Toshkent shahridagi Turin politexnika universiteti huzurida akademik litsey faoliyatini tashkil etish toʻgʻrisida (208-son)

20.09.2010

Oʻzbekiston Respublikasi Vazirlar Mahkamasining

qarori

Iqtidorli yoshlarning bilim olishlari uchun shart-sharoitlar yaratish, sanoatning yuqori texnologiyalarga asoslangan tarmoqlarining malakali mutaxassislarga boʻlgan ehtiyojini qondirish, aniq fanlar va ingliz tili boʻyicha chuqurlashtirilgan, kasbiy yoʻnaltirilgan taʼlim olishga boʻlgan ehtiyojni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda “Oʻzavtosanoat” aksiyadorlik kompaniyasining 2010/2011 oʻquv yilidan boshlab Toshkent shahridagi Turin politexnika universiteti huzurida aniq fanlar va ingliz tili chuqur oʻqitiladigan akademik litsey tashkil etish toʻgʻrisidagi taklifiga rozilik berilsin.

2. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markaziga Toshkent shahridagi Turin politexnika universiteti va “Oʻzavtosanoat” aksiyadorlik kompaniyasi bilan birgalikda:

akademik litseyda oʻqitishni davlat taʼlim standartlariga, oʻrta maxsus, kasb-hunar taʼlimining oʻquv rejalari va dasturlariga muvofiq amalga oshirish;

akademik litseyning pedagogik kadrlari tarkibini tanlov asosida malakali, chuqur kasbiy bilimga, yuksak axloqiy va maʼnaviy sifatlarga ega boʻlgan oʻqituvchilar bilan toʻldirishni taʼminlash;

akademik litseyni zarur oʻquv-laboratoriya jihozlari va sport anjomlari, kompyuter texnikasi, axborot-kommunikatsiya texnologiyasi jihozlari, axborot resurs markazi fondi va zarur jihozlar bilan taʼminlash vazifasi yuklansin.

3. Oʻzbekiston Respublikasi Moliya vazirligi mazkur qaror talablaridan kelib chiqqan holda 2010/2011 oʻquv yilidan boshlab Oʻrta maxsus, kasb-hunar taʼlimi markazi tomonidan taqdim etilgan hisob-kitoblarga muvofiq Toshkent shahridagi Turin politexnika universiteti huzuridagi akademik litseyni saqlash xarajatlari uchun zarur mablagʻ ajratishni nazarda tutsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari A.N. Aripov va U.U. Rozuqulov zimmasiga yuklansin.

Oʻzbekiston Respublikasi Bosh vaziri Sh. MIRZIYOYEV

Toshkent sh.,

2010-yil 20-sentabr,

208-son