Navroʻz umumxalq bayramini keng nishonlash toʻgʻrisida (128-son)

17.03.2004

Oʻzbekiston Respublikasi Vazirlar Mahkamasining

qarori

Navroʻz Sharq xalqlari, jumladan, Oʻzbekiston xalqi uchun eng qadimiy va azaliy bayramlardan biridir. Bahor fasli va tabiat uygʻonishining timsoli, yasharish va yangilanish ramzi boʻlmish bu ayyomni orziqib kutish, baland ruh va katta xursandchilik bilan nishonlash el-yurtimiz uchun olijanob anʼanaga aylanib qolgan.

Maʼlumki, Navroʻz bayrami yurtimizda mart oyining uchinchi oʻn kunligi boshlanishiga toʻgʻri keladi. Va shunga asoslanib, mamlakatimizda 21-mart kuni Navroʻz bayrami, deb eʼlon qilingan.

Anʼanaga koʻra, Navroʻzga bagʻishlab poytaxtimiz Toshkentda, viloyatlar, shahar va tuman markazlarida bayram marosimlari, xalq sayillari va tomoshalar oʻtkaziladi.

Uzoq va davomli tariximizdan maʼlumki, Navroʻz bir kun emas, bir oy mobaynida bayram qilinadi va joylarda odamlar tabiat bilan hamohang boʻlib, bu ayyom quvonchini koʻpchilik bilan baham koʻradi.

Xalqimizning mana shunday bayramlarni har qaysi voha va vodiyning mahalliy iqlim va tabiiy sharoitidan kelib chiqqan holda oʻtkazishi har tomonlama eʼtibor va qoʻllab-quvvatlashga munosibdir.

Respublika Gidrometereologiya Bosh boshqarmasining maʼlumotlariga koʻra, keyingi yillarda umuman iqlim oʻzgarishi munosabati bilan aynan shu mavsumda ob-havoning buzilib, yogʻingarchilik koʻp boʻlishi kuzatilmoqda va joriy yil ham bundan istisno emas.

Bunday vaziyat ommaviy bayram tadbirlarini ochiq maydonlarda, istirohat bogʻlarida xalqimizning keng ishtirokida oʻtkazish uchun muayyan qiyinchiliklar tugʻdirmoqda.

Navroʻz umumxalq bayramini milliy qadriyat va urf-odatlarimiz ruhida keng nishonlash, uni oʻtkazish uchun qulay shart-sharoit yaratish, odamlarning koʻngilli dam olishini tashkil etish maqsadida Vazirlar Mahkamasi qaror qiladi:

1. Poytaxtimiz Toshkentda, Qoraqalpogʻiston Respublikasining poytaxti Nukus shahrida, viloyatlar, shahar va tuman markazlarida Navroʻz umumxalq bayramiga bagʻishlangan tadbirlarni ob-havo sharoitini hisobga olib, mart oyining oxirigacha oʻtkazish maqsadga muvofiq, deb topilsin.

2. Bayramga tayyorgarlik koʻrish va uni oʻtkazish bilan bogʻliq masalalarni hal etish Qoraqalpogʻiston Respublikasi Joʻqorgʻi Kengesi Raisi, viloyatlar va Toshkent shahar hokimlari zimmasiga yuklansin.

Navroʻz umumxalq bayramiga tayyorgarlik koʻrish va uni oʻtkazish boʻyicha respublika tashkiliy qoʻmitasiga bayram munosabati bilan markazda va joylarda belgilangan barcha tashkiliy-amaliy ishlarni keng jamoatchilikni jalb qilgan holda, yuksak darajada oʻtkazish yuzasidan zarur chora-tadbirlar koʻrish vazifasi topshirilsin.

3. Ushbu qaror ijrosini nazorat qilish Bosh vazir Sh. Mirziyoyevga yuklatilsin.

Vazirlar Mahkamasining Raisi I. KARIMOV

Toshkent sh.,

2004-yil 17-mart,

128-son