“Oʻzbekinvest” eksport-import milliy sugʻurta kompaniyasini tashkil etish toʻgʻrisida (PF-1710-son)

18.02.1997

Oʻzbekiston Respublikasi Prezidentining

Farmoni

Eksport oʻsishini yanada ragʻbatlantirish, oʻzbekistonlik eksport qiluvchilarni sugʻurtaviy himoya qilishni taʼminlash, Vatanimizda ishlab chiqarilgan mahsulotlarning texnologiya, tovarlar va xizmatlar xalqaro bozorlariga kompleks marketing orqali kirib borishini taʼminlash maqsadida:

1. Oʻzbekiston Respublikasi Moliya vazirligi, Tashqi iqtisodiy aloqalar vazirligi, Oʻzbekiston Respublikasi Tashqi iqtisodiy faoliyat milliy bankining “Oʻzbekinvest” milliy sugʻurta kompaniyasini “Oʻzbekinvest” eksport-import milliy sugʻurta kompaniyasiga aylantirish toʻgʻrisidagi taklifi qabul qilinsin.

Belgilab qoʻyilsinki, “Oʻzbekinvest” eksport-import milliy sugʻurta kompaniyasi barcha mulkiy va nomulkiy huquq va majburiyatlar boʻyicha “Oʻzbekinvest” milliy sugʻurta kompaniyasining huquqiy vorisi hisoblanadi.

2. Quyidagilar “Oʻzbekinvest” eksport-import milliy sugʻurta kompaniyasi faoliyatining asosiy yoʻnalishlari etib belgilansin:

sarmoya, texnologiyalar, tovarlar va xizmatlarni milliy eksport qiluvchilarni xalqaro bozorlarda siyosiy, tijorat va tadbirkorlik tavakkalchiliklaridan sugʻurtaviy himoya qilishni taʼminlash;

Oʻzbekiston Respublikasining rezidentlari boʻlgan tijorat banklari tomonidan texnologiyalar, tovarlar va xizmatlar eksportini mablagʻ bilan taʼminlash uchun ajratiladigan eksport kreditlarini qoplashga sugʻurta kafolatlari berish;

kompleks marketing tahlilini va Vatanimizda ishlab chiqarilgan mahsulotlarning texnologiyalar, tovarlar va xizmatlar xalqaro bozorlariga samarali kirib borishi strategiyasi ishlab chiqilishini tashkil etish;

Oʻzbekiston Respublikasi iqtisodiyotining ustuvor tarmoqlariga jalb qilinayotgan chet el investitsiyalarini kompleks sugʻurtaviy himoya qilish.

3. “Oʻzbekinvest” eksport-import milliy sugʻurta kompaniyasining ustav sarmoyasi muassislar tomonidan 60 mln. AQSh dollariga teng miqdorda eʼlon qilinganligi va ustav sarmoyasi quyidagilar hisobiga shakllanishi maʼlumot uchun qabul qilinsin:

a) Moliya vazirligining 50 mln. AQSh dollariga teng miqdordagi taʼsis badali, bu badal:

qayta tashkil etilayotgan “Oʻzbekinvest” kompaniyasining 30 mln. AQSh dollariga teng miqdordagi oʻz mablagʻlaridan;

“Oʻzbekinvest Interneshnl” (London shahri) qoʻshma kompaniyasining 1996-1997-yillardagi faoliyatidan olingan dividendlardan va “Oʻzbekinvest” eksport-import milliy sugʻurta kompaniyasi faoliyatidan olingan 10 mln. AQSh dollariga teng miqdordagi oʻz foydasini sarmoyaga aylantirishdan;

kompaniyaning oʻz foydasini va Oʻzbekiston Respublikasi Moliya vazirligining 10 mln. AQSh dollariga teng miqdordagi 1998-yilda qoʻshiladigan mablagʻlarini sarmoyaga aylantirishdan hosil boʻladi;

b) Oʻzbekiston Respublikasi Tashqi iqtisodiy faoliyat milliy bankining 10 mln. AQSh dollari miqdoridagi 1997-yilda qoʻshiladigan taʼsis badali.

5. Belgilansinki, davlat eksport sugʻurtasi xalqaro normalariga muvofiq “Oʻzbekinvest” eksport-import milliy sugʻurta kompaniyasining Oʻzbekiston Respublikasi Hukumati bilan kelishilgan sugʻurta majburiyatlari boʻyicha Oʻzbekiston Respublikasi Moliya vazirligi kafil hisoblanadi.

6. “Oʻzbekinvest” eksport-import milliy sugʻurta kompaniyasi va uning hududiy shuʼba korxonalari daromaddan olinadigan soliqdan va mulk soligʻidan besh yil muddatga ozod qilinsin, soliq solishdan ozod qilingan barcha mablagʻlar kompaniyaning ustav sarmoyasini hamda uning sugʻurta (zaxira) jamgʻarmasini koʻpaytirishga yoʻnaltirilishi belgilab qoʻyilsin.

7. Vazirlar Mahkamasi “Oʻzbekinvest” eksport-import milliy sugʻurta kompaniyasi faoliyatini tashkil etish masalalari yuzasidan bir hafta muddatda qaror qabul qilsin.

Oʻzbekiston Respublikasining Prezidenti I. KARIMOV

Toshkent sh.,

1997-yil 18-fevral,

PF-1710-son