Oʻzbekiston xalq shoiri Muhammad Yusuf tavalludining 50 yilligini nishonlash toʻgʻrisida (123-son)
12.03.2004
Oʻzbekiston Respublikasi Vazirlar Mahkamasining
qarori
Betakror ijodi va ijtimoiy faoliyati bilan yosh avlodni Vatanga muhabbat va sadoqat ruhida tarbiyalash, yurtdoshlarimiz qalbida ona Oʻzbekiston bilan faxrlanish va fidoyilik tuygʻularini uygʻotish, milliy istiqlol gʻoyasini xalqimiz ongi va tafakkuriga singdirish borasidagi katta xizmatlarini, adabiyotimiz va sanʼatimiz rivojiga qoʻshgan munosib hissasini inobatga olib, Vazirlar Mahkamasi qaror qiladi:
1. Oʻzbekiston xalq shoiri, marhum Muhammad Yusuf tavalludining 50 yilligini nishonlash toʻgʻrisida Oʻzbekiston Yozuvchilar uyushmasi, Madaniyat ishlari vazirligi, “Kamolot” ijtimoiy harakati, “Oʻzbeknavo” estrada birlashmasi va keng jamoatchilik vakillarining taklifi maʼqullansin.
2. Muhammad Yusuf tavalludining 50 yilligini nishonlash boʻyicha tashkiliy qoʻmita tarkibi ilovaga muvofiq tasdiqlansin.
3. Tashkiliy qoʻmitaga bir oy muddatda mazkur sana munosabati bilan oʻtkaziladigan tadbirlar rejasini ishlab chiqish va amalga oshirish vazifasi topshirilsin. Tadbirlar rejasida quyidagilar koʻzda tutilsin:
shu yil may oyida Toshkent shahrida Muhammad Yusuf tavalludining 50 yilligiga bagʻishlangan xotira kechasini oʻtkazish;
shoirning bir jildlik asarlari saylanmasini nashr etish;;
oʻquv muassasalari, harbiy qismlar, mehnat jamoalari va mahallalarda yozuvchilar, sanʼatkorlar va olimlar ishtirokida Muhammad Yusuf ijodiga bagʻishlangan uchrashuv va adabiy kechalar tashkil etish;
shoir hayoti va ijodiga bagʻishlangan hujjatli videofilm yaratish.
4. Oʻzbekiston Respublikasida maʼmuriy-hududiy birliklar, aholi punktlari, tashkilotlar va boshqa toponimik obyektlarning nomlarini tartibga solish masalalari boʻyicha komissiyaning shoir xotirasini abadiylashtirish haqidagi qarori maʼlumot uchun qabul qilinsin.
5. Andijon viloyati hokimligiga shoir qabrini obodonlashtirish va yodgorlik lavhasi oʻrnatish topshirilsin.
6. Oʻzbekiston Respublikasi Oliy va oʻrta maxsus taʼlim vazirligi Mirzo Ulugʻbek nomidagi Oʻzbekiston Milliy universiteti qoshidagi Oliy adabiyot kursining eng isteʼdodli tinglovchilari uchun Muhammad Yusuf nomidagi stipendiyani taʼsis etsin.
7. Oʻzbekiston Matbuot va axborot agentligi, “Oʻzteleradio” kompaniyasi, Oʻzbekiston Milliy axborot agentligi va boshqa ommaviy axborot vositalariga shoir ijodiy merosining ahamiyatini targʻib etish, shuningdek, tavalludining 50 yilligini nishonlash bilan bogʻliq tadbirlarni keng yoritish tavsiya etilsin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A. Azizxoʻjayev zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2004-yil 12-mart,
123-son
Vazirlar Mahkamasining 2004-yil 12-martdagi 123-son qaroriga ILOVA
Oʻzbekiston xalq shoiri Muhammad Yusuf tavalludining 50 yilligini nishonlash boʻyicha tashkiliy qoʻmita tarkibi