Muborak haj ziyoratiga boruvchilarga yordam koʻrsatish haqida (270-son)

12.12.2005

Oʻzbekiston Respublikasi Vazirlar Mahkamasining

qarori

Mamlakatimiz fuqarolarining vijdon erkinligi konstitutsiyaviy huquqlarini taʼminlash, muborak haj amallarini ado etish uchun qulayliklar va zarur sharoitlar yaratilishini davlat tomonidan qoʻllab-quvvatlash maqsadida Vazirlar Mahkamasi qaror qiladi:

1. 2006-yilda muborak haj safarini tashkil qilish, fuqarolarning talab-ehtiyojlarini adolatli ravishda qondirish masʼuliyati Oʻzbekiston musulmonlari idorasi va uning joylardagi mutasaddi vakillari zimmasida ekanligi hamda ziyoratga boruvchilar soni 5000 kishi miqdorida belgilanganligi eʼtiborga olinsin.

2. “Oʻzbekiston havo yoʻllari” milliy aviakompaniyasi (V.Tyan) 2005-yil dekabr - 2006-yil yanvar oylarida ziyoratchilarning haj safariga borib kelishlari uchun qulay sharoitlar yaratish, ularni Toshkent-Madina, Jidda-Toshkent yoʻnalishlarida hamda viloyatlardan Toshkent shahriga va aksincha tashish, aviachiptalar narxini arzonlashtirish choralarini koʻrsin.

3. Oʻzbekiston Respublikasi Ichki ishlar vazirligi (Z.Almatov), Tashqi ishlar vazirligi (E.Gʻaniyev), Davlat bojxona qoʻmitasi (B.Matlyubov) Oʻzbekiston musulmonlari idorasining taqdimiga koʻra ziyoratchilarning safar hujjatlari belgilangan tartibda rasmiylashtirilishini taʼminlasinlar.

4. Oʻzbekiston Respublikasi Sogʻliqni saqlash vazirligi (F.Nazirov) Saudiya Arabistoni haj ishlari vazirligi tomonidan qoʻyilgan tibbiy talablarni va mamlakatning iqlim sharoitlarini hisobga olgan holda ziyoratchilarni tibbiy koʻrikdan oʻtkazish, emlash ishlarini hamda haj davrida ularga yordam koʻrsatilishini tashkil etsin.

5. Oʻzbekiston Respublikasi Ichki ishlar vazirligi (Z.Almatov) va Milliy xavfsizlik xizmati (R.Inoyatov) respublikamiz fuqarolarining noqonuniy yoʻllar bilan haj ziyoratiga borishi oqibatida roʻy berishi mumkin boʻlgan koʻngilsiz holatlarning oldini olish hamda ziyoratchilarning umumiy xavfsizligini taʼminlash chora-tadbirlarini belgilasinlar.

6. Oʻzbekiston Respublikasi Markaziy banki (F.Mullajonov) va Tashqi iqtisodiy faoliyat milliy banki (S.Raximov) Oʻzbekiston musulmonlari idorasi tasdiqlagan roʻyxatiga binoan hajga ketayotgan fuqarolarning Saudiya Arabistonidagi xarajatlari uchun mablagʻlarni qulay sharoitlarda konvertatsiya qilish va xorijiy hamkorga oʻtkazish choralarini koʻrsin.

7. Din ishlari boʻyicha qoʻmita (Sh.Minovarov) haj ziyoratlarini munosib tashkil etish uchun zarur chora-tadbirlarni daxldor davlat idoralari va jamoat tashkilotlari bilan muvofiqlashtirishda Oʻzbekiston musulmonlari idorasiga yaqindan yordam koʻrsatsin.

8. Oʻzbekiston musulmonlari idorasi hamda ommaviy axborot vositalariga muborak haj ziyoratining mohiyati, talablari va uni amalga oshirishning tartib-qoidalari va haj ziyorati bilan bogʻliq boshqa masalalarni oshkora yoritib borish tavsiya etilsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.Qosimov zimmasiga yuklansin.

Oʻzbekiston Respublikasi Bosh vaziri Sh. MIRZIYOYEV

Toshkent sh.,

2005-yil 12-dekabr,

270-son