2005-yilda paxta yetishtirishning prognoz hajmlari va gʻoʻzani navlar boʻyicha joylashtirish toʻgʻrisida (4-son)

05.01.2005

Oʻzbekiston Respublikasi Vazirlar Mahkamasining

qarori

Gʻoʻzaning tezpishar, yuqori hosilli va istiqbolli navlarini oqilona joylashtirish, paxta yetishtiruvchi xoʻjaliklarni 2005-yil hosili uchun konditsiyali chigitlar bilan taʼminlash maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi hamda viloyatlar hokimliklarining Oʻzbekiston Respublikasi Qishloq va suv xoʻjaligi vazirligi, Tashqi iqtisodiy aloqalar agentligi, “Oʻzpaxtasanoat” uyushmasi bilan kelishilgan:

2005-yilda 1-ilovaga muvofiq paxta yetishtirishning prognoz hajmlari;

gʻoʻzaning roʻyxatdan oʻtkazilgan va istiqbolli navlarini 2-ilovaga muvofiq joylashtirish;

chigitni 3-ilovaga muvofiq plyonka ostiga ekish va xoʻjaliklarni polietilen plyonkalar bilan taʼminlash;

2005-yil uchun gʻoʻzaning asosiy seleksiya navlarini 4-ilovaga muvofiq istiqbolliligi va iqtisodiy ragʻbatlantirilishi boʻyicha guruhlarga ajratish haqidagi takliflari qabul qilinsin.

Paxta yetishtirishning 1-ilovada koʻrsatilgan hajmlariga 2005-yil hosili uchun paxta yetishtiruvchi xoʻjaliklar va tayyorlov tashkilotlari oʻrtasida kontraktatsiya shartnomalari tuzishda nazorat koʻrsatkichlar sifatida qaralsin.

2. “Oʻzpaxtasanoat” uyushmasi, Oʻzbekiston Respublikasi Qishloq va suv xoʻjaligi vazirligi:

2005-yil 10-fevralgacha urugʻlik paxtani tozalashni, 25-fevralgacha esa urugʻlik chigitni tayyorlashni tugallasinlar, shuningdek urugʻchilik korporatsiyalari va kompaniyalarini tuksizlantirilgan chigitlar bilan 5-ilovaga muvofiq hajmlarda taʼminlasinlar;

xoʻjaliklarga yuqori sifatli urugʻlik chigitning faqat dorilangan va sertifikatlar mavjud boʻlgan holda, seleksiya navlarini joylashtirishning tasdiqlangan tartibiga qatʼiy muvofiq ravishda berilishini taʼminlasinlar;

2005-yil 20-fevralgacha urugʻlik chigitni 6-ilovaga muvofiq hajmlarda viloyatlararo tashishni tugallasinlar.

3. 2005-yilda:

davlat ehtiyojlari uchun xarid qilinadigan paxta tolasi hajmi uning amalda yetishtiriladigan hajmining 50 foizi miqdorida;

Vazirlar Mahkamasining 1995-yil 31-oktabrdagi 421-son, 2001-yil 2-maydagi 201-son, 2001-yil 26-noyabrdagi 461-son va 2004-yil 22-oktabrdagi 494-son qarorlariga muvofiq Xalqaro tiklanish va taraqqiyot banki hamda Osiyo taraqqiyot banki ishtirokidagi loyihalar amalga oshirilayotgan tumanlar va qishloq xoʻjaligi korxonalari uchun paxta xomashyosi xaridining belgilangan tartibi va prinsiplari saqlab qolinsin.

4. Oʻzbekiston Respublikasi Qishloq va suv xoʻjaligi vazirligi, “Oʻzpaxtasanoat” uyushmasi, Qoraqalpogʻiston Respublikasi Vazirlar Kengashi, viloyatlar hokimliklari:

gʻoʻza navlarini joylashtirishning tasdiqlangan tartibiga rioya qilinishi ustidan nazoratni taʼminlasinlar, tavsiya etilgan gʻoʻza navining tumanda ikkitadan ortiq, xoʻjaliklarda esa — bittadan ortiq ekilishiga yoʻl qoʻymasinlar;

urugʻlik chigit ekish uchun shirkat va fermer xoʻjaliklari roʻyxatini bir oy muddatda tanlov asosida qayta koʻrib chiqsinlar.

5. Quyidagilar:

“Paxtasanoat” hududiy aksiyadorlik birlashmalari bilan paxtachilik xoʻjaliklari kontraktatsiya shartnomalarini oʻz vaqtida tuzish yuzasidan javobgarlik — Qoraqalpogʻiston Respublikasi Vazirlar Kengashi va viloyatlar hokimliklariga;

paxtachilik xoʻjaliklariga agrotexnika tadbirlarini oʻtkazishda mexanizatsiyalashgan xizmatlarni oʻz vaqtida koʻrsatish, texnikani taʼmirlash uchun zarur ehtiyot qismlar yetkazib berish yuzasidan javobgarlik — “Oʻzagromashservis” uyushmasiga, “Oʻzqishloqxoʻjalikmash-xolding” kompaniyasiga, Qoraqalpogʻiston Respublikasi Vazirlar Kengashi va viloyatlar hokimliklariga;

paxtachilik xoʻjaliklariga tuzilgan shartnomalar boʻyicha haqining 30 foizi oldindan toʻlangan taqdirda mineral oʻgʻitlarni oʻz vaqtida yetkazib berish yuzasidan javobgarlik — “Oʻzkimyosanoat” kompaniyasiga, kimyolashtirish vositalarini yetkazib berish yuzasidan javobgarlik esa — Oʻzbekiston Respublikasi Qishloq va suv xoʻjaligi vazirligining Respublika oʻsimliklarni himoya qilish va agrokimyo markaziga;

haqini belgilangan tartibda toʻlash sharti bilan, yonilgʻi-moylash materiallari bilan uzluksiz taʼminlash yuzasidan javobgarlik — “Oʻzneftmahsulot” kompaniyasiga yuklansin.

6. “Oʻzbekneftgaz” milliy xolding kompaniyasi 2005-yilda chigit ekish uchun polietilen plyonka ishlab chiqaradigan zavodlarni 7-ilovaga muvofiq jadvalga binoan xomashyo (granulalar) bilan taʼminlashni tashkil etsin.

“Oʻzkimyosanoat” kompaniyasi, Andijon viloyati hokimligi polietilen plyonkalar ishlab chiqarishni va ularning paxta yetishtiruvchi xoʻjaliklarga zarur miqdorda yetkazib berilishini tashkil etsinlar.

8. Quyidagilar:

Shoʻrtan gaz-kimyo kompleksi 2005-yilda chigit ekish uchun — polietilen plyonka ishlab chiqaruvchi zavodlarga xomashyo (granulalar)ning jami hajmini sotishda;

“Jizzax plastmassa” aksiyadorlik jamiyati, “Andijonpolietileni” qoʻshma korxonasi — tayyor polietilen plyonkalarni paxta yetishtiruvchi xoʻjaliklarga sotishda;

2005-yil paxta hosili uchun foydalanish uchun “Oʻzpaxtasanoat” uyushmasining hududiy korxonalariga sotiladigan chigitni dorilash vositalari qoʻshilgan qiymat soligʻi toʻlashdan istisno tariqasida ozod qilinsin.

9. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi, “Oʻzagromashservis” uyushmasi:

chigit ekish uchun moʻljallangan yerlarda yanvar-fevral oylarida pushta olish amaliyotini keng joriy etsinlar;

kuchli shoʻrlangan yerlarga chigit ekmasinlar;

yerlarning botqoqlanishining, gʻoʻzaning zararkunandalar va kasalliklar bilan zararlanishining oldini olish uchun chigit ekish moʻljallangan maydonlar yaqiniga sholi va makkajoʻxori ekmasinlar.

10. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M.Mirziyoyev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2005-yil 5-yanvar,

4-son

Vazirlar Mahkamasining 2005-yil 5-yanvardagi 4-son qaroriga 1-ILOVA

2005-yil hosili paxta xomashyosi yetishtirishning prognoz hajmlari

Vazirlar Mahkamasining 2005-yil 5-yanvardagi 4-son qaroriga 2-ILOVA

Oʻzbekiston Respublikasi boʻyicha 2005-yil hosili uchun gʻoʻzaning roʻyxatga olingan va istiqbolli navlarini joylashtirish

Vazirlar Mahkamasining 2005-yil 5-yanvardagi 4-son qaroriga 3-ILOVA

2005-yil hosili uchun chigit plyonka ostiga ekiladigan maydonlar va paxta yetishtiruvchi xoʻjaliklarni polietilen plyonka bilan taʼminlash

Vazirlar Mahkamasining 2005-yil 5-yanvardagi 4-son qaroriga 4-ILOVA

Gʻoʻzaning asosiy seleksiya navlarini istiqbolliligi va iqtisodiy ragʻbatlantirilishi boʻyicha guruhlarga ajratish

Vazirlar Mahkamasining 2005-yil 5-yanvardagi 4-son qaroriga 5-ILOVA

2005-yil hosili uchun urugʻlik chigitlarni tayyorlash

Vazirlar Mahkamasining 2005-yil 5-yanvardagi 4-son qaroriga 6-ILOVA

2005-yil hosili uchun urugʻlik chigitni viloyatlararo tashish

Vazirlar Mahkamasining 2005-yil 5-yanvardagi 4-son qaroriga 7-ILOVA

Polietilen plyonka ishlab chiqarish uchun xomashyo (granulalar) bilan taʼminlash

JADVALI