning hisobotini eshitish davomida Notarius stajorining faoliyatini tashkil etish tartibi toʻgʻrisidagi nizom (roʻyxat raqami 2149, 2010-yil 20-oktabr) talablari buzilganlik holatini aniqlasa, bu toʻgʻrisida komissiya majlisining bayonnomasida qayd etib oʻtadi. Malaka komissiyasi raisi ushbu holat yuzasidan tegishli choralar koʻrish, shu jumladan aybdor shaxslarni qonun hujjatlariga muvofiq tegishli javobgarlikka tortish toʻgʻrisida adliya boshqarmasi rahbariga taklif kiritadi.
20. Stajirovka natijalari boʻyicha hisoboti eshitilgan talabgordan malaka komissiyasining aynan shu majlisida malaka imtihoni qabul qilinadi.
V. Malaka imtihonini topshirish uchun zarur boʻlgan hujjatlar
21. Talabgor malaka imtihonini topshirish uchun adliya boshqarmasiga quyidagi hujjatlarni taqdim etadi:
malaka imtihonini topshirish toʻgʻrisidagi ariza;
belgilangan shaklda toʻldirilgan shaxsiy varaqa;
pasport nusxasi;
oliy yuridik maʼlumot toʻgʻrisidagi diplom (nusxasi olinib, asli qaytariladi);
mehnat daftarchasi (nusxasi olinib, asli qaytariladi) yoki ish joyida tasdiqlangan nusxasi;
stajirovka oʻtash natijasi toʻgʻrisida talabgorning hisoboti, stajirovka rahbari tomonidan berilgan tavsifnoma va xulosa;
Mazkur Nizom 1-bandining uchinchi — oltinchi xatboshilarida nazarda tutilgan shaxslardan (talabgorlardan) mazkur bandning yettinchi xatboshisida nazarda tutilgan hujjatlar talab etilmaydi.
22. Hujjatlarni qabul qilish, roʻyxatga olish, ularni tayyorlash va yigʻish masʼul kotib tomonidan amalga oshiriladi.
23. Malaka komissiyasiga taqdim etilgan hujjatlar masʼul kotib tomonidan hujjatlar roʻyxatini tuzgan holda qabul qilib olinadi.
24. Malaka imtihonini qabul qilish uchun materiallarni tayyorlab boʻlganidan keyin masʼul kotib ularni malaka komissiyasining raisiga masalani komissiya majlisining kun tartibiga kiritish uchun taqdim etadi.
25. Hujjatlar quyidagi hollarda talabgorga qaytarib beriladi:
talabgor malaka imtihonini topshira olmagan kundan eʼtiboran olti oy oʻtmasdan takroran malaka imtihonini topshirish uchun murojaat qilsa;
mazkur Nizomning 21-bandida nazarda tutilgan hujjatlar toʻliq topshirilmagan boʻlsa;
talabgor taqdim etgan hujjatlarda notoʻgʻri yoki buzib koʻrsatilgan maʼlumotlar mavjud boʻlsa;
talabgor belgilangan tartibda muomalaga layoqatsiz yoki muomala layoqati cheklangan deb topilgan, qasddan sodir etgan jinoyati uchun sudlanganlik holati tugallanmagan yoki sudlanganligi olib tashlanmagan, shuningdek, oʻz kasbiy faoliyatiga mos kelmaydigan qilmishlar sodir etganligi uchun notarius, advokat, tergovchi, prokuror, sudya yoki huquqni muhofaza qiluvchi organlarning boshqa xodimi sifatidagi vakolati belgilangan tartibda tugatilgan shaxs boʻlsa;
agar talabgor oʻz hujjatlarini qaytarib berish toʻgʻrisida ariza bilan murojaat etsa.
26. Mazkur Nizomning 25-bandida nazarda tutilgan holatlar mavjud boʻlsa, asoslantirilgan sabablari koʻrsatilgan holda taqdim etilgan hujjatlar talabgorga qaytarib beriladi. Hujjatlarni qaytarib berishning sabablari bartaraf etilsa, hujjatlar takroran taqdim etilishi mumkin.
VI. Malaka imtihonini qabul qilish
27. Malaka imtihoni talabgorlardan zarur hujjatlar qabul qilib olingan kundan eʼtiboran bir oy muddat ichida oʻtkaziladi. Bunda hujjatlar adliya boshqarmasining devonxonasida roʻyxatdan oʻtkazilishi lozim.
Talabgor malaka komissiyasi majlisining oʻtkazilishidan kamida besh kun oldin majlis oʻtkaziladigan sana, vaqt va joy toʻgʻrisida xabardor qilinadi.
28. Talabgor malaka komissiyasining majlisiga uzrli sabablarga koʻra (kasallik, homiladorlik va tugʻish taʼtillari, bola parvarishlash taʼtillari, harbiy yigʻinlarga chaqirilganlik va shu kabi holatlarda) kela olmasa, malaka komissiyasi talabgor malaka imtihonini komissiyaning keyingi majlisida topshirishi toʻgʻrisida qaror qabul qiladi. Majlis oʻtkaziladigan sana, vaqt va joy haqida qoʻshimcha ravishda maʼlum qilinadi.
Talabgor malaka komissiyasining majlisida uzrli sabablarsiz hozir boʻlmasa, u tomonidan taqdim etilgan hujjatlar adliya boshqarmasida koʻpi bilan bir oy muddat saqlanadi. Ushbu muddat oʻtgandan keyin masʼul kotib koʻrsatilgan hujjatlarni talabgorga qaytarib beradi.
29. Malaka imtihoni barcha talabgorlar uchun bitta xonada, ogʻzaki va yozma shakllarda oʻtkaziladi.
Malaka imtihoni oʻtkazilayotgan xonada begona shaxslarning boʻlishiga yoʻl qoʻyilmaydi.
30. Talabgorlarga imtihon varaqlari beriladi, ularning har biri adliya boshqarmasi rahbarining imzosi va muhri bilan tasdiqlanadi.
31. Talabgorning imtihon biletidagi savollarga javoblar tayyorlashi uchun sakson daqiqa vaqt beriladi.
32. Malaka imtihoni adliya boshqarmasi tomonidan tasdiqlangan roʻyxatdagi savollardan tuzilgan imtihon biletlari asosida oʻtkaziladi.
33. Imtihon biletidagi savollarga javoblar tayyorlashda talabgorga:
boshqa talabgorlar bilan suhbatlashish;
uyali telefon va boshqa aloqa hamda telekommunikatsiya vositalari, kitob va shpargalkalardan foydalanish;
imtihon biletini topshirmasdan oldin, xonadan chiqish taqiqlanadi.
Talabgorning mazkur qoidaga amal qilmasligi uni malaka imtihoni topshirishdan chetlashtirish uchun asos boʻladi. Ushbu holat komissiya majlisining bayonnomasida aks ettiriladi.
34. Talabgor oʻzining imtihon biletidagi savollarga ogʻzaki javob beradi. Malaka komissiyasining aʼzolari ayrim javoblarni aniqlashtirish maqsadida talabgorga savollar berishi mumkin.
35. Savollarga javob berib boʻlgan talabgorga oʻz imtihon varaqasini topshirgandan soʻng xonadan chiqishga ruxsat beriladi.
36. Imtihon varagʻi malaka komissiyasi majlisining bayonnomasiga ilova qilinadi.
37. Malaka imtihonini topshirish natijalari boʻyicha malaka komissiyasi quyidagi qarorlardan birini qabul qiladi:
talabgorni malaka imtihonini topshirgan deb topish toʻgʻrisida;
talabgorni malaka imtihonini topshira olmagan deb topish toʻgʻrisida.
38. Talabgor tomonidan malaka imtihonini topshirish uchun taqdim etilgan hujjatlar malaka komissiyasi tomonidan qaror qabul qilgan kundan boshlab uch yil davomida adliya boshqarmasi arxivida saqlanadi.
VII. Yakuniy qoidalar
39. Malaka komissiyasining qarori ustidan apellatsiya malaka komissiyasining qarori manfaatdor shaxsga topshirilgan kundan eʼtiboran bir oylik muddat ichida Oliy malaka komissiyasiga beriladi.
40. Apellatsiya Oliy malaka komissiyasiga bevosita yoki adliya boshqarmasi orqali yuboriladi.
Apellatsiya adliya boshqarmasi orqali berilganda, adliya boshqarmasi uch kunlik muddat ichida apellatsiyani u bilan bogʻliq barcha hujjatlarni ilova qilgan holda Oliy malaka komissiyasiga yuboradi.
41. Malaka komissiyasi qarorlari ustidan qonun hujjatlarida belgilangan tartibda sudga shikoyat qilinishi mumkin.
42. Mazkur Nizomning buzilishida aybdor shaxslar qonun hujjatlariga muvofiq javobgarlikka tortiladi.